ឈីលី៖ យោងតាមសេចក្តីថ្លែងការណ៍ដែលបានចេញដោយក្រសួងសុខាភិបាលបានឲ្យដឹងថា ប្រទេសឈីលីបានរាយការណ៍កាលពីថ្ងៃពុធថា ករណីដំបូងនៃជំងឺផ្តាសាយបក្សីកើតមាននៅលើមនុស្ស។ ករណីនេះត្រូវបានរកឃើញនៅលើបុរសវ័យ ៥៣ឆ្នាំម្នាក់ដែលបានបង្ហាញរោគសញ្ញាគ្រុនផ្តាសាយធ្ងន់ធ្ងរ ប៉ុន្តែពួកគេបាននិយាយថា អ្នកជំងឺស្ថិតក្នុងស្ថានភាពមានស្ថិរភាព។
រដ្ឋាភិបាលកំពុងស៊ើបអង្កេតរកប្រភពនៃការចម្លងវីរុស ព្រមទាំងអ្នកផ្សេងទៀតដែលមានទំនាក់ទំនងជាមួយអ្នកជំងឺ។ ប្រទេសឈីលីបានរាយការណ៍ពីករណីជំងឺផ្តាសាយបក្សី H5N1 ចាប់តាំងពីចុងឆ្នាំមុនដែលកើតមាននៅលើសត្វព្រៃ។ ករណីកាលពីពេលថ្មីៗនេះនៅក្នុងកសិដ្ឋានឧស្សាហកម្ម បានធ្វើឱ្យរដ្ឋាភិបាលផ្អាកការនាំចេញបសុបក្សី។ ករណីកសិដ្ឋានឧស្សាហកម្មក៏ត្រូវបានគេរកឃើញនៅក្នុងប្រទេសអាហ្សង់ទីន ប៉ុន្តែប្រទេសប្រេស៊ីលដែលជាប្រទេសនាំចេញបសុបក្សីដ៏ធំបំផុតរបស់ពិភពលោក នៅតែគ្មានករណីឆ្លងនោះទេ។
អាជ្ញាធរសុខាភិបាលប្រទេសឈីលីបាននិយាយថា វីរុសនេះអាចចម្លងពីសត្វបក្សី ឬថនិកសត្វសមុទ្រមកមនុស្ស ប៉ុន្តែពុំមានករណីឆ្លងពីមនុស្សទៅមនុស្សនោះទេ។ កាលពីដើមឆ្នាំនេះ ប្រទេសអេក្វាឌ័របានបញ្ជាក់ពីករណីដំបូងរបស់ខ្លួន នៃករណីឆ្លងជំងឺគ្រុនផ្តាសាយបក្សីមកលើក្មេងស្រីអាយុ ៩ឆ្នាំម្នាក់។ មន្ត្រីសុខាភិបាលពិភពលោកនិយាយថា ហានិភ័យនៃករណីឆ្លងរវាងមនុស្សមានកម្រិតទាប ប៉ុន្តែអ្នកផលិតវ៉ាក់សាំងបាននឹងកំពុងរៀបចំវ៉ាក់សាំងផ្តាសាយបក្សី សម្រាប់មនុស្សក្នុងករណីដែលកើតមាន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
