ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា បាន​មានប្រសាសន៍​ពាក់ព័ន្ធនឹងបញ្ហាសង្គ្រាម រុស្ស៊ី និងអ៊ុយក្រែនថា សង្គ្រាម រុស្ស៊ី និងអ៊ុយក្រែននឹងត្រូវបញ្ចប់ ប៉ុន្ដែ​បញ្ហាការប្រែប្រួលអាកាសធាតុ គឺមិនអាចបញ្ចប់​នោះទេហើយទាមទារឱ្យ​រាជរដ្ឋាភិបាល​ត្រូវយកចិត្តទុក ​ដាក់ខ្ពស់ក្នុងការបង្ការការពារជាមុន។

សម្តេចតេជោ ហ៊ុន សែន បានមានប្រសាសន៍បែបនេះក្នុងឱកាស អញ្ជើញជាអធិបតីក្នុងពិធី​ប្រគល់​វិញ្ញាបនបត្រ និងសញ្ញាបត្រជូនដល់សិក្ខាកាម និងនិស្សិតវិទ្យាស្ថានជាតិពាណិជ្ជសាស្ត្រជាង ៦ ពាន់នាក់ បន្ទាប់ពីពួកគេបានបញ្ចប់ការសិក្សាដោយជោគជ័យ ​នៅព្រឹកថ្ងៃទី៣០ ខែមីនា ឆ្នាំ២០២៣​នេះ នៅមជ្ឈមណ្ឌលសន្និបាត​ និងពិព័រណ៍កោះពេជ្រ។

សម្ដេចតេជោ បានថ្លែងថា រុស្ស៊ីមិនអាចកម្ទេចអ៊ុយក្រែន ​ហើយអ៊ុយក្រែន ក៏មិនអាចកម្ទេចរុស្ស៊ី​បានដែរ ​ដែលចុងក្រោយគឺច្បាស់ណាស់​ថា បញ្ហានេះនឹងត្រូវស្វែងរកដំណោះស្រាយ​ដើម្បី​ដោះស្រាយបញ្ហាសង្គ្រាមនោះ។

សម្ដេចតេជោ បានបញ្ជាក់ថា ប្រធានាធិបតីជិន ​បានធ្វើដំណើរទៅកាន់រុស្ស៊ី ហើយបានដាក់ចេញ​សំណើរ​ទៅស្វែងរកសន្ដិភាព ​ចំពោះបញ្ហាសង្គ្រាមរុស្ស៊ី ​និងអ៊ុយក្រែន ហើយកម្ពុជាបានគាំទ្រ​សំណើរ​របស់ចិនលើបញ្ហានេះ ​ដោយត្រូវធ្វើការដោះស្រាយបញ្ហាបញ្ចប់សង្រ្គាមតាមរយៈការចរចា ពីព្រោះសង្គ្រាមមិនអាចបញ្ចប់ដោយសង្គ្រាមបានទេ៕ អត្ថប៖ វ៉ន ដារ៉ា