ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានមានប្រសាសន៍ថា កម្ពុជា​មិនទាន់ឈ្នះសង្គ្រាមកូវីដ-១៩ ទាំងមូលទេ គឺបានឈ្នះត្រឹមសមរភូមិកូវីដ-១៩ ប៉ុណ្ណោះ ពីព្រោះបញ្ហាកូវីដ-១៩នេះ គឺមិនដឹងថា នឹងមានអ្វីកើតឡើងថែមទៀតនោះទេ ដូច្នេះមានរឿង​ច្រើនណាស់ដែលរាជរដ្ឋាភិបាលត្រូវគិតគូរទុកជាមុនដើម្បីបង្ការបញ្ហានេះ។

សម្តេចតេជោ ហ៊ុន សែន បានមានប្រសាសន៍បែបនេះក្នុងឱកាស ​អញ្ជើញជាអធិបតីក្នុងពិធី​ប្រគល់​វិញ្ញាបនបត្រ និងសញ្ញាបត្រជូនដល់សិក្ខាកាម ​និងនិស្សិតវិទ្យាស្ថានជាតិពាណិជ្ជសាស្ត្រជាង ៦ ពាន់នាក់ ​បន្ទាប់ពីពួកគេបានបញ្ចប់ការសិក្សាដោយជោគជ័យ ​នៅព្រឹកថ្ងៃទី៣០ ខែមីនា ឆ្នាំ២០២៣នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ។

សម្ដេចតេជោ បានថ្លែងថា កាលពីថ្ងៃមុនសម្ដេច​បានជួបពិភាក្សាការងារជាមួយប្រព័ន្ធអង្គការ​សហប្រជាជាតិ​នៅកម្ពុជាពាក់ព័ន្ធនឹងការពង្រឹងវិស័យសុខាភិបាល ​និងការគាំពារសង្គម ក្នុងនោះ​ប្រព័ន្ធអង្គការសហប្រជាតិបានលើកឡើងនូវកង្វល់ដែលត្រូវត្រៀម​ជា​មុនលើបញ្ហាចំនួន ២ គឺហានិភ័យ​សុខភាពសាធារណៈ និងបញ្ហាកំណើនចំនួនមនុស្សចាស់។

ទាក់ទងនឹងការឆ្លើយតបបញ្ហាទាំងពីរនេះ ​សម្ដេចតេជោ បានឆ្លើយតទៅប្រព័ន្ធអង្គការ​សហប្រជាជាតិថា ​ដោយសារតែបញ្ហាទាំងនេះ ទើបសម្ដេច ​សម្រេចឱ្យធ្វើមន្ទីរពេទ្យមួយដែលមាន​សមត្ថភាព​ដាក់អ្នកជំងឺបានរហូតដល់ ១ម៉ឺនគ្រែ​ ដែលកាលពីមុន​ មន្ទីរពេទ្យនៅរាជធានីភ្នំពេញ​មានត្រឹមតែជាង ៥០០០គ្រែតែប៉ុណ្ណោះ។

សម្តេចតេជោ ហ៊ុន សែន បានបញ្ជាក់ថា «វិបត្តិតែងបង្កប់នូវកាលានុវត្តភាព» ដូចកាលពីវីវិបត្តិកូវីដ-១៩ កម្ពុជា​បានចាប់ឱកាសជំរុញលើការប្រើប្រាស់ប្រព័ន្ធឌីជីថល​នៅកម្ពុជា ជាពិសេសក្នុង​វិស័យអបរំ ដែលក្រសួងអបរំ យុវជន និងកីឡា បានផ្ដល់ការសិក្សាដល់សិស្សតាមប្រព័ន្ធ​អនឡាញ​ជំនួសឱ្យការរៀនដោយផ្ទាល់នៅក្នុងថ្នាក់ ដើម្បីបញ្ចៀសហានិភ័យពីជំងឺកូវីដ-១៩នាពេលនោះ៕

អត្ថប៖ វ៉ន ដារ៉ា