ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានមានប្រសាសន៍ថា កងយោធពលខេមរភូមិន្ទ នៅតែរក្សាការពារបានយ៉ាងរឹងមាំ ​នូវឯករាជ្យ អធិបតេយ្យភាពទឹកដី និងថែមទាំងបានពង្រឹងកិច្ចសហប្រតិបត្តិការបានយ៉ាងល្អ ​ជាមួយបណ្តា​ប្រទេស​ជាមិត្តនៅ​តាមបណ្តោយព្រំដែនកម្ពុជាផងដែរ។

សម្តេចពិជ័យសេនា ទៀ បាញ់ បានមានប្រសាសន៍បែបនេះ ក្នុងឱកាស ចុះសាកសួរ​សុខនាយទាហាន នាយទាហានរង និងពលទាហាន ​នៅតាមបណ្តាអង្គភាពនានា ក្នុងយោធភូមិភាគ​ទី៤ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនាថ្ងៃ២៨ ខែមីនា ឆ្នាំ២០២៣នេះ។

សម្ដេចពិជ័យ មានប្រសាសន៍ថា សមិទ្ធផល​សំខាន់ៗ ដែលកងយោធពលខេមរភូមិន្ទសម្រេចបាន គឺនៅតែរក្សាការពារបានយ៉ាងរឹងមាំនូវឯករាជ្យ ​អធិបតេយ្យបូរណភាពទឹកដី និងបានពង្រឹងកិច្ច​សហប្រតិបត្តិការជាមួយប្រទេសជាមិត្តនៅតាមព្រំដែន តាមរយៈកិច្ចទំនាក់ទំនងជិតខាងល្អមិត្តភាព​ជាប្រពៃណីដោយប្រែក្លាយអតីតសមរភូមិទៅជាតំបន់អភិវឌ្ឍន៍រីកចម្រើនលើគ្រប់វិស័យ កសាង​ព្រំដែនសន្តិភាព និងកិច្ចសហប្រតិបត្តិការជាដើម។

សម្តេចពិជ័យសេនា ក៏បានក្រើនរម្លឹកនិងអំពាវនាវដល់នាយទាហាន ពលទាហានក្នុងយោធ​ភូមិភាគទី៤​ បន្តចូលរួមពង្រឹងកិច្ចការពារសុខសន្តិភាព ​សន្តិសុខ​ សណ្ដាប់ធ្នាប់សង្គម រក្សាការពារ​ឱ្យបានរឹងមាំ នូវឯករាជ្យ ​អធិបតេយ្យបូរណភាពទឹកដី និងពង្រឹងកិច្ចសហប្រតិបត្តិការជាមួយ​ប្រទេសជាមិត្តនៅតាមព្រំដែនឱ្យបានល្អបន្ថែមទៀត ស្របទៅតាមនយោបាយ​របស់រាជរដ្ឋាភិបាល៕ អត្ថបទ៖ បាន ចក់