ភ្នំពេញ៖ នៅថ្ងៃទី៣០ ខែមីនានេះ ក្រសួងទេសចរណ៍បានប្រារព្ធទិវាជំនាញហូកា (Hoka) ឆ្នាំ២០២៣ ជាលើកដំបូង ក្រោមប្រធានបទ ជំនាញវិជ្ជាជីវៈទេសចរណ៍ជាអាយុជីវិតរបស់អ្នក។ តាមរយៈទិវានេះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ ​នឹងជំរុញកម្ពុជា មាន​អ្នកជំនាញ​សំបូរបែបក្នុងវិស័យទេសចរណ៍​ និងបំពេញ​តម្រូវ​ការខ្វះខាត​អ្នកជំនាញ​ទេសចរណ៍​នៅតាមមូលដ្ឋាន​អាជីវកម្មទេសចរណ៍។

ឯកឧត្តម ប៉ាក់ សុខុម ថ្លែងថា នៅក្នុងគម្រោង ហូកា កន្លងមកក្រោមការគាំទ្រយ៉ាង​សកម្មពីគ្រប់​ភាគី​ពាក់ព័ន្ធ ​គឺបានផ្តល់នូវជំនាញវិជ្ជាជីវៈពិតប្រាកដដល់យុវជន និងយុវនារីងាយរងគ្រោះ និង​អ្នកជំនាញ​កម្រិតទាប ​នៅតាមខេត្តគោលដៅដាច់ស្រយាល​ មានជំនាញវិជ្ជាជីវៈទេសចរណ៍​កម្រិតខ្ពស់ ​ជាពិសេសការបើកឱកាសការសិក្សាពេញមួយជីវិត​ដល់យុវជនកម្ពុជា ដើម្បីការជំរុញ​ទទួលបានប្រាក់កម្រៃកាន់តែប្រសើរឡើង។

ប្រធានសមាគមសណ្ឋាគារកម្ពុជា និងបណ្តាអ្នកជំនាញនានា បានថ្លែងថា ​រហូតមកបច្ចុប្បន្នកម្ពុជា មិនទាន់​មានអ្នកជំនាញទេសចរណ៍ច្រើន ​ដែលអាច​ផ្គត់ផ្គង់​ទៅតាមសេចក្តីតម្រូវការរបស់​មូលដ្ឋាន​អាជីវកម្មទេសចរណ៍ទេ​ ហើយតាមរយៈទិវាជំនាញហូកានេះ ​នឹងជំរុញភាគីពាក់ព័ន្ធ និងយុវជន​នានានាំគ្នា​ចាប់យកជំនាញទេសចរណ៍កាន់ច្រើន ​ដើម្បីបំពេញសេចក្តីតម្រូវការអាជីវកម្មទេសចរណ៍ ជាពិសេសនៅពេលភ្ញៀវទេសចរអន្តរជាតិមកទស្សនាកម្ពុជាមានកំណើនកាន់តែច្រើន។

លោក ជួប រតនា ប្រធាននាយកដ្ឋានផែនការអភិវឌ្ឍ​ទេសចរណ៍ ​និងជាប្រធានលេខាធិការដ្ឋាន គម្រោងHoKa បានឲ្យដឹងថា​ មកដល់បច្ចុប្បន្ន អង្គការ ​ស្វីសខន់ថាក់ ​បានគាំទ្រហិរញ្ញវត្ថុ និង​សហការ​ជិតស្និទ​ជាមួយក្រសួងទេសចរណ៍ ​អនុវត្តកម្មវិធីបណ្តុះបណ្តាល​បដិសណ្ឋារកិច្ច ហូកា ពង្រីក​ការបណ្តុះបណ្តាលបដិសណ្ឋារកិច្ច ហូកា រហូតដល់ ១០ខេត្តទូទាំង​ប្រទេសកម្ពុជា និង​បាន​បណ្តុះបណ្តាលអ្នកជំនាញទេសចរណ៍ប្រមាណជាង ៣.០០០រូប គិតចាប់ពីឆ្នាំ២០១៦ដល់ ២០២២៕

អត្ថបទ ស៊ុម សុខជា