​កោះតៃវ៉ាន់៖ គណបក្ស​នយោបាយ និង​អង្គការ​ជាច្រើន​នៅ​កោះ​តៃវ៉ាន់​បាន​ធ្វើ​បាតុកម្ម​រួមគ្នា​ក្នុង​ទីក្រុង​តៃប៉ិ ដើម្បី​បង្ហាញ​ការ​ប្រឆាំង​របស់​ពួកគេ ​ចំពោះ​ជំនួប​ដ៏​មាន​សក្តានុពល​រវាង​មេដឹកនាំ​កោះ​តៃវ៉ាន់​លោកស្រី Tsai Ing-wen និង​អ្នកនយោបាយ​ប្រឆាំង​ចិន​មួយ​ចំនួន​របស់​អាមេរិក​។

យុទ្ធនាការ​រួមគ្នា​បាន​តវ៉ា​ប្រឆាំង​ជំនួប​ដែល​បាន​គ្រោងទុក​របស់​លោក​ស្រី Tsai នៅ​សហរដ្ឋអាមេរិក ដែល​បាន​រៀប​ចំ​ក្រោម​លេស​នៃ​អ្វី​ដែល​គេ​ហៅថា «​ផែនការ​ផ្លាស់ប្តូរ​» ដោយ​ចាត់​ទុក​ជំនួប​នេះ​ថា​ជា​ការ​ប៉ុនប៉ង​ដើម្បី​ស្វែងរក​ឯករាជ្យ​ភាព​កោះ​តៃវ៉ាន់​។ ដោយ​រៀបចំ​ដោយ​វេទិកា​សន្តិភាព និង​ការ​អភិវឌ្ឍន៍​ឆ្លង​ច្រក​សមុទ្រ មនុស្ស​ប្រមាណ ២០០​នាក់​មកពី​គ្រប់​ទីកន្លែង​បាន​មក​ប្រមូល​ផ្តុំគ្នា​កាលពី​ថ្ងៃ​អង្គារ ដើម្បី​បង្ហាញ​ការ​ប្រឆាំង​របស់​ពួកគេ​ចំពោះ​ឯករាជ្យ​ភាព​កោះ​តៃវ៉ាន់ និង​ការ​ជ្រៀត​ជ្រែក​របស់​បរ​ទេស​។ អ្នកតំណាង​ក្រុម​អ្នក​តវ៉ា​វ័យក្មេង​បាន​បង្ហាញ​ការ​តវ៉ា​ជា​លាយលក្ខណ៍អក្សរ​ ទៅកាន់​តំណាង​មកពី​ការិយាល័យ​មេដឹកនាំ​កោះ​។​ ​

ក្រុម​បាតុករ​បាន​ចេញ​សេចក្តីថ្លែងការណ៍ និង​បាន​និយាយ​ថា ទង្វើ​របស់​អាជ្ញាធរ​គណបក្ស​ប្រជាធិបតេយ្យ​ជឿន​លឿន (DPP) ដើម្បី​រួមគំនិត​ជាមួយ​អ្នកនយោបាយ​អាមេរិកបាន​ក្បត់​កោះ​តៃវ៉ាន់ និង​ស្មើនឹង​ធ្វើ​ឱ្យ​ខ្លួនឯង​ជាស​ត្រូវ​របស់​ប្រជាជន​កោះ​តៃវ៉ាន់​។ ពួកគេ​បាន​ទទូច​ថា ប្រជាជន​តៃវ៉ាន់​មិន​ត្រូវ​អង្គុយ​នៅ​ស្ងៀម​នៅ​ចំពោះ​មុខ​ការ​ឃុប​ឃិត​គ្នា​រវាង​កោះ​នេះ និង​សហរដ្ឋអាមេរិក​ឡើយ​។​ ​លោក Wu Jung-yuan អ្នក​រៀប​ចំ​វេទិកា​សន្តិភាព និង​អភិវឌ្ឍន៍​ឆ្លង​ច្រក​សមុទ្រ និង​ជា​ប្រធាន​គណបក្ស​ការងារ​កោះ​តៃវ៉ាន់​បាន​និយាយ​ថា ការប៉ុនប៉ង​ឃុបឃិត​ជាមួយ​សហរដ្ឋ​អាមេរិក និង​ស្វែងរក​ឯករាជ្យ​ភាព​កោះ​តៃវ៉ាន់​ ធ្វើ​ឱ្យ​ប៉ះពាល់​ដល់​សន្តិភាព និង​ស្ថិរភាព​នៅ​ទូទាំង​ច្រក​សមុទ្រ​តៃវ៉ាន់ និង​ធ្វើ​ឱ្យ​ប៉ះពាល់​ដល់​អារម្មណ៍​របស់​ប្រជាជន​ទាំងសងខាង៕​

អត្ថបទ៖ ប៊ុនថន