​អាមេរិក៖ សេត​វិមាន​កាលពី​ថ្ងៃ​ពុធ​បាន​ជំរុញ​ចិន ​កុំ​ឲ្យ​ប្រើ​ការ​ឈប់​សំចត​ជា​ធម្មតា​របស់​មេដឹកនាំ​កោះ​តៃវ៉ាន់​នៅ​ក្នុង​សហរដ្ឋអាមេរិក​ ជា​លេសក្នុង​ការ​បង្កើន​សកម្ម​ភាព​ដាក់​សម្ពាធ​ប្រឆាំង​កោះ​តៃវ៉ាន់។

​លោក John Kirby អ្នកនាំពាក្យ​សន្តិសុខ​ជាតិ​របស់​សេត​វិមានបាន​ប្រាប់​ក្រុម​អ្នកសារព័ត៌មាន​ថា ការ​មក​ដល់​របស់​មេ​ដឹកនាំ​កោះ​តៃវ៉ាន់​លោកស្រី Tsai Ing-wen នៅ​ក្នុង​សហរដ្ឋអាមេរិក​គឺជា​ទម្លាប់​នៃ​ការ​ឈប់​សំចត​ជា​បន្តបន្ទាប់​ចុងក្រោយ​។​ ​លោក​ថា សាធារណរដ្ឋ​ប្រជាមានិត​ចិន​មិន​គួរ​ប្រើប្រាស់​ការ​ឈប់​សំចត​នេះ​ ជា​លេស​ក្នុង​ការ​បង្កើន​សកម្មភាព​ណាមួយ​ជុំវិញ​ច្រក​សមុទ្រ​តៃវ៉ាន់​ឡើយ​។​ លោក Kirby និយាយ​ថា យើង​គិត​ថា​ ស្ថានភាព​រវាង​សហរដ្ឋ​អាមេរិក និង​ចិន​នៅ​ពេល​នេះ​គឺ​តានតឹង​ខ្លាំង ប៉ុន្តែ​លោក​បាន​ជំរុញ​ទីក្រុង​ប៉េកាំង​រក្សា​ការ​បើ​ចំហ​ច្រក​បន្ទាត់​ទំនាក់ទំនង​។

​រដ្ឋាភិបាល​ចិន​បាន​ព្រមាន​សងសឹក​បើ​មេដឹកនាំ​កោះ​តៃវ៉ាន់​លោកស្រី Tsai Ing-wen ជួប​ប្រធាន​សភា​អាមេរិក​អំឡុង​ទស្សនកិច្ច​នៅ​សប្ដាហ៍​នេះ និង​បាន​ជំរុញ​ឲ្យ​សហរដ្ឋអាមេរិក​កុំ​អនុញ្ញាត​ឲ្យ​លោកស្រី​ឈប់​សំចត​ឆ្លងកាត់​សហរដ្ឋអាមេរិក ដោយ​និយាយ​ថា ទង្វើ​នេះ​នឹង​នាំ​ឲ្យ​មាន​បញ្ហា​កើតឡើង​៕​

អត្ថបទ៖ សុខមាន