ភ្នំពេញ៖ បច្ចុប្បន្នសហភាពសហព័ន្ធយុវជនកម្ពុជា រាជធានីភ្នំពេញ កំពុងមមាញឹករៀបចំបេះដូងដែលបត់រួចជាច្រើន បញ្ចូលក្នុងចង្កាក់តែមួយ បន្ទាប់មកនឹងបញ្ជូនទៅទីស្នាក់ការកណ្តាលសភាពសហព័ន្ធយុវជនកម្ពុជា ដើម្បីត្រៀមបំបែកកំណត់ត្រាពិភពលោក។

នេះបើតាមការលើកឡើងរបស់លោក ពិន សុវណ្ណារិទ្ធ អនុប្រធានលេខាធិការដ្ឋាន ស.ស.យ.ក.រាជធានីភ្នំពេញ ផ្តល់បទ​សម្ភាសន៍​ជាមួយBTV នៅថ្ងៃទី៣០ខែមីនានេះ។

លោកបន្តទៀតថា ​ តាមការគ្រោងទុកការបត់បេះដូងតែមួយពីក្រដាសនេះ​ នឹង​បញ្ចប់នៅថ្ងៃទី​២ខែ មេសា ឆ្នាំ២០២៣។ ​ហើយការបត់បេះដូងនេះ ​គឺជាការ​ផ្សព្វផ្សាយ ​និងបំផុសស្មារតី ក្នុងនាម​ប្រជាពលរដ្ឋខ្មែរ​ ផ្តល់​កម្លាំង​ចិត្តទៅដល់កីឡាករ​ សម្រាប់ការប្រកួតស៊ីហ្គេមលើកទី៣២ និង​អាស៊ានប៉ារ៉ាហ្គេមលើកទី១២។ ​លើសពីនេះ ​លោកបង្ហាញការជឿជាក់ថា ខ្មែរអាចធ្វើបាន។

សម្រាប់យុវជនស្ម័គ្រចិត្ត ​បានលើកឡើងដែរថា ​ពេលបានចូលរួមបត់បេះដូងរួមគ្នា គឺមាន​អារម្មណ៍រំភើបរីករាយ​ ព្រោះបានចូលរួមចំណែកជំរុញ​​លើកទឹកចិត្តដល់អត្តពលិក និងបង្ហាញ​ទៅបរទេសថា​ខ្មែរអាចធ្វើបាន។

សហភាពសហព័ន្ធយុវជនកម្ពុជា ​សម្រេច​បង្កើត BeyondTheGames ​ដែល​ជាយុទ្ធនាការផ្សព្វផ្សាយ​ព្រឹត្តិការណ៍​កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលប្រទេសកម្ពុជា​នឹង​ក្លាយជាម្ចាស់ផ្ទះទទួលរៀបចំការប្រកួត​ជាលើកដំបូងក្នុងប្រវត្តិសាស្រ្ត។

ក្នុងយុទ្ធនាការនេះ​ សម្រេចជ្រើសរើស ​ការបត់បេះដូងពី​ក្រដាសច្រើន​ជាង​គេក្នុងពិភពលោក​ចំនួន​១លានបេះដូង​ ដើម្បី​បំបែក​កំណត់ត្រាពិភពលោក។ ​កម្មវិធីបំបែកកំណត់ត្រា គ្រោងនឹងធ្វើឡើង​នៅក្នុងព្រឹត្តិការណ៍អង្គរ​សង្ក្រាន្ត នាថ្ងៃទី១២ខែមេសាខាងមុខ ៕ អត្ថបទ៖ទូច សោភ័ណ