ទួរគី៖ ប្រទេសហ្វាំងឡង់នឹងក្លាយជាសមាជិកទី៣១ របស់សម្ព័ន្ធយោធាណាតូ បន្ទាប់ពីសភារបស់ប្រទេសទួរគីបានបោះឆ្នោតអនុម័តលើពាក្យស្នើសុំរបស់ប្រទេសនេះ។ ទួរគីបានពន្យារពេលពាក្យស្នើសុំរបស់ប្រទេសហ្វាំងឡង់ ក្នុងការចូលរួមជាមួយសម្ព័ន្ធយោធារបស់ប្រទេសលោកខាងលិចរយៈពេលជាច្រើនខែ ដោយបានតវ៉ាថាប្រទេសនៅអឺរ៉ុបខាងជើងមួយនេះកំពុងគាំទ្រភេរវករ។
ប្រទេសស៊ុយអែតដែលបានដាក់ពាក្យស្នើសុំចូលជាមួយសម្ព័ន្ធយោធាណាតូ ក្នុងពេលជាមួយគ្នាកាលពីឆ្នាំមុនដែរនោះ នៅតែត្រូវបានរារាំងដោយទីក្រុងអង់ការ៉ាជុំវិញការតវ៉ាស្រដៀងគ្នានេះ។ ការពង្រីកខ្លួនរបស់សម្ព័ន្ធយោធាណាតូ ណាមួយចាំបាច់ត្រូវការការគាំទ្រពីសមាជិកទាំងអស់របស់ខ្លួន។ បច្ចុប្បនេះប្រទេសហ្វាំងឡង់នឹងត្រូវបានបញ្ចូលជាផ្លូវការទៅក្នុងសម្ព័ន្ធយោធាណាតូ នៅក្នុងកិច្ចប្រជុំកំពូលបន្ទាប់របស់ខ្លួនដែលនឹងប្រព្រឹត្តទៅនៅខែកក្កដា ក្នុងប្រទេសលីទុយអានី។ ប្រធានាធិបតីទួរគីលោក Recep Tayyip Erdogan បានផ្តល់ការព្រមព្រៀងរបស់លោកចំពោះបំណងរបស់ប្រទេសហ្វាំងឡង់កាលពីដើមខែមីនា ដោយកោតសរសើរជំហានពិតប្រាកដ និងរឹងមាំរបស់ប្រទេសនេះលើបញ្ហាសន្តិសុខរបស់ប្រទេសទួរគី។
ប៉ុន្តែអរិភាពដែលកំពុងបន្តរបស់លោកចំពោះប្រទេសស៊ុយអែតគឺច្បាស់លាស់ ខណៈលោកបានចោទប្រកាន់ម្តងទៀតថា ប្រទេសនេះបានគាំទ្រក្រុមសកម្មប្រយុទ្ធឃឺដ ហើយអនុញ្ញាតឱ្យពួកគេចេញតវ៉ានៅតាមដងផ្លូវនៃរដ្ឋធានី Stockholm។ ប្រទេសនៅអឺរ៉ុបខាងជើងទាំង២ នេះបានបោះបង់ចោលអព្យាក្រឹតភាពយោធាជាប្រពៃណីរបស់ពួកគេ ដើម្បីឆ្លើយតបទៅនឹងការឈ្លានពានពេញបន្ទុករបស់រុស្ស៊ីលើអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
