​អាមេរិក៖ ក្រសួងការបរទេស​សហរដ្ឋ​អាមេរិក​កាលពី​ថ្ងៃ​ព្រហស្បតិ៍ ទី​៣០ ខែមីនា បាន​ជំរុញ​ឱ្យ​ពលរដ្ឋ​ដែល​រស់នៅ ឬ​ធ្វើដំណើរ​ក្នុង​ប្រទេស​រុស្ស៊ី​ចាកចេញ​ជាបន្ទាន់ ក្នុង​ពេល​មានការ​ចាប់ខ្លួន​អ្នករាយការណ៍​ព័ត៌មាន​អាមេរិក​ម្នាក់ ដែល​ត្រូវ​បាន​ចោទប្រកាន់​ពីបទ​ចារកម្ម ជា​ទង្វើ​ដ៏​ធ្ងន់ធ្ងរ​បំផុត​មកលើ​អ្នកសារព័ត៌មាន​បរទេស ចាប់តាំងពី​រុស្ស៊ី​បាន​ឈ្លាន​ពាន​លើ​អ៊ុយ​ក្រែ​ន​។

អ្នកនាំពាក្យ​រង​របស់​ក្រសួងការពារជាតិលោក Vedant Patel បាន​និយាយ​ក្នុង​សន្និសីទ​សារព័ត៌មាន​ថា សហរដ្ឋ​អាមេរិក​ថ្កោលទោស​ក្នុងន័យ​ខ្លាំង​បំផុត ចំពោះ​បំណង​បន្ត​របស់​វិមាន​ក្រឹម​ឡាំង​ដើម្បី​បំភិតបំភ័យ ដាក់​គំនាប និង​ដាក់ទណ្ឌកម្ម​លើ​អ្នកសារព័ត៌មាន និង​សំឡេង​សង្គម​ស៊ីវិល​។ តុលាការក្រុង​មូ​ស្គូបានចេញ​សេចក្តីសម្រេច​ថា ជនជាតិ​អាមេរិក និង​ជា​អ្នកសារព័ត៌មាន​ប្រចាំ​សារព័ត៌មាន Wall Street Journal លោក Evan Gershkovich នឹង​ត្រូវបាន​ឃុំខ្លួន​ជិត​ពីរ​ខែ​ពីបទ​សង្ស័យថា​បាន​ប្រព្រឹត្ត​ចារកម្ម​។ អង្គភាព​សេវា​សន្តិសុខ FSB របស់​រុស្ស៊ីបាន​និយាយ​កាលពី​ថ្ងៃ​ព្រហស្បតិ៍​ថា អង្គភាព​នេះ​បាន​បើក​សំណុំរឿង​ព្រហ្មទណ្ឌ​លើ​លោក Gershkovich។ វិមាន​ក្រឹម​ឡាំង​បាន​និយាយថា លោក​ត្រូវបាន​រកឃើញ​កំហុស ប៉ុន្តែ​មិនមាន​ភស្តុតាង​ឯកសារ ​ឬ​វីដេអូ​នោះទេ​។ រដ្ឋបាល​របស់​ប្រធានាធិបតី​សហរដ្ឋ​អាមេរិកលោក Joe Biden បាន​និយាយថា វា​ជាការ​ព្រួយបារម្ភ​ខ្លាំង ហើយ​មន្ត្រី​បាន​ទាក់ទង​ជាមួយ​និយោជក និង​ក្រុមគ្រួសារ​របស់លោក Gershkovich រួចហើយ​។

ក្រុមគាំទ្រ​អ្នកសារព័ត៌មានបានទាមទារ​ឱ្យ​ដោះលែងលោក Gershkovich​។ ករណីនេះ​នឹងធ្វើ​ឲ្យ​កាន់តែ​យ៉ាប់យ៉ឺន​ទៅៗ​លើ​ទំនាក់ទំនង​រវាង​ក្រុង​មូ​ស្គូ និង​ក្រុង​វ៉ាស៊ីនតោន ជា​ប្រទេស​មហាអំណាច​នុយក្លេអ៊ែរ​ទាំងពីរ​។ សហរដ្ឋ​អាមេរិកគឺជា​អ្នកគាំទ្រ​ផ្នែក​យោធា​ដ៏​ធំ​បំផុត​របស់​អ៊ុយ​ក្រែ​ន ខណៈ​ទីក្រុង Kyiv ប្រយុទ្ធប្រឆាំង​ការឈ្លានពាន​របស់​រុស្ស៊ី ហើយ​បានដាក់​ទណ្ឌកម្ម​លើ​ទីក្រុង​មូ​ស្គូ ដើម្បី​ព្យាយាម​បញ្ចុះបញ្ចូល​ឱ្យ​បញ្ចប់​ការឈ្លានពាន​របស់​រុស្ស៊ី​លើ​អ៊ុយ​ក្រែ​ន​។ លោក Gershkovich អាយុ ៣១ឆ្នាំ ជា​ជនជាតិ​អាមេរិក​ត្រូវបាន​ចាប់ខ្លួន​ដោយ​រុស្ស៊ី ចាប់តាំងពី​កីឡាករ​បាល់បោះ Brittney Griner ដែល​ត្រូវបាន​ចាប់ខ្លួន​ពេល​បានមក​ដល់ទី​ក្រុង​មូ​ស្គូ ​ជាមួយនឹង​ប្រេង​កញ្ឆា​មួយ​សប្តាហ៍​មុនពេល​ការវាយលុក​លើ​អ៊ុយ​ក្រែ​ន ប៉ុន្តែ​ត្រូវបាន​ដោះលែង​ដោយ​ការដោះដូរ​ឈ្លើយសឹក ១០ខែក្រោយ​មក៕

អត្ថបទ៖ ប៊ុនថន