ភ្នំពេញ៖ ក្រសួងសង្គមកិច្ច ដែលធ្វើការលើវិស័យពិការភាព ​បានរៀបចំសិក្ខាសាលា ដោយ​អញ្ជើញបណ្ដាធនាគារ និងមីក្រូហិរញ្ញវត្ថុ ​ដើម្បីធ្វើការសិក្សា ​និងពិភាក្សាបន្ថែម ពីការផ្ដល់​សេវា​ហិរញ្ញវត្ថុជូនជនមានពិការភាពឱ្យកាន់តែមានភាពប្រសើរ ​និង​មាន​ភាព​ងាយស្រួល។

ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី ៣១ខែមីនា ឆ្នាំ២០២៣នេះ បានរៀបចំ​សិក្ខាសាលាស្ដីពី “បរិយាបន្នពិការភាពសម្រាប់គ្រឹះស្ថានធនាគារ​ និងហិរញ្ញវត្ថុ”។

ឯកឧត្តម ឯម ច័ន្ទមករា រដ្ឋលេខាធិការ​ ក្រសួងសង្គមកិច្ចបានលើកឡើងទៅកាន់តំណាងធនាគារ និង​មីក្រូហិរញ្ញវត្ថុ ដែលមានវត្តមានក្នុងសិក្ខាសាលាថា ​សិក្ខាសាលានេះ ជាឱកាសល្អសម្រាប់​ការ​ចែករំលែកនូវបទពិសោធន៍ និងករណីសិក្សាជាក់ស្តែង ​នៃការផ្តល់សេវាហិរញ្ញវត្ថុដល់​ជនមាន​ពិការភាព។

ឯកឧត្តមបន្តថា នេះជាមូលដ្ឋានគំនិតសម្រាប់​គ្រឹះស្ថានធនាគារ ​និងមីក្រូហិរញ្ញវត្ថុនានាពិចារណា​ដាក់​បញ្ចូល​ជាអាទិភាពសម្រាប់ការផ្តល់សេវាហិរញ្ញវត្ថុដល់ជនមានពិការភាព។

ឯកឧត្តមបន្តថា ​ជនមានពិការភាពត្រូវការចាំបាច់នូវព័ត៌មានពីរបៀបទទួល​បានសេវាហិរញ្ញវត្ថុ​ដែលមានការគ្រប់គ្រង ​និងប្រើប្រាស់ផលិតផលហិរញ្ញវត្ថុដោយសុវត្ថិភាព។ ដូច្នេះ អ្នកផ្តល់​សេវាហិរញ្ញវត្ថុ គួរពិនិត្យលទ្ធភាពធ្វើយ៉ាងណាឱ្យផលិតផលនិងសេវាកម្មរបស់ខ្លួន អាចប្រើប្រាស់​និងទទួលយកបានសម្រាប់ជនមានពិការភាពគ្រប់ប្រភេទ។​ជារួម ដើម្បីធានាដល់សន្តិសុខ​សេដ្ឋកិច្ច និងស្វ័យភាពរបស់ជនមានពិការភាព​ ពួកគេចាំបាច់ត្រូវការលទ្ធភាព​ទទួល​បានដើមទុនកម្ចី​ដើម្បី​វិនិយោគក្នុងសកម្មភាពអាជីវកម្ម ​និងផលិតផលហិរញ្ញវត្ថុផ្សេងទៀត​ ដូចជាប្រាក់បញ្ញើ ការទូទាត់ និងការធានារ៉ាប់រង ជាដើម។

សូមបញ្ជាក់ថា ជាក់ស្ដែងផែនការយុទ្ធសាស្រ្តជាតិស្តីពីពិការភាព ​២០១៩-២០២៣ បានផ្តោត​លើការ​កាត់បន្ថយភាពក្រីក្រតាមរយៈការលើកកម្ពស់ជីវភាព ​និងការទទួលបានសេវាកម្មនានា រួមទាំង​ការបង្កើនការងារ ​និង​ឱកាស​សហគ្រិនភាព​សម្រាប់​ជនមានពិការភាពផងដែរ៕អត្ថបទ៖ គឹមហុក