ភ្នំពេញ៖ មន្រ្តីជំនាញនៃនាយកដ្ឋាននគរបាល បង្ការ ពន្លត់អគ្គិភ័យ និងសង្គ្រោះ នៃស្នងការនគរបាលជាតិ បានរម្លឹកដល់ប្រជាពលរដ្ឋត្រូវបង្កើនការប្រុងប្រយ័ត្នឱ្យបានខ្ពស់ ដើម្បីបង្ការហានិភ័យដែលអាចកើតឡើងដោយអគ្គិភ័យ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ។
មានប្រសាសន៍ក្នុងកិច្ចសម្ភាសជាមួយBTV នៅថ្ងៃទី៣១ ខែមីនានេះ ឧត្តមសេនីយ៍ឯក នេត វត្ថា ប្រធាននាយកដ្ឋាននគរបាល បង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាន នគរបាលជាតិ បានថ្លែងថា ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ នាពេលខាងមុខនេះ នាយដ្ឋាន បានត្រៀមកម្លាំងជំនាញពន្លត់អគ្គិភ័យ និងរថយន្តពន្លត់អគ្គិភ័យប្រមាណជា ៤០០គ្រឿងនៅទូទាំងប្រទេស ក្នុងករណីមានគ្រោះអគ្គិភ័យកើតជាយថាហេតុ។
លើសពីនេះ ឧត្តមសេនីយ៍ឯក បានអំពាវនាវដល់ប្រជាពលរដ្ឋពេលចាកចេញពីផ្ទះ ត្រូវកាច់ប៉ារ៉េតភ្លើង និងពេលដុតក្រដាសសែនព្រេនផ្សេងៗជាដើមនោះ ត្រូវបង្កើនការប្រុងប្រយ័ត្នឱ្យបានខ្ពស់។
នៅឆ្នាំ២០២៣ ពិធីបុណ្យចូលឆ្នាំថ្មី ប្រពៃណីជាតិ នឹងចាប់ផ្តើមពីថ្ងៃទី១៤ ដល់ថ្ងៃទី១៦ ខែមេសាខាងមុខនេះ។
សូមបញ្ជាក់ថា ក្នុងពិធីបុណ្យចូលឆ្នាំថ្មី ប្រពៃណីជាតិ នៅឆ្នាំ២០២២កន្លងទៅ មានគ្រោះអគ្គិភ័យកើតឡើងចំនួន ៧ ករណី បណ្ដាលឱ្យផ្ទះចំនួន៥ខ្នង និងតូប១ រួមទាំងខ្សែភ្លើងចំនួន៣៧ដុំ បានរងនូវការឆាបឆេះ និងបណ្ដាលឱ្យបុរសម្នាក់បានរងរបួស។ ខេត្តដែលមានគ្រោះអគ្គិភ័យនោះ រួមមាន ខេត្តព្រះវិហារ ព្រះសីហនុ កំពង់ធំ បាត់ដំបង សៀមរាប និងត្បូងឃ្មុំ។មូលមូលហេតុបណ្ដាលឱ្យមានគ្រោះអគ្គិភ័យមានដូចជា៖ ឆ្លងចរន្តអគ្គិសនី ឆេះចង្ក្រាន ភ្លើងដុតសំរាម និងមិនទាន់ដឹងមូលហេតុ១ករណី។ នេះបើតាមរបាយការណ៍របស់នាយកដ្ឋាននគរបាល បង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាន នគរបាលជាតិ៕ អត្ថបទ៖ទូច សោភ័ណ