កំពង់ចាម៖ រដ្ឋបាលខេត្តកំពង់ចាម បានអំពាវនាវទៅពលរដ្ឋពាក់ព័ន្ធ ឱ្យទៅផ្ដល់សំណាកពិនិត្យមេរោគកូវីដ-១៩ និងរក្សាខ្លួននៅដាច់ដោយឡែក បន្ទាប់ពីរកឃើញមនុស្ស ០៤នាក់ឆ្លងមេរោគកូវីដ-១៩។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តកំពង់ចាម បញ្ជាក់ថា បុរស ០៣នាក់ និងស្ត្រី ១នាក់ផងដែរ ត្រូវបានក្រសួងសុខាភិបាលប្រកាសនៅថ្ងៃនេះថា បានឆ្លងមេរោគកូវីដ-១៩។
បើតាមសេក្ដីប្រកាសព័ត៌មាននោះ ករណីឆ្លងថ្មីទាំង ០៤នាក់នេះ ត្រូវបានរកឃើញលើបុរសម្នាក់អាយុ ២៤ឆ្នាំរស់នៅភូមិខ្វិត ឃុំតាំងក្រសាំង ស្ថិតក្នុងស្រុកបាធាយ និងបុរសម្នាក់ទៀតអាយុ ៣៧ឆ្នាំ រស់នៅឯភូមិតាមើង ឃុំទួលព្រះឃ្លាំង ស្រុកស្ទឹងត្រង់។
រដ្ឋបាលខេត្តកំពង់ចាម បញ្ជាក់ទៀតថា ករណីឆ្លង ០២នាក់ទៀត ត្រូវបានរកឃើញលើបុរសម្នាក់អាយុ ១៩ឆ្នាំ និងភរិយារបស់គាត់អាយុ ១៨ឆ្នាំ ដែលរស់នៅក្នុងភូមិត្រពាំងឫស្សី ឃុំក្រឡា ស្រុកកំពង់សៀម។
រដ្ឋបាលខេត្តកំពង់ចាម បានអំពាវនាវដល់ពលរដ្ឋពាក់ព័ន្ធនឹងអ្នកឆ្លងកូវីដ-១៩ទាំង ០៤នាក់នេះ ឱ្យទៅផ្ដល់សំណាក និងរក្សាខ្លួននៅដាច់ដោយឡែក ដើម្បីតាមដានសុខភាពខ្លួនឯង។
បើតាមរបាយការណ៍ក្រសួងសុខាភិបាល ខេត្តកំពង់ចាមរកឃើញមនុស្សសរុប ៩៤នាក់ហើយឆ្លងមេរោគកូវីដ-១៩ ក្នុងនោះមានទាំងករណីឆ្លងថ្មី ០៤នាក់ដែលរដ្ឋបាលខេត្តកំពង់ចាមបានជូនដំណឹងខាងលើផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
