បាត់ដំបង៖ ឯកឧត្តមបណ្ឌិត ស្រេង វង្សហៀង អនុរដ្ឋលេខាធិការក្រសួងមហាផ្ទៃ និងជាប្រធានក្រុមការងារគណបក្សប្រជាជនកម្ពុជា (CPP) ចុះជួយឃុំព្រះផុស ស្រុកគាស់ក្រឡ ខេត្តបាត់ដំបង បានចុះសួរសុខទុក្ខ និងផ្សព្វផ្សាយដល់ប្រជាពលរដ្ឋគ្រប់អាយុបោះឆ្នោត និងមានឈ្មោះក្នុងបញ្ជីឈ្មោះបោះឆ្នោតឱ្យត្រៀមឯកសារ និងអត្តសញ្ញាណប័ណ្ណឱ្យបានរួចរាល់ ដើម្បីមានសិទ្ធិបោះឆ្នោតជ្រើសតាំងតំណាងរាស្ត្រីនីតិកាលទី៧ ដែលនឹងប្រព្រឹត្តឡើងនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នា។
ការចុះសួរសុខទុក្ខប្រជាពលរដ្ឋនេះបានធ្វើឡើងនៅថ្ងៃទី១ ខែមេសា ឆ្នាំ២០២៣ នៅភូមិសាច់ហាប់ ឃុំព្រះផុស ដោយមានការចូលរួមពីសមាជិក សមាជិកាគណបក្សប្រជាជនក្នុងមូលដ្ឋាន មេភូមិ មេឃុំ រួមទាំងយុវជនបក្សមួយចំនួនផងដែរ។ នាឱកាសនោះឯកឧត្តមបណ្ឌិត ស្រេង វង្សហៀង បានផ្សព្វផ្សាយគោលនយោបាយគណបក្សប្រជាជនកម្ពុជា ជូនដល់សមាជិក សមាជិកា និងប្រជាពលរដ្ឋក្នុងមូលដ្ឋាន។
ឯកឧត្តមប្រធានក្រុមការងារបានថ្លែងថា អាជ្ញាធរឃុំត្រូវបន្តខិតខំបម្រើសេវាសាធារណៈជូនប្រជាពលរដ្ឋឱ្យកាន់តែល្អប្រសើរ រួមទាំងការអនុវត្តនូវគោលនយោបាយភូមិឃុំ មានសុវត្ថិភាព ដើម្បីឱ្យពលរដ្ឋរស់នៅប្រកបដោយភាពកក់ក្ដៅ ពិសេសត្រូវទប់ស្កាត់ឱ្យបាននូវបទល្មើសផ្សេងៗ មានល្បែងស៊ីសង ក្មេងទំនើង គ្រឿងញៀន និងចោរកម្មជាដើម។
ជាចុងក្រោយ ឯកឧត្ដមបណ្ឌិតក៏បានផ្ដាំផ្ញើដល់ប្រជាពលរដ្ឋដែលមានឈ្មោះបោះឆ្នោតសូមអញ្ជើញទៅបោះឆ្នោតទាំងអស់គ្នា ពិសេសគឺបោះឆ្នោតជូនគណបក្សប្រជាជនកម្ពុជាដែលជាគណបក្សតែមួយគត់តែងតែនៅជាមួយប្រជាជនគ្រប់កាលៈទេសៈ ដើម្បីបន្តរក្សាសុខសន្តិភាព និងការអភិវឌ្ឍប្រទេសជាតិ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
