​អាមេរិក៖ ព្យុះ​កួច​បាន​វាយបក់​ឆ្លងកាត់​រដ្ឋ Arkansas, Illinois, Iowa, Wisconsin, Mississippi និង​រដ្ឋ​Tennessee​។ យោង​តាម​មជ្ឈមណ្ឌល​ព្យាករណ៍​ព្យុះ​បាន​ឲ្យ​ដឹង​ថា ការ​តាម​ដាន​ព្យុះ​កួច​នេះ​បាន​បង្ហាញ​ថា​ ព្យុះ​នេះ​បាន​បក់​បោក​ចូល​ក្នុង​រដ្ឋ Indiana ភាគ​អាគ្នេយ៍ រដ្ឋ​ Kentucky​ ភាគ​ខាងជើង និង​រដ្ឋ Ohio ភាគ​ខាងលិច​រហូតដល់​ម៉ោង ៥​ព្រឹក​ម៉ោង​ក្នុង​តំបន់​។

នេះ​រួមបញ្ចូល​ទាំង​ទីក្រុង Dayton និង​ទីក្រុង Cincinnati រដ្ឋ Ohio​។ តំបន់​ជាច្រើន​ដែល​រង​ផល​ប៉ះពាល់​ដោយ​ព្យុះ​កំពុង​កើតឡើង អាច​ឃើញ​មាន​ព្យុះ​កួច​ជាច្រើន​មេ​ទៀតដែល​មាន​កម្លាំង​ខ្យល់​បក់​រហូតដល់​ ៧០ម៉ា​យ​ក្នុង​មួយ​ម៉ោង និង​ព្រិល​ប៉ុន​ទំហំ​ស៊ុត​។​ លំនៅឋាន និង​អាជីវកម្ម​ជិត ៣០០,០០០​កន្លែង គ្មាន​ថាមពល​ប្រើប្រាស់​នៅ​ទូទាំង​សហរដ្ឋ​អាមេរិក​ភាគ​កណ្តាល​។ យោង​តាម​គេហទំព័រ​តាមដាន PowerOutage.us បាន​ឱ្យដឹង​ថា អតិថិជន​ប្រើប្រាស់​ថាមពល​ជិត ៣០០,០០០​នាក់ស្ថិត​នៅ​ក្នុង​ភាព​ងងឹត​កាលពី​យប់​ថ្ងៃ​សុក្រ ​នៅ​ក្នុង​រដ្ឋ​រង​ផល​ប៉ះពាល់​ដោយ​ព្យុះ​ដែល​បាន​បក់​បោក​ពាសពេញ​តំបន់​នៅ​ភាគ​កណ្តាល​សហរដ្ឋអាមេរិក​។​

​គេហទំព័រ​តាមដាន​បង្ហាញ​ថា រដ្ឋ Illinois មានការ​ដាច់​ភ្លើង​ច្រើន​បំផុត​ដែល​ត្រូវ​បាន​រាយការណ៍ ដោយ​អតិថិជន​ជាង ១០០,០០០​នាក់គ្មាន​ថាមពល​ប្រើប្រាស់ ហើយ​បន្ទាប់មក​មានការ​ដាច់​ភ្លើង​សម្រាប់​អតិថិជន​ជិត ៦៩,០០០​នាក់​នៅ​រដ្ឋ Arkansas​។ យោង​តាម​មជ្ឈមណ្ឌល​ព្យាករណ៍​ព្យុះ​បាន​និយាយ​ថា របាយការណ៍​បឋម​នៃ​ព្យុះ​កំបុតត្បូង​ជាង​ ៤០​លើក​ត្រូវ​បាន​ធ្វើឡើង​នៅ​ក្នុង​រដ្ឋ​ចំនួន​៦​។ មាន​របាយការណ៍​បឋម​ចំនួន ៣០ នៃ​ព្យុះ​កំបុត​ត្បូង​នៅ​ទូទាំង​រដ្ឋ​ Arkansas រដ្ឋ​ Illinois រដ្ឋ ​Iowa រដ្ឋ​ Tennessee និង​រដ្ឋ​ Mississippi គិត​ត្រឹម​យប់​ថ្ងៃ​សុក្រ៕

អត្ថបទ៖ ប៊ុនថន