អន្ដរជាតិ៖ យោងតាមប្រភពស្និទ្ធនឹងករណីនេះ លោក Donald Trump ប្រឈមការចោទប្រកាន់ជាង ៣០ករណី ពាក់ព័ន្ធនឹងការធ្វើធុរកិច្ចខុសច្បាប់ក្នុងបទចោទប្រកាន់ពីក្រុមតុលាការតំបន់ Manhattan រដ្ឋNew York ជាលើកដំបូងក្នុងប្រវត្តិសាស្ត្រសហរដ្ឋអាមេរិក ដែលអតីតប្រធានាធិបតីមួយរូបនាពេលបច្ចុប្បន្ន បានប្រឈមបទចោទព្រហ្មទណ្ឌជាច្រើនករណីបែបនេះ។

គេរំពឹងថា លោក Trump នឹងឡើងសវនាការនៅថ្ងៃអង្គារសប្ដាហ៍ក្រោយ។ ការចោទប្រកាន់នេះ ត្រូវបានដាក់ក្រោមការប្រថាប់ត្រា ហើយនឹងត្រូវប្រកាសក្នុងពេលប៉ុន្មានថ្ងៃខាងមុខ។ ការចោទប្រកាន់ទាំងឡាយ ពុំបានផ្សព្វផ្សាយឲ្យដឹងជាសាធារណៈទេនៅពេលនេះ។

ការិយាល័យរបស់មេធាវីតំបន់ Manhattan លោក Alvin Bragg កំពុងស៊ើបអង្កេតអតីតប្រធានាធិបតីរូបនេះ ពាក់ព័ន្ធនឹងករណីដែលត្រូវបានចោទប្រកាន់លោកនៅក្នុងគម្រោងចាយលុយបំបិទមាត់ និងការបិទបាំងពាក់ព័ន្ធនឹងតារាភាពយន្តអាសអាភាសនាង Stormy Daniels កាលពីឆ្នាំ២០១៦ អំឡុងយុទ្ធនាការបោះឆ្នោតប្រធានាធិបតី។

ដំណើរការរបស់គណៈវិនិច្ឆ័យគឺជារឿងសម្ងាត់ ប៉ុន្តែប្រភពដែលដឹងពីករណីនេះបានប្រាប់ CNN ថាសាក្សីម្នាក់បានផ្តល់សក្ខីកម្មប្រហែល៣០ នាទីមុនពេលបោះឆ្នោតចោទប្រកាន់លើលោក Trump។

លោក Trump បានចេញសេចក្តីថ្លែងការណ៍មួយ ឆ្លើយតបទៅនឹងការចោទប្រកាន់នេះ ដោយអះអាងថា វាគឺជា ការធ្វើទុក្ខបុកម្នេញផ្នែកនយោបាយ និងការជ្រៀតជ្រែកការបោះឆ្នោត នៅកម្រិតខ្ពស់បំផុតក្នុងប្រវត្តិសាស្ត្រ៕