អន្ដរជាតិ៖ យោងតាមក្រុមមន្ត្រី និងសេចក្ដីរាយការណ៍របស់សារព័ត៌មាននានា ព្យុះដ៏ខ្លាំងក្លាមួយដែលបានបក់នាំមកជាមួយនូវខ្យល់ និងភ្លៀងធ្លាក់ខ្លាំង បានបោកបក់ពាសពេញភាគខាងត្បូង និងតំបន់Midwest នៃសហរដ្ឋអាមេរិក ខណៈព្យុះនេះបានបោះពួយទៅកាន់ភាគខាងកើតកាលពីថ្ងៃសៅរ៍ទី១មេសា ឆក់យកជីវិតមនុស្ស ១៨នាក់ និងជាច្រើននាក់រងរបួស។

យោងតាមក្រុមមន្ត្រី មនុស្សយ៉ាងហោចណាស់ ៥នាក់ បានស្លាប់នៅក្នុងរដ្ឋArkansas ខណៈក្រុមបុគ្គលិកពន្លត់អគ្គិភ័យបានជីកកកាយតាមគំនរកម្ទេចថ្ម តាមរកក្រែងមានជនរងគ្រោះបន្ថែមទៀត ក្រោយព្យុះកំណាចវាយប្រហារពាសពេញរដ្ឋនេះ កាលពីថ្ងៃសុក្រ។

ក្រុមមន្ត្រី ក៏បានរាយការណ៍ផងដែរថា មានមនុស្សម្នាក់បានស្លាប់នៅក្នុងរដ្ឋ Illinois និង៣នាក់ នៅរដ្ឋ Indiana ស្របពេល ដែលសារព័ត៌មានក្នុងស្រុក បាននិយាយកាលពីថ្ងៃសៅរ៍ថា មានមនុស្ស៧នាក់ស្លាប់នៅក្នុងតំបន់ McNairy នៃរដ្ឋ Tennessee នៅព្រំដែនជាមួយរដ្ឋ Mississippi។

សារព័ត៌មាន Fox News បានរាយការណ៍ថាមនុស្សម្នាក់បានស្លាប់នៅក្នុងរដ្ឋ Alabama និងម្នាក់ទៀតនៅរដ្ឋMississippi។

យោងតាមមន្ទីរព្យាករណ៍អាកាសធាតុ គេរំពឹងថា នឹងមានភ្លៀង និងខ្យល់បោកបក់នៅក្នុងរដ្ឋ Ohio ភាគខាងកើត និងតំបន់ផ្សេងៗនៃរដ្ឋ West Virginia៕