អ៊ីរ៉ង់៖ វីដេអូដែលត្រូវបានចែករំលែកតៗគ្នាពេញបណ្ដាញសង្គម អំពីបុរសម្នាក់ចាក់ទឹកដោះគោជូរលើក្បាលស្ត្រី ២នាក់ដែលពុំបានប្រើក្រមារុំក្បាលគឺម្ដាយ និងកូនស្រី នៅហាងលក់គ្រឿងទេសមួយកន្លែងក្នុងប្រទេសអ៊ីរ៉ង់ បានបង្កឲ្យមានការថ្កោលទោសពីស្ត្រីៗជនជាតិអ៊ីរ៉ង់កាលពីថ្ងៃអាទិត្យ។
នៅក្នុងរដ្ឋធានីតេអេរ៉ង់របស់អ៊ីរ៉ង់ យុវតីវ័យ ១៦ឆ្នាំឈ្មោះ Melika បាននិយាយថា នេះមិនមែនជាតួនាទីរបស់បុរសដែលត្រូវប្រឈមជាមួយស្ត្រី ដោយសារតែការមិនប្រើស្បៃរុំក្បាលតាមច្បាប់ហ៊ីចាប់(hijab) អ៊ីស្លាមនោះទេ។ អ្នកមិនអាចយកកំប៉ុងទឹកដោះគោរជូរជះលើក្បាលស្ត្រី ហើយគិតថាអ្នកបានធ្វើរឿងដ៏អស្ចារ្យ ហើយណែនាំនរណាម្នាក់ក្នុងគោលដៅត្រឹមត្រូវនោះឡើយ។ វាជារឿងបុគ្គល។ នាងគ្រាន់តែចង់ស្លៀកពាក់អ្វីដែលនាងចង់តែប៉ុណ្ណោះ។ វាមិនមែនជារឿងរបស់អ្នកណាម្នាក់នោះឡើយ។ ប៉ុន្តែបន្ទាប់ពីការវាយប្រហារ លោកប្រធានាធិបតី Ebrahim Raisi បានបញ្ជាក់ជាថ្មីថា ការស្លៀកពាក់តាមច្បាប់ហ៊ីចាប់គឺជាច្បាប់នៅក្នុងប្រទេសអ៊ីរ៉ង់ ដោយបន្ថែមថា ប្រសិនបើមានគេនិយាយថា ពួកគេមិនជឿលើច្បាប់ហ៊ីចាប់ទេ រឿងល្អដែលត្រូវធ្វើគឺប្រើវិធីបញ្ចុះបញ្ចូល។
ការកើនឡើងចំនួនស្ត្រីបានផ្គើននឹងអាជ្ញាធរដោយការបោះចោលស្បៃ ឬក្រមារុំមុខរបស់ពួកគេ បន្ទាប់ពីការតវ៉ាទូទាំងប្រទេសបន្ទាប់ពីការស្លាប់របស់ស្ត្រីជនជាតិអ៊ីរ៉ង់វ័យ ២២ឆ្នាំម្នាក់ក្រោមការខ្លួនពីនគរបាលសីលធម៌ពីបទចោទប្រកាន់ថា បានបំពានលើច្បាប់ហ៊ីចាប់។ ក្រុមអាជ្ញាធរតុលាការបានចេញដីកាចាប់ខ្លួនបុរសរូបនោះ ហើយសារព័ត៌មានរដ្ឋនិយាយថា ស្ត្រីទាំង ២នាក់នោះក៏ជាមុខសញ្ញានៃកាចេញដីកាចាប់ខ្លួនផងដែរ ពីបទមិនយកចិត្តទុកដាក់ទៅនឹងច្បាប់ស្លៀកពាក់របស់ស្ត្រីដ៏តឹងរ៉ឹងរបស់អ៊ីរ៉ង់។ ចំណែកបុរសជាម្ចាស់ហាងគ្រឿងទេសដែលបានរុញអ្នកវាយប្រហារចេញពីហាងរបស់លោក ក្រុមអាជ្ញាធរបាននិយាយថា លោកត្រូវបានព្រមានពីបទប្រឈមតតាំងនឹងបុរស។ សេចក្ដីរាយការណ៍នានារបស់សារព័ត៌មានបាននិយាយថា ហាងរបស់លោកត្រូវបានបិទ តែលោកត្រូវបានទីភ្នាក់ងារសារព័ត៌មានក្នុងស្រុកដកស្រង់សម្ដីដោយនិយាយថា អាជ្ញាធរបានអនុញ្ញាតឲ្យលោកបើកហាងវិញ និងគ្រោងផ្ដល់ការបំភ្លឺដល់តុលាការ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
