ភ្នំពេញ៖ សកលវិទ្យាល័យភូមិន្ទវិចិត្រសិល្បៈ បានរៀបចំពិព័រណ៍ទេពកោសល្យ ​និងស្នាដៃនិស្សិត ចាប់​ពីថ្ងៃទី១ ដល់ថ្ងៃទី៣ ខែមេសា ​ដោយមានបង្ហាញស្នាដៃទម្រង់ស្ថាបត្យកម្ម របាំ ល្បែង សិល្បៈ​ប្រជាប្រិយ​បុរាណ​សម័យ​របស់ខ្មែរ ​មានភាពល្អប្លែកជាងបណ្តាឆ្នាំកន្លងមក និង​ទាក់ទាញ​ទេសចរជាតិ និងអន្តរជាតិ ចូលទស្សនាប្រមាណជាតិ ១ម៉ឺននាក់ ក្នុងរយៈពេល២ថ្ងៃមកនេះ។

ប្រធានគណៈកម្មការៀបចំ​ពិព័រណ៍ទេពកោសល្យ ​និងស្នាដៃនិស្សិត​ កញ្ញា សិទ្ធ សុវណ្ណនី លើកឡើង​នៅថ្ងៃទី៣ ខែមេសានេះថា ​នៅថ្ងៃទី១នៃ​ពិព័រណ៍​ទេពកោសល្យ ​និង​ស្នាដៃនិស្សិត ទទួល​បានភ្ញៀវជាតិអន្តរជាតិចូលទស្សនាជាង ​៣០០០នាក់ ​និងនៅថ្ងៃទី២ទទួលភ្ញៀវជាតិ​អន្តរជាតិ​ចូលទស្សនា កើនជិត៦០០០នាក់​រហូតធ្វើឲ្យក្រុមយុវជនបិទទ្វារយប់​ទទួលភ្ញៀវចូលទស្សនា​នៅ​ពេលយប់។

កញ្ញា សិទ្ធ សុវណ្ណនី ថ្លែងថា គ្រប់ភ្ញៀវជាតិអន្តរជាតិ​ ដែលចូលទស្សនាភាគច្រើន មានការចាប់​អារម្មណ៍​ច្រើន​លើ​លទ្ធផលការសិក្សា ​និងស្នាដៃ​ទម្រង់សិល្បៈស្ថាបត្យកម្មខ្មែរជាច្រើន​ទម្រង់ មក​ពី​បណ្តាមហាវិទ្យាល័យទំាង៥​ និង​ការតាំង​ពិព័រណ៍​ និង​សម្ដែង​សិល្បៈ ​លេងល្បែង​ប្រជាប្រិយ​ខ្មែរ​ជាច្រើន​ទម្រង់ទៀត។

ភ្ញៀវជាតិអន្តរជាតិដែលបាន​ចូលរួម​ទស្សនា​ពិព័រណ៍នេះ ​បាន​ថ្លែង​ការ​កោតសរសើរ​ចំពោះស្នា​ដៃ​វប្បធម៌សិល្បៈបុរាណ សម័យ ​ដែលកូន​ខ្មែរអាចធ្វើបាន ​និង​ភាពល្អបែ្លក ​និងទាក់ទាញខ្លាំង។

សូម​បញ្ជាក់ថា ពិព័រណ៍ទេពកោសល្យស្នាដៃនិស្សិតសាកលវិទ្យាល័យ​ភូមិន្ទវិចិត្រសិល្ប: បាន​ធ្វើ​ឡើង​ក្រោម​ប្រធាន​បទ «មរតកទាំង៥ ឆ្នាំ២០២៣»​ ដើម្បី​អបអរសាទរពិធី​ចូលឆ្នាំថ្មី​ប្រពៃណីជាតិ​ខ្មែរ និងចង់បង្ហាញពីស្នាដៃលទ្ធផលសិក្សារបស់និស្សិតទាំង៥ មហាវិទ្យាល័យនៃសាកលវិទ្យាល័យ​ភូមិន្ទវិចិត្រសិល្បៈ ឱ្យមហាជន​ទូទៅបានឃើញ នូវស្នាដៃ​ទាក់ទង​ជាមួយនឹងសិល្បៈខ្មែរ​គ្រប់​ទម្រង់ទាំងអស់ របស់ខ្មែរ៕ អត្ថបទ ស៊ុម សុខជា