កំពង់ឆ្នាំង៖ នៅថ្ងៃនេះ កងទ័ពកម្ពុជា-ចិន ធ្វើលំហាត់សាកល្បងរួមគ្នា ដើម្បីត្រៀម​ពិធី​បិទ​សមយុទ្ធ​នាគមាស​ឆ្នាំ២០២៣ នៅថ្ងៃទី៥ ខែមេសានេះ បន្ទាប់ពីបានធ្វើសមយុទ្ធរួមគ្នា​រយៈពេល ១៤ថ្ងៃ នៅមជ្ឈមណ្ឌលហ្វឹកហ្វឺនរបស់កងរាជអាវុធហត្ថ (ភ្នំជុំសែនរីករាយ) ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង។

នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពល​ខេមរភូមិន្ទ នៅថ្ងៃទី៣ ខែមេសា ឆ្នាំ២០២៣ បានអញ្ជើញពិនិត្យលំហាត់សាកល្បង ដើម្បីត្រៀម​ពិធីបិទសមយុទ្ធនាគមាសឆ្នាំ២០២៣ រវាងកងទ័ពកម្ពុជា-ចិន ខណៈថ្ងៃទី៥ខែមេសានេះ សម្តេច​ពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នឹងអញ្ជើញក្នុងពិធីបិទ​សមយុទ្ធ។

នាឱកាសនោះ នាយឧត្តមសេនីយ៍ ឥត សារ៉ាត់ ជួបសំណេះសំណាលជាមួយកងទ័ព​ប្រទេស​ទាំងពីរ និងថ្លែងអំណរគុណចំពោះការយកចិត្តទុកដាក់រយៈពេល​ច្រើនក្នុងសមយុទ្ធនាគមាស​ឆ្នាំ២០២៣នេះ ឡើងដើម្បីផ្លាស់ប្តូរបទពិសោធគ្នាទៅវិញទៅមក និងដើម្បី លើកកម្ពស់សមត្ថភាព​កងទ័ពកម្ពុជា ពុំមែនធ្វើឡើងក្នុងគោលបំណង គំរាមកំហែង ដល់នរណា ឬប្រទេសណាឡើយ។

នាយឧត្តមសេនីយ៍ ឥត សារ៉ាត់ បញ្ជាក់ថា សមយុទ្ធនេះ គឺជាការផ្សារភ្ជាប់កិច្ចសហប្រតិបត្តិការរវាង​កងទ័ព​ប្រទេសទាំងពីរ ក្នុងការលើកកម្ពស់ទំនាក់ទំនងល្អ ​បង្កើនចំណងសាមគ្គីភាព មេត្រីភាព ការ​បណ្ដុះបណ្តាល ចំណេះដឹង ​ចំណេះធ្វើ ផ្លាស់ប្ដូរបទពិសោធន៍ ​ចេះសម្របសម្រួល ចេះរស់នៅនិង​ធ្វើការងារ រួមគ្នា ជាមួយជាតិសាសន៍ជាច្រើនក្នុងពេលធ្វើប្រតិបត្តិការរួមគ្នា ​ក៏ដូចជាឆ្លើយតប ទៅនឹងបញ្ហាប្រឈមនានាដែលមិនមែនជាប្រពៃណីជាដើម។

នាយឧត្តមសេនីយ៍ ឥត សារ៉ាត់ បញ្ជាក់ទៀតថា សមយុទ្ធក្នុងឆ្នាំនេះ គឺជាការទទួលបានបទ​ពិសោធន៍​ថ្មី​បន្ថែមទៀតរបស់កម្ពុជា ដើម្បីត្រៀមឲ្យដំណើរការ​ព្រឹត្តិការណ៍ធំៗ​ដែលកម្ពុជា​ធ្វើជាម្ចាស់ផ្ទះ​ស៊ីហ្គេម ​និងប៉ារ៉ាហ្គេម​ទទួលបានជោគជ័យ៕