​រុស្ស៊ី៖ ដីកា​ចាប់ខ្លួន​អន្តរជាតិ​សម្រាប់​ប្រធានាធិបតី​រុស្ស៊ី​លោក វ្ល៉ាឌីមៀ ពូទីន បាន​កើន​ឡើង​ពី​ការ​រំពឹង​ទុក​ ចំពោះ​ប្រទេស​របស់​លោក​ដែល​បាន​វាយ​លុក​លើ​អ៊ុយក្រែន កំពុង​តែ​ប្រឈម​មុខ​នឹង​យុត្តិធម៌ ប៉ុន្តែ​វា​ធ្វើ​ឱ្យ​ស្មុគស្មាញ​ដល់​កិច្ច​ខិតខំ​ប្រឹងប្រែង​ ដើម្បី​បញ្ចប់​សង្គ្រាម​នៅ​ក្នុង​កិច្ចចរចា​សន្តិភាព​។

ទាំង​យុត្តិធម៌ និង​សន្តិភាព​ទំនងជា​មានលទ្ធភាព​នៅ​ដាច់​ឆ្ងាយ​នា​ពេល​បច្ចុប្បន្ន​នេះ ហើយ​ទំនាក់​ទំនង​ជម្លោះ​រវាង​ប្រទេស​ទាំង២ ​គឺជា​ភាព​អល់អែក​នៅ​ចំណុច​កណ្តាល​នៃ​សេចក្តី​សម្រេច​កាលពី​ថ្ងៃទី​១៧ ខែមីនា ដោយ​តុលាការ​ព្រហ្មទណ្ឌ​អន្តរជាតិគឺ​ដើម្បី​ស្វែងរក​ការ​ចាប់​ខ្លួន​មេដឹកនាំ​រុស្ស៊ី​។ ចៅ​ក្រម​នៅ​ទីក្រុង​ឡាអេ​បាន​រក​ឃើញ​ភស្តុតាង​សម​ហេតុផល​ក្នុង​ការ​ជឿ​ថា លោក ពូ​ទីន និង​ស្នងការ​ទទួលបន្ទុក​សិទ្ធិ​កុមារ​របស់​លោក​ ទទួលខុសត្រូវ​ចំពោះ​ឧក្រិដ្ឋកម្ម​សង្គ្រាម ជាពិសេស​ការ​និរទេស ​និង​ការផ្ទេរ​កុមារ​ដោយ​ខុសច្បាប់​ ពី​តំបន់​គ្រប់គ្រង​របស់​អ៊ុយ​ក្រែ​ន​ទៅកាន់​ប្រទេស​រុស្ស៊ី​។​

​មេដឹកនាំ​សហភាព​អឺរ៉ុប​លោកស្រី Ursula von der Leyen បាន​និយាយ​កាលពី​ថ្ងៃ​សុក្រ​ក្នុង​សុន្ទរកថា​មួយ ​ដើម្បី​ប្រារព្ធ​ខួប​មួយ​ឆ្នាំ​នៃ​ការ​រំដោះ​ទីក្រុង Bucha ជាទី​ក្រុង​របស់​អ៊ុយ​ក្រែ​ន​ដែល​បាន​មើល​ឃើញ​អំពើ​ឃោរឃៅ​មួយ​ចំនួន​នៅ​ក្នុង​សង្គ្រាម​នោះ​ថា វា​នឹង​គ្មាន​ការ​រត់​គេចខ្លួន​សម្រាប់​អ្នក​ប្រព្រឹត្ត និង​បក្ខពួក​របស់​លោក​ទេ​។ ឧក្រិដ្ឋជន​សង្គ្រាម​នឹង​ត្រូវ​ទទួលខុស​ត្រូវ​ចំ​ពោះ​ទង្វើ​របស់​ពួកគេ​។​ លោក Daniel Krcmaric សាស្ត្រាចារ្យ​រង​ផ្នែក​វិទ្យាសាស្ត្រ​នយោបាយ​នៅ​សាកលវិទ្យាល័យ Northwestern បាន​និយាយ​តាម​អ៊ីម៉េល​ទៅកាន់​សារព័ត៌មាន The Associated Press ថា​ ដីកា​ចាប់ខ្លួន​លោក ពូ​ទីន អាច​នឹង​ធ្វើ​ឲ្យ​អន្តរាយ​ដល់​កិច្ចប្រឹងប្រែង ​ដើម្បី​ឈាន​ដល់​កិច្ចព្រមព្រៀង​សន្តិភាព​នៅ​អ៊ុយក្រែ​ន​៕

អត្ថបទ៖ ប៊ុនថន