អាមេរិក៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា លោកនឹងសប្បាយចិត្តនៅពេលដែលកូរ៉េខាងជើង បន្តផ្អាកការសាកល្បងអាវុធនុយក្លេអ៊ែររបស់ពួកគេ ហើយលោកក៏មិនប្រញាប់ប្រញាល់ខ្លាំងនោះដែរ ក្នុងការសម្រេចបានកិច្ចព្រមព្រៀងនុយក្លេអ៊ែរជាមួយមេដឹកនាំរបស់ពួកគេ គឺលោក គីម ជុងអ៊ុន ពេលដែលពួកគេទាំង២ មាននូវជំនួបកំពូលលើកទី២ ក្នុងសប្ដាហ៍នេះ។
លោក ត្រាំ និងលោក គីម នឹងជួបគ្នាក្នុងទីក្រុងហាណូយនាថ្ងៃពុធ និងថ្ងៃព្រហស្បតិ៍ខាងមុខនេះ រយៈពេល ៨ខែក្រោយជំនួបជាប្រវត្តិសាស្ត្ររបស់ពួកគេក្នុងប្រទេសសិង្ហបុរី ដែលជាជំនួបលើកដំបូងរវាងប្រធានាធិបតីសហរដ្ឋអាមេរិកកាន់តំណែង និងមេដឹកនាំកូរ៉េខាងជើង។ នៅទីនោះពួកគេបានសន្យាធ្វើការឆ្ពោះទៅរក ការរំសាយអាវុធនុយក្លេអ៊ែរនៅតំបន់ឧបទ្វីបកូរ៉េ ប៉ុន្តែកិច្ចព្រមព្រៀងមិនច្បាស់លាស់របស់ពួកគេ សម្រេចបានលទ្ធផលតិចតួចប៉ុណ្ណោះ។ សមាជិកព្រឹទ្ធសភាសហរដ្ឋអាមេរិកមកពីគណបក្សប្រជាធិបតេយ្យ និងក្រុមមន្ត្រីសន្តិសុខបានធ្វើការព្រមានថា លោក ត្រាំ ប្រឆាំងនឹងការទទួលយកកិច្ចព្រមព្រៀង ដែលនឹងធ្វើរឿងតិចតួចដើម្បីទប់ស្កាត់មហិច្ឆតានុយក្លេអ៊ែររបស់កូរ៉េខាងជើង។
ពេលដែលលោក គីម ធ្វើដំណើរតាមរថភ្លើងឆ្លងកាត់ប្រទេសចិន ដើម្បីទៅចូលរួមជំនួបកំពូលនោះ សារព័ត៌មានកូរ៉េខាងជើងបានធ្វើការក្រើនរំឭក លោក ត្រាំ កាលពីថ្ងៃអាទិត្យថា លោកមិនត្រូវស្ដាប់សម្ដីអ្នករិះគន់សហរដ្ឋអាមេរិក ដែលកំពុងបង្អាក់ដល់កិច្ចខិតខំធ្វើឲ្យល្អប្រសើរឡើង នូវទំនាក់ទំនងប្រទេសទាំង២៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
