ភ្នំពេញ៖ នៅថ្ងៃទី៤ ខែមេសានេះ ក្រសួងពាណិជ្ជកម្ម បានរៀបចំ​សន្និសីទ​អ្នកប្រើប្រាស់ថ្នាក់ជាតិ​ឆ្នាំ២០២៣​ ក្រោមប្រធានបទ «ពង្រឹងសិទ្ធិអំណាចអ្នកប្រើប្រាស់ដើម្បីជំរុញការអនុវត្ត​ដោយសុចរិត​លើទីផ្សារ»នៅរាជធានីភ្នំពេញ។

ឯកឧត្តម ប៉ាន់ សូរសក្តិ រដ្ឋមន្ត្រីក្រសួងពាណិជ្ជកម្ម ថ្លែងថា បច្ចុប្បន្ន ដោយសារមានអភិវឌ្ឍន៍​ប្រព័ន្ធ​បច្ចេកវិទ្យា និងសេដ្ឋកិច្ចឌីជីថល​ ទម្រង់អាជីវកម្មថ្មីៗជាច្រើន ​បានបង្កើតឡើង ​បានធ្វើឲ្យមានការ​ធ្វើធុរៈកិច្ចមិនសុច្ចរិតមួយចំនួន​ពិបាកស្វែងរកបទល្មើស​ និងដោះស្រាយ ដើម្បីការពារសិទ្ធ​អំណាច​អ្នកប្រើប្រាស់នានា។

ឯកឧត្តមរដ្ឋមន្ត្រី ប៉ាន់ សូរសក្តិ បន្តថា បច្ចុប្បន្ន កម្ពុជាបានបង្កើតច្បាប់ការប្រកួតប្រជែង ច្បាប់​សុវត្ថិភាព​ម្ហូបអាហារ​ច្បាប់ធ្វើពាណិជ្ជកម្ម ​តាមប្រព័ន្ធអេឡិចត្រូនិច និងមានច្បាប់លិខិតបទដ្ឋាន​គតិយុត្តិពាក់ព័ន្ធ ​សម្រាប់អនុវត្ត​ការពារសិទ្ធអ្នកប្រើប្រាស់ ​ការពារសុវត្ថិភាពអ្នកប្រើប្រាស់ លើក​កំពស់​សុខភាព ពង្រឹងស្តង់ដារទំនិញ និងសេវាកម្ម​លើកកំពស់​ការប្រកួតប្រជែង ការធ្វើទីផ្សារ​ប្រកប​ដោយ​សុចរិត។

ក្រសួងក៏បានផ្សព្វផ្សាយឲ្យអ្នកប្រើប្រាស់ទាំងឡាយយល់ដឹង ​សំដៅជំរុញធ្វើទីផ្សារឱ្យមាន​សុចរិត​ភាព តម្លាភាព ទំនួល​ខុស​ត្រូវខ្ពស់ ​និង​បង្កើន​ទំនុកចិត្តក្នុងធុរកិច្ច ​ដែលធ្វើឱ្យប្រសើរឡើង​នូវ​ប្រសិទ្ធភាព​សេដ្ឋកិច្ច។

ឯកឧត្តម ផាន អូន ប្រតិភូរាជរដ្ឋាភិបាលកម្ពុជា​ទទួលបន្ទុកជាអគ្គនាយកដ្ឋានការពារអ្នកប្រើប្រាស់ កិច្ចការ​ប្រកួតប្រជែង ​និង​បង្ក្រាប​ការក្លែងបន្លំ ​«ក.ប.ប.» បានថ្លែង ​ជំរុញអ្នកប្រើប្រាស់ទាំងអស់​ត្រូវតែ​សម្ដែង​មតិពាក់ព័ន្ធ​នឹងកិច្ចការពារអ្នក​ប្រើប្រាស់​ស្រប​ទៅតាមច្បាប់​ ខណៈបច្ចុប្បន្ន កម្ពុជា​មាន​ច្បាប់​គ្រប់គ្រាន់ ក្នុងការដាក់ទោស​ការការពារសិទ្ធអំណាចអ្នកប្រើប្រាស់ ​និង​ការ​ធ្វើ​អាជីវកម្ម​ដោយ​សុចរិត៕ អត្ថបទ ស៊ុម សុខជា