អាមេរិក ៖ អតីតប្រធានាធិបតីសហរដ្ឋអាមេរិកលោក Donald Trump បានពិគ្រោះយោបល់ជាមួយក្រុម មេធាវីរបស់លោក នៅប៉មអគារ Trump Tower ស្ថិតក្នុងទីក្រុង New York ស្របពេលដែលរូបលោកប្រឈមនឹងការចោទប្រកាន់បទព្រហ្ម ទណ្ឌបង្កើតប្រវត្តិសាស្រ្ត ។ 

លោកស្ថិតក្រោមការស៊ើបអង្កេតលើផ្រល់ប្រាក់១៣ម៉ឺនដុល្លារឲ្យទៅតារាភាពយន្តអាភាសដែលនាងនិយាយថា ពួកគេធ្លាប់មានសម្ព័ន្ធផ្លូវភេទជាមួយគ្នា មុនពេលការបោះឆ្នោតឆ្នាំ ២០១៦ ។ 

លោកបានច្រានចោលរាល់កំហុសឆ្គងទាំងអស់ ។ វិធានការសន្តិសុខបានដាក់បន្ថែម ពេលដែលក្រុមអាជ្ញាធ​ររំពឹងថា​នឹង​មានបាតុកម្មនៅក្រៅតុលាការ Manhattan នាថ្ងៃអង្គារនេះ ។

 លោក Trump វ័យ ៧៦ឆ្នាំ គឺជាអតីតប្រធានាធិបតីសហរដ្ឋអាមេរិកលើកដំបូងគេ ដែលប្រឈមនឹងករណីព្រហ្មទណ្ឌ ។ 

អ្នកសាធារណរដ្ឋរូបនេះ បានសរសេរនៅលើបណ្តាញព័ត៌មានសង្គម Truth របស់លោកថា “ការតាមទម្លាក់​កំហុស”​គឺមុនពេលដែលរូបលោកធ្វើដំណើរចេញពីផ្ទះរបស់លោកនៅរដ្ឋ Florida ទៅកាន់រដ្ឋ New York កាលពីថ្ងៃចន្ទ ។ 

នៅព្រឹកថ្ងៃអង្គារនេះ ត្រូវនឹងពេលយប់នៅកម្ពុជា គេរំពឹងថា ក្រុមនគរបាល និងក្រុមមន្រ្តីតុលាការ ក៏ដូចជាក្រុមភ្នាក់ងារសេវាកម្មសម្ងាត់ នឹងអមដំណើរលោក Trumpឆ្លងកាត់ផ្លូវនៅ New York ទៅកាន់បរិវេណតុលាការ Manhattan ។ 

ការចោទប្រកាន់ដែលលោកប្រឈមនឹងបញ្ចេញឲ្យដឹងទាំងអស់អំឡុងសវនាការ ដែលកំណត់ធ្វើឡើងនៅវេលាម៉ោង ២ និង ១៥នាទីរសៀល ម៉ោងនៅអាមេរិក(ត្រូវនឹងម៉ោង ៧ និង ១៥នាទីម៉ោងសកល ហើយត្រូវនឹងម៉ោង ១២ និង ១៥នាទីយប់ ម៉ោងនៅកម្ពុជា ) ។ ក្រុមមេធាវីរបស់លោកនិយាយរួចហើយថា លោកនឹងឆ្លើយមិនព្រម​ទទួលទោសនោះទេ ៕ អត្ថបទ ៖ សារ៉ាត់