ភ្នំពេញ៖ក្នុងនាមសម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃ ព្រះរាជាណាចក្រកម្ពុជា និង​ជា​ប្រធាន​អាជ្ញាធរមីន ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី៤ខែមេសានេះ បានដឹកនាំ​កិច្ចប្រជុំក្រុមការងារបច្ចេកទេសចម្រុះរាជរដ្ឋាភិបាល ដៃគូអភិវឌ្ឍន៍ផ្សេងៗ ក្នុងគោលបំណង​បង្ហាញពីវឌ្ឍនភាព​ការងារបោសសម្អាតមីនប្រចាំឆ្នាំ ផែនការសកម្មភាពបន្ត និងការតាំងចិត្តរបស់​ដៃគូអភិវឌ្ឍន៍​ក្នុងការចូលរួម​ជា​មួយ​រាជរដ្ឋាភិបាលលើការងារបោសសម្អាតមីន ដើម្បីឈានទៅសម្រេចគោលដៅកម្ពុជាគ្មានមីនឆ្នាំ២០២៥​ពិធីនេះ​ប្រារព្ធ​ធ្វើឡើង​នៅសណ្ឋាគារសុខាភ្នំពេញ។

នៅក្នុងឱកាសនោះ ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណចំពោះការគាំទ្រដ៏សប្បុរស និងកិច្ចខិតខំ​ប្រឹងប្រែងរបស់ក្រសួង-ស្ថាប័នពាក់ព័ន្ធ ប្រទេសជាមិត្ត ដៃគូអភិវឌ្ឍន៍ ប្រតិបត្តិករ វិស័យឯកជន និងអង្គការនានា ដែលបានផ្តល់នូវការគាំទ្រដល់សកម្មភាពមីន និងការអភិវឌ្ឍសេដ្ឋកិច្ចសង្គមនៅកម្ពុជា ព្រមទាំងបាន​បង្ហាញពី​ចំណាប់អារម្មណ៍ និងការប្តេជ្ញាចិត្តខ្ពស់ក្នុងការសម្រេចឲ្យកម្ពុជាគ្មានមីននៅឆ្នាំ២០២៥។ ការគាំទ្រទាំងនេះ ពិតជា​បានធ្វើឱ្យមានភាពខុសប្លែកគ្នាយ៉ាងខ្លាំងចំពោះសុខសុវត្ថិភាព សន្តិសុខ និងជីវភាពរស់​នៅរបស់ប្រជាជន​កម្ពុជា​ដែលងាយរងគ្រោះបំផុត និងកំពុងរស់នៅក្នុងសហគមន៍ដែលរងផលប៉ះពាល់​ដោយសារសំណល់​ជាតិផ្ទុះ​ពីសង្រ្គាម ហើយសមិទ្ធិផលសេដ្ឋកិច្ច-សង្គមដ៏គួរឲ្យកត់សម្គាល់បែបនេះ មិនអាចសម្រេចបានឡើយ ប្រសិនបើគ្មាន​សន្តិភាពពេញផ្ទៃប្រទេស ក្រោមការដឹកនាំប្រកបដោយកិត្តិបណ្ឌិតរបស់ សម្តេចតេជោ នាយករដ្ឋមន្រ្តី។

ឯកឧត្តមទេសរដ្ឋមន្រ្តីបានលើកឡើងថា សកម្មភាពមីនមនុស្សធម៌ រយៈពេល ៣០ឆ្នាំនេះ មិនត្រឹមតែ​ចូលរួម​ដល់កិច្ចគាំពារសន្តិភាព និងសន្តិសុខប៉ុណ្ណោះទេ វាថែមទាំងបានចូលរួមដល់ការកាត់បន្ថយភាពក្រីក្រ និងការអភិវឌ្ឍនៅកម្ពុជា តាមរយៈការប្រើប្រាស់ដីប្រកបដោយសុវត្ថិភាព ក្នុងទំហំផ្ទៃដីបោសសម្អាតរួចចំនួន ២.៥៧៩ គីឡូម៉ែត្រក្រឡា ក្នុងនោះផ្ទៃដីប្រមាណ ៧៦ % ត្រូវបានប្រើប្រាស់សម្រាប់សកម្មភាពកសិកម្ម។

រយៈពេល ៦ ឆ្នាំចុងក្រោយនេះ កម្ពុជាបានរំដោះផ្ទៃដីមានមីន និងសំណល់ជាតិផ្ទុះពីសង្រ្គាម បានជាងមួយភាគបី នៃផ្ទៃដីបោសសម្អាតរួចក្នុងរយៈពេល ៣០ឆ្នាំ។ ជាមួយគ្នានេះ រយៈពេល ៣ឆ្នាំចុងក្រោយ ២០២០-២០២២ កម្ពុជាបានរំដោះផ្ទៃដីមានមីនចំនួន ៤២០ គីឡូម៉ែត្រក្រឡា ស្មើនឹងពាក់កណ្តាល​នៃការងារបោសសម្អាត​មីន​មនុស្សធម៌របស់រដ្ឋភាគីចំនួន ៣៣ ប្រទេសនៃអនុញ្ញាអូតាវ៉ា ដែលកំពុងតែប្រឈម និងប្រតិបត្តិការ​បោស​សម្អាតមីន។

បើទោះបីមានកិច្ចខិតខំប្រឹងប្រែងយ៉ាងណាក្តី គិតត្រឹមត្រីមាសទី១ ឆ្នាំ២០២៣ កម្ពុជា នៅបន្តរងផលប៉ះពាល់​ដោយ​សារមីន និងសំណល់ជាតិផ្ទុះពីសង្រ្គាមលើផ្ទៃដីចំនួន ១.៨៨៥ គីឡូម៉ែត្រក្រឡា ក្នុងនោះផ្ទៃដីមានមីនចំនួន ៥៦៣ គីឡូម៉ែត្រក្រឡាដែលកម្ពុជាមានកាតព្វកិច្ចត្រូវបញ្ចប់ក្នុងឆ្នាំ២០២៥ ផ្ទៃដីមានគ្រាប់បែកចង្កោមចំនួន ៧២៩ គីឡូម៉ែត្រក្រឡា និងផ្ទៃដីមានយុទ្ធភណ្ឌមិនទាន់ផ្ទុះដទៃទៀតចំនួន ៥៩៣ គីឡូម៉ែត្រក្រឡា។

លើសពីនេះ ឯកឧត្តមទេសរដ្ឋមន្រ្តី បានបញ្ជាក់បន្ថែមថា ឆ្នាំ២០២៣ នេះ គឺជាឆ្នាំមួយដែលកម្ពុជាបាន​ដាក់ផែនការ​គ្រោងបោសសម្អាតមីនក្នុងទំហំផ្ទៃដីធំជាងគេរហូតដល់ ៤១១ គីឡូម៉ែត្រក្រឡា ដែលមានការគាំទ្រពី​គម្រោង​សម្តេចតេជោសម្រាប់សកម្មភាពមីន មូលនិធិកម្ពុជាគ្មានមីនឆ្នាំ២០២៥ និងដៃគូអភិវឌ្ឍន៍។ ផែនការនេះ បានកាត់​បន្ថយមកនៅត្រឹម ៣៥៦ គីឡូម៉ែត្រក្រឡា សម្រាប់ ៩ខែទៀតក្នុងឆ្នាំ២០២៣ បន្ទាប់ពីផ្ទៃដីមួយចំនួន​បានបោស​សម្អាត​​រួចក្នុងត្រីមាសទី១។ ដោយឡែកសម្រាប់ផែនការឆ្នាំ២០២៤-២០២៥ បន្តទៀត កម្ពុជាត្រូវការបោស​សម្អាត​មីនក្នុងទំហំផ្ទៃដីប្រមាណ ១៧៩ គីឡូម៉ែត្រក្រឡា និងត្រូវការថវិកាចំនួន ៤៦ លានដុល្លារអាមេរិក ក្នុងមួយឆ្នាំៗ។

ក្រោយឆ្នាំ២០២៥ កម្ពុជានៅត្រូវការ ការគាំទ្របន្ថែមទៀតពីដៃគូអភិវឌ្ឍន៍ និងសប្បុ រសជននានា ក្នុងដោះស្រាយ​បញ្ហាគ្រាប់បែកចង្កោម គ្រាប់យុទ្ធភណ្ឌមិនទាន់ផ្ទុះដទៃទៀត កិច្ចសង្រ្គោះជនរងគ្រោះ និងសកម្មភាពអប់រំ​យល់ដឹងអំពីហានិភ័យសំណល់ជាតិផ្ទុះពីសង្រ្គាម ជាដើម៕ អត្ថបទ ៖ សុភណ្ឌ