ប៉ៃលិន ៖ ក្រុមបាល់ទាត់តំណាងខេត្តប៉ៃលិនសូហ្វីយ៉ា បើកការប្រកួតពូល C កីឡាបាល់ទាត់ពានរង្វាន់​សម្តេចអគ្គមហាសេនាបតីតេជោ ហ៊ុន សែន លើកទី១៧ ពានថ្នាក់ខេត្តដោយធ្វើមិនបានល្អនោះទេ ចាញ់ក្រុមភ្ញៀវ ខេត្តឧត្តរមានជ័យ ០ទល់នឹង២ នៅវិទ្យាល័យហ៊ុន សែន ក្រុងទេពនិម្មិតប៉ៃលិន។

ជំនួបនេះតង់ទី១ ក្រុមភ្ញៀវឧត្តរមានជ័យដាក់សម្ពាធច្រើនទៅលើម្ចាស់ផ្ទះ រហូតដល់នាទីទី៣៧ ឧត្តរមានជ័យ​ផ្តើមនាំ​មុខដោយគ្រាប់បាល់ពិន័យ១១ម៉ែត្រ ដែលធ្វើបានសម្រេចដោយកីឡាករម្ចាស់អាវលេខ៧ ជា គ្រីត។

នៅតង់ទី២ ឧត្តរមានជ័យនៅតែមានប្រៀបជាងខេត្តម្ចាស់ផ្ទះប៉ៃលិន ហើយនាំមុខបន្ថែមមួយគ្រាប់ទៀត ធ្វើបានសម្រេច​ដោយកីឡាករដូរចូល សួង ស៊ីថា នៅនាទីទី៦៥។

នាទីដែលនៅសេសសល់ ប៉ៃលិនដាកសម្ពាធម្តងម្កាលដែរ ខណៈឧត្តរមានជ័យបន្ថែមសម្ពាធ ប៉ុន្តែគ្មានគ្រាប់​បាល់​បន្ថែមនោះទេ។

ចប់ការប្រកួត ខេត្តឧត្តរមានជ័យ ឈ្នះប៉ៃលិន ២ទល់នឹង០ ហើយមានបីពិន្ទុក្នុងដៃសម្រាប់ថ្ងៃបើកឆាកក្នុងពូល C។

ថ្ងៃជាមួយគ្នានោះដែរ យុវជនខេត្តបាត់ដំបងឈ្នះខេត្តបន្ទាយមានជ័យ ២ទល់នឹង១។ នាទីទី២៦ កីឡាករ ទូច គឹមឆាយ រកគ្រាប់បាល់នាំមុខឱ្យម្ចាស់ផ្ទះបាត់ដំបង ប៉ុន្តែ នាទីទី៥៧ កីឡាករ វុត ដេវិត ស៊ុតបញ្ចូលទីឱ្យ បន្ទាយមានជ័យតាមស្មើ ១ទល់នឹង១។ ៤នាទីមុនចប់ការប្រកួតកីឡា សាវុធ សុជា រកគ្រាប់ជ័យជំនះឱ្យបាត់ដំបង ឈ្នះ២ទល់១។

បាល់ទាត់ពានរង្វាន់សម្តេចតេជោ ថ្នាក់ខេត្ត២០២៣ នឹងដំណើរការដល់ថ្ងៃទី៧ ខែតុលា ឆ្នាំ២០២៣ ខណៈពានថ្នាក់ជាតិ​លេងនៅឆ្នាំ២០២៤៕