​អ៊ីស្រាអែល៖ សាក្សី​បាន​និយាយថា នគរបាល​​អ៊ីស្រាអែលបាន​វាយប្រហារ​លើ​អ្នក​គោរពបូជា​ច្រើន​នាក់​ នៅក្នុងបរិវេណ​វិហារ​ឥស្លាម Al-Aqsa នៅ​ទីក្រុង​ហ្សេ​រុយ​សា​ឡឹមនៅ​ព្រឹក​ព្រលឹម​ថ្ងៃ​ពុធ ទី​៥ ខែមេសា​នេះ ជា​អ្វីដែល​នគរបាល​អ៊ីស្រាអែល​បាន​និយាយថា គឺជា​ការឆ្លើយតប​ទៅនឹង​កុបកម្ម​។

អឌ្ឍចន្ទ​ក្រហម​ប៉ា​ឡេ​ស្ទី​នបាន​រាយការណ៍​ពី​ការរង​របួស ប៉ុន្តែ​ពុំបាន​បញ្ជាក់​លម្អិត​ថា​ មាន​មនុស្ស​ប៉ុន្មាន​នាក់​រងរបួស​នោះទេ​។ ស្ថាប័ន​នេះ​បាន​និយាយ​នៅ​ក្នុង​សេចក្តីថ្លែងការណ៍​ថា កងកម្លាំង​អ៊ីស្រាអែលកំពុង​រារាំង​ក្រុមគ្រូពេទ្យ​របស់ខ្លួន​មិន​ឲ្យ​ចូល​ទៅដល់​វិហារ​អ៊ីស្លាម​។ នគរបាល​អ៊ីស្រាអែលនិយាយ​នៅក្នុង​សេចក្តីថ្លែងការណ៍ថា ពួកគេ​ត្រូវ​បង្ខំចិត្ត​ដើម្បី​ចូលទៅក្នុង​បរិវេណ​នោះ​ បន្ទាប់ពីអ្នកបង្ក​ចលាចល​ដែល​ពាក់​ម៉ាស់បាន​ចាក់សោ​ខ្លួនឯង​នៅ​ខាងក្នុង​វិហារ ​ដោយមាន​កាំជ្រួច​ភ្ញី ដំបង និង​ដុំថ្ម​។​ ​សេចក្តីថ្លែងការណ៍​និយាយថា នៅពេល​នគរបាល​បាន​ចូលទៅ មានការ​គប់​មក​លើ​ពួកគេ ហើយ​កាំជ្រួចត្រូវបាន​ដុត​ចេញពី​ខាងក្នុង​វិហារដោយ​ក្រុម​អ្នកបង្ក​ចលាចល ហើយ​មន្ត្រីនគរបាល​ម្នាក់​បាន​រងរបួសជើង​។

អំពើ​ហឹ​ង្សា​នៅ​តំបន់ West Bank និង​ទីក្រុង​ហ្សេ​រុយ​សា​ឡឹមបាន​កើនឡើង​ក្នុង​រយៈពេល​ ១ឆ្នាំ​កន្លងទៅនេះ ហើយ​មានការ​ព្រួយបារម្ភ​ថា ​ភាព​តានតឹង​អាច​រីក​កាន់តែ​ធំ​នៅក្នុង​ខែ​នេះ នៅពេលដែល​ខែ​ដ៏​ពិសិដ្ឋ ​Ramdan របស់​ពលរដ្ឋ​មូស្លីម ស្របពេល​ជាមួយ​ពិធីបុណ្យ​សាសនា​របស់​ជនជាតិ​ជ្វី​ស និង​បុណ្យ​អ៊ី​ស្ទើរ​របស់​សាសនា​គ្រឹ​ស្ត​។​ ​ក្រុម​ជន​ប៉ា​ឡេ​ស្ទី​នបាន​ថ្កោលទោស​ការវាយប្រហារ​រ​បស់​អ៊ីស្រាអែល​ទៅលើ​អ្នក​គោរពបូជា ដែល​ពួកគេ​បានចាត់ទុក​ថា​ជា​អំពើ​ឧក្រិដ្ឋកម្ម​។ លោក Nabil Abu Rudeineh អ្នកនាំពាក្យ​របស់​ប្រធានាធិបតី​ប៉ា​ឡេ​ស្ទី​នលោក Mahmoud Abbas បាន​និយាយ​នៅក្នុង​សេចក្តីថ្លែងការណ៍​ថា យើង​ព្រមាន​អ្នក​ឈ្លានពាន​កុំ​ឲ្យ​ដើរ​ឆ្លង​បន្ទាត់​ក្រហម​នៅ​កន្លែង​បរិសុទ្ធ ដែល​នឹង​នាំឱ្យមាន​ការផ្ទុះ​ដ៏​ធំ​៕

អត្ថបទ៖ ប៊ុនថន