ភ្នំពេញ៖ ក្នុងឱកាសបុណ្យចូលឆ្នាំថ្មីប្រពៃណីខ្មែរកាន់តែខិតជិតមកដល់នោះ រដ្ឋបាលរាជធានីភ្នំពេញ ចេញសេចក្តីជូនដំណឹង ស្តីពីការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុងរាជធានីភ្នំពេញ និងបានធ្វើការហាមឃាត់នូវសកម្មភាពមួយចំនួនដែលនឹងនាំដល់គ្រោះថ្នាក់ជាយថាហេតុ អំឡុងពេលកំពុងសប្បាយរីករាយ ក្នុងឱកាសចូលឆ្នាំថ្មី ។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នាថ្ងៃទី៥ ខែមេសា ឆ្នាំ២០២៣នេះ បានលើកឡើងថា ចាប់ពីថ្ងៃទី១៤ ខែមេសាខាងមុខនេះ រដ្ឋបាលរាជធានីភ្នំពេញសូមជូនដំណឹងដល់ សាធារណជនទាំងអស់ឲ្យបានជ្រាបថា ដើម្បីរក្សាសន្តិសុខ សុវត្ថិភាព សណ្តាប់ធ្នាប់ និង​របៀបរៀប​រយសាធារណៈ ក្នុងរាជធានីភ្នំពេញ នាឱកាសបុណ្យចូលឆ្នាំថ្មីប្រៃណីជាតិ និង​សេចក្តីថ្លៃថ្នូរដ៏​ផូរផង់​របស់ជាតិនោះ ​រដ្ឋបាលរាជធានីភ្នំពេញ ​សូមអំពាវនាវដល់បងប្អូនប្រជាពលរដ្ឋ ​ជាពិសេសក្មួយៗ ជាយុវជន យុវនារីសិស្ស និស្សិត និងកម្មករ កម្មការិនីទាំងអស់ដូចជា ត្រូវគោរពច្បាប់​ចរាចរណ៍ផ្លូវគោក និងមិនត្រូវបើកបរក្នុងស្ថាន ​ភាពស្រវឹង ដើម្បីចៀសវាងគ្រោះថ្នាក់​ផ្សេងៗជាដើម។

រដ្ឋបាលរាជធានីភ្នំពេញ ក៏បានអំពាវនាវដល់បងប្អូនទាំងអស់ចូលរួមទប់​ ស្កាត់គ្រោះអគ្គិភ័យ ដោយ​ប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូប ភ្លើង​ចង្ក្រាន ចរន្តអគ្គិសនី ដើម្បីរក្សា​បាន​នូវទ្រព្យសម្បត្តិ ​អាយុជីវិតផ្ទាល់ខ្លួន​ និងអ្នកដទៃជាដើម។

រដ្ឋបាលរាជធានីភ្នំពេញ ក៏បានអំពាវនាវឲ្យបងប្អូនចូលរួមលេងកំសាន្តល្បែងប្រជាប្រិយគ្រប់ប្រភេទ និង​ចៀសវាង​ដាច់ខាត​ការលេងបាញ់ទឹក ​ជះទឹក គប់ស្បោងទឹក លាបធ្យូង ប៉ាតម្សៅ ទះគក់ដោយដៃ ឬវាយដោយរំពាត់ដល់អ្នកដំណើរ ឬជិះម៉ូតូបង្ហោះប្រដេញគ្នាលេង នៅតាមផ្លូវ ដែលអាចនាំឲ្យមានគ្រោះថ្នាក់ជាយថាហេតុប៉ះពាល់ដល់អាយុវជីវិតផ្ទាល់ខ្លួន និងអ្នកដំណើរ ព្រមទាំងហាមដាច់ខាតការលេងល្បែងស៊ីសង អុជផាវ និងគ្រឿងផ្ទុះគ្រប់ប្រភេទ ដើម្បីរក្សានូវភាពថ្លៃថ្នូរ ​ស័ក្ដិសម​ជា​កុលបុត្រធីតាខ្មែរ។

ជាមួយគ្នានេះដែរ រដ្ឋបាលរាជធានីភ្នំពេញ ក៏បានអំពាវនាវឲ្យបងប្អូនត្រូវយកចិត្តទុកដាក់ក្នុងការ​ថែរក្សា​សុខភាព និង​អនាម័យ​ចៀសវាង​ការឆ្លងជំងឺរាតល្បាតផ្សេងៗ។

រដ្ឋបាលរាជធានីភ្នំពេញ ក៏បានអំពាវនាវឲ្យអាជ្ញាធរគ្រប់លំដាប់ ​ថ្នាក់ត្រូវសហការអនុវត្ត និង​ផ្សព្វផ្សាយ​ឲ្យមានប្រសិទ្ធភាព ព្រមទាំងចាត់វិធានការផ្លូវច្បាប់​ចំពោះអ្នក​ប្រព្រឹត្តិ​អំពើ​មិនគប្បីខាងលើ ​ដែលបង្កឲ្យប៉ះពាល់ដល់ប្រពៃណី​ សេចក្តីថ្លៃថ្នូរបស់ជាតិ ​ក៏ដូចជាប៉ះពាល់ដល់ សន្តិសុខ សុវត្ថិភាព សណ្តាប់ធ្នាប់ ​និង​របៀបរៀបរយ​សាធារណៈក្នុងរាជធានីភ្នំពេញនោះផងដែរ៕

អត្ថបទ៖ បាន ចក់