ភ្នំពេញ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញជា​អធិបតីបើក​ទិវាវេជ្ជសាស្ត្រ-សល្យសាស្ត្រលើកទី២៥ ​និងថែទាំវេជ្ជសាស្ត្រលើកទី១២​ រយៈពេល២ថ្ងៃ ចាប់ពីថ្ងៃទី០៥-០៦ ខែមេសា​ ឆ្នាំ២០២៣ នៅមន្ទីរពេទ្យមិត្តភាពខ្មែរ-សូវៀត។

លោកសាស្រ្ដាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានឲ្យដឹងថា ​ជារៀងរាល់ឆ្នាំ មន្ទីរពេទ្យមិត្តភាពខ្មែរ-សូវៀត តែងតែរៀបចំទិវានេះឡើងដើម្បីចែករំលែក ​នូវបច្ចេកទេស ឯកទេស​វេជ្ជសាស្ត្រថ្មីៗ ទៅវិញទៅមក និងផ្លាស់ប្ដូរបទពិសោធន៍ ក្នុងគោលបំណងជំរុញឲ្យមានការយក​ចិត្ត​ទុកដាក់ ពង្រឹង និងលើកស្ទួយបច្ចេកទេសជាប់ជាប្រចាំ ​ដើម្បីធ្វើឲ្យការផ្តល់សេវាព្យាបាល និងថែទាំ ប្រកបដោយគុណភាពប្រសិទ្ធភាពខ្ពស់​ និងភាពស្មោះត្រង់ជូនដល់ប្រជាពលរដ្ឋ ទូទាំងប្រទេស និង​ឈានទៅរកការប្រកួតប្រជែងនូវសេវាវេជ្ជសាស្ត្រក្នុងតំបន់ ​និងពិភពលោកផងដែរ។

នៅក្នុងឆ្នាំ២០២៣នេះ មន្ទីរពេទ្យបានរៀបចំទិវាវេជ្ជសាស្ត្រ-សល្យសាស្ត្រ ​និងការថែទាំវេជ្ជសាស្ត្រ ដោយ​ប្រមូលផ្តុំប្រធានបទដ៏ល្អៗ​ពីវាគ្មិនសំខាន់ៗ​គ្របដណ្តប់លើគ្រប់ជំនាញទាំងអស់ ដែលមាន​ប្រធានបទ ​ទាំងអស់សរុបចំនួនជាង៣៩ប្រធានបទ ​ជាពិសេស គឺបានផ្ដោតសំខាន់​ទៅលើការ​លើកកំពស់​ការព្យាបាល​ និងថែទាំ ដូចជា៖​ ការធ្វើ​រោគវិនិច្ឆ័យ និងការព្យាបាលប្រកប​ដោយ​កំរិតខ្ពស់​សំរាប់ជំងឺប្រព័ន្ធរលាយអាហារ​ ការធ្វើរោគ​វិនិច្ឆ័យ​ទាន់ពេលវេលា និងការព្យាបាលជួយ​សង្គ្រោះអ្នកជំងឺស្ទះសរសៃបេះដូងប្រកបដោយប្រសិទ្ធភាពខ្ពស់។

ការធ្វើរោគវិនិច្ឆ័យ និងការព្យាបាលលើជំងឺផ្លូវដង្ហើម ​ក្រោយជំងឺកូវីដ-១៩ និងជំងឺផ្លូវដង្ហើម​ផ្សេងៗទៀត​ប្រធានបទការពង្រឹងការងារថែទាំ​ និងការផ្តល់សេវាសម្រាប់គិលានុបដ្ឋាក-យិកា ដើម្បីផ្តល់សេវាថែទាំជូនអ្នកជំងឺប្រកបដោយគុណភាព ​និងទាន់ពេលវេលា។ ប្រធានបទសំខាន់ៗខាងលើនេះ គឺសុទ្ធសឹងតែជំងឺដែលកំពុងមានការកើនឡើង និងជួប ប្រទះ​ញឹកញាប់នៅក្នុងប្រទេសយើង។

នៅក្នុងសិក្ខាសាលានេះ មានវាគ្មិនធ្វើបទបង្ហាញចំនួន ៤០ រូប ​ដែលមកពីបណ្ដាផ្នែកឯកទេស នានាក្នុងមន្ទីរពេទ្យ ​និងមានអ្នកចូលរួមសរុបប្រមាណ ៤០០ នាក់ផងដែរ។

នាឱកាសនោះឯកឧត្តមសាស្ត្រាចារ្យ ម៉ម ប៊ុនហេង បានថ្លែង គ្រោះថ្នាក់ស្ទះសរសៃបេះដូង ជំងឺវិបត្តិ​ចង្វាក់បេះដូង ជំងឺមហារីកប្រព័ន្ធរំលាយអាហារ ​មហារីកសួត ជាមូលហេតុឈាន​មុខគេ​ក្នុងចំណោមមូលហេតុដទៃទៀត ​ដែលនាំឲ្យអត្រាមរណភាពខ្ពស់។ ​ការរៀបចំទិវា វេជ្ជសាស្ត្រ សល្យសាស្ត្រ និងទិវាថែទាំវេជ្ជសាស្ត្រ ​បានពង្រឹងការធ្វើរោគវិនិច្ឆ័យទាន់ពេល និង ការព្យាបាល​ប្រកប​ដោយបច្ចេកទេស និងគុណធម៌នាំមកនូវការកាត់បន្ថយអត្រាមរណភាព ដែលបណ្តាលមក​ពីជំងឺបេះដូង ជំងឺប្រព័ន្ធរំលាយអាហារ ​និងប្រព័ន្ធផ្លូវដង្ហើមនៅក្នុងមន្ទីរពេទ្យផ្ទាល់។

ទន្ទឹមនឹងនេះ ឯកឧត្តម រដ្ឋមន្រី្ត ក៏សូមអំពាវនាវឲ្យមន្ត្រីរាជការទាំងអស់ ពង្រឹងនូវបច្ចេកទេស ផ្លាស់ប្តូរ ​ឥរិយាបថពីទម្លាប់មិនល្អ ទៅជាអ្នកផ្តល់សេវាជូនប្រជាជនប្រកបដោយសីលធម៌ថ្លៃថ្នូរ មិនរើសអើងអ្នកជំងឺ ​ដែលស្របនឹងសុភាសិតលើកឡើងថា «គ្រូពេទ្យជាមាតាមានព្រហ្មវិហារ​ធម៌ដ៏ល្អ របស់អ្នកជំងឺ»។ ពិសេសឆ្លងតាមរយៈការជួបជុំគ្នារយៈពេល២ថ្ងៃនេះ ​ឯកឧត្តម លោកជំទាវ លោក លោកស្រី នឹងទទួលបាននូវបទពិសោធន៍ល្អៗ ​ដើម្បីយកទៅអនុវត្តទៅតាម អង្គភាព​រៀងៗខ្លួន ដើម្បីពិនិត្យ ព្យាបាលអ្នកជំងឺ ​ឲ្យមានប្រសិទ្ធភាពខ្ពស់​ រួមចំណែកកាត់បន្ថយភាពក្រីក្រ ស្របតាមគោលនយោបាយរបស់រាជរដ្ឋាភិបាលកម្ពុជា ​ក្រោមការដឹកនាំដ៏ឈ្លាសវៃ និងប្រកប​ដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្តី្រ ៕ អត្ថបទ រដ្ឋា