កោះកុង៖ ប្រជាពលរដ្ឋក្នុងសហគមន៍អារ៉ែង ស្ថិតក្នុងភូមិសាស្ត្រ ស្រុកថ្មបាំង ខេត្តកោះកុង កំពុងទទួលបានផលពីអេកូទេសចរណ៍តំបន់អេកូទេសចរណ៍ តាមរយៈការផ្ដល់សេវា ដល់ផ្ញៀវទេសចរជាតិ និងអន្តរជាតិ ខណៈតំបន់អេកូទេសចរណ៍អារ៉ែងមានសក្តានុពលទេសចរណ៍ ធម្មជាតិ សត្វព្រៃកម្រ តំបន់បូរាណដែលកំពុងទាក់ទាញអ្នកស្រឡាញ់ដំណើរកំសាន្ត​បែបផ្សង​ព្រេង។

លោក ហ៊ីង ពៅ ប្រធានគណៈកម្មការសហគមន៍ជនជាតិដើមភាគតិច ស្ថិតនៅឃុំជំនាប់ ស្រុកថ្មបាំង ខេត្តកោះកុង បានឱ្យដឹងថា ប្រជាពលរដ្ឋនៅក្នុងសហគមន៍អារ៉ែង កំពុងទទួលបាន​ផលច្រើន​ពីការផ្ដល់សេវាដល់ភ្ញៀវទេសចរជាតិ និងអន្តរជាតិ​ ដែលមកលេងកម្សាន្តនៅតំបន់អារ៉ែង តាមរយៈការជូនភ្ញៀវ ផ្គត់ផ្គង់ម្ហូបអាហារ ជួលម៉ូតូ និងជួលតង់ សម្រាប់ភ្ញៀវបោះសម្រាកជាដើម។

លោកបានឱ្យដឹងថា បច្ចុប្បន្នភ្ញៀវទេសចរជាតិ និងអន្តរជាតិ មានកំណើនមកកម្សាន្តនៅតំបន់អារ៉ែង​ច្រើនជាងមុន ដោយសារហេដ្ឋារចនាសម្ព័ន្ធ ផ្លូវថ្នល់ស្អាត​ ផ្ដល់ភាពងាយស្រួលសម្រាប់​ភ្ញៀវធ្វើ​ដំណើរ រួមនឹងការផ្ដល់សេវាល្អពីសហគមន៍ ។

ទាក់ទងនឹងសក្ដានុពលទេសចរណ៍នៅក្នុងតំបន់អារ៉ែងនេះ ភ្នំម្រេចកង្កែប ជាតំបន់ទេសចរណ៍​ដ៏ទាក់ទាញមួយ ​ស្ថិតនៅក្នុងតំបន់អេកូទេសចរណ៍អារ៉ែង។ ពយម្រេចកង្កែបទេសចរណ៍អាច​ធ្វើដំណើចម្ងាយជាង ៤គីឡូម៉ែត្រពីសាលាបឋមសិក្សាជំនាប់។​ ដើម្បីទៅកម្សាន្តនៅពយម្រេចកង្កែប អ្នកទេសចរត្រូវធ្វើដំណើរថ្មើជើងកាត់ព្រៃ​ ដែលមានដើមឈើធំៗ ​និងជម្រាលភ្នំ ដោយចំណាយជិត ២ ម៉ោង។

លោក ម៉េង ហេង ប្រធានអង្គការមាតាធម្មជាតិ ដែលបានដឹកនាំក្រុមយុវជនប្រមាណ ២០ នាក់ទៅ​ធ្វើ​ទស្សនកិច្ច និងលេងកម្សាន្តនៅតំបន់អារ៉ែងរយៈពេល៣ថ្ងៃចាប់ពីថ្ងៃទី៣១​ ខែមីនា​ ដល់ថ្ងៃទី២ ខែមេសា ឆ្នាំ២០២៣នេះ​បានប្ដេជ្ញានាំភ្ញៀវទេសចរមកទស្សនា​នៅតំបន់អារ៉ែងឱ្យបានរឹតតែច្រើន​ថែមទៀត ​និងជំរុញការផ្ដល់សេវារបស់សហគមន៍​ដល់ភ្ញៀវទេសចរ​ឱ្យបានល្អបន្ថែមទៀត។

តំបន់អេកូទេសចរណ៍អារ៉ែង​ គឺជាតំបន់មួយដែលមានសក្តានុពលខ្លាំង​ដោយសារមាន មាន​សក្ដានុពល ទេសចរណ៍ដូចជា ព្រៃភ្នំ ទឹកជ្រោះ ​សត្វព្រៃកម្រ (ត្រីនាគ) ក្រពើភ្នំ រូងភ្នំបូរាណ និងរបាំប្រពៃណីជាដើម។ តំបន់អេកូទេសចរណ៍នេះ ​មានចម្ងាយប្រមាណ ២៤ គីឡូម៉ែត្រ​ពីទីរួម​ស្រុកថ្មបាំង ស្ថិតក្នុងភូមិសាស្ត្រភូមិជំនាប់ ឃុំជំនាប់ ស្រុកថ្មបាំង​៕អត្ថបទ៖ វ៉ន ដារ៉ា