ភ្នំពេញ៖ ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានទទួលជួប ឯកឧត្តម Justin Whyatt ឯកអគ្គរាជទូត វិសាមញ្ញ និងពេញសមត្ថភាពថ្មី នៃប្រទេស អូស្រ្តាលី ប្រចាំនៅព្រះរាជាណាចក្រកម្ពុជា សម្តែងការគួរសម និងពិភាក្សាការងារ នារសៀលថ្ងៃទី០៤ ខែមេសា ឆ្នាំ២០២៣ នៅទីស្តីការក្រសួង។

ក្នុងជំនួបពិភាក្សាការងារនេះបានប្រព្រឹត្តិទៅយ៉ាងល្អប្រកបដោយផ្លែផ្កាមួយចំនួននៃកិច្ចសហប្រតិបត្តិការរវាងប្រទេសទាំងពីរ​។ជាមួយគ្នានេះ ​ឯកអគ្គរាជទូតអូស្រ្តាលីថ្មី ក៏បានពោលសរសើរ​ពី​វឌ្ឍនភាព​របស់កម្ពុជា។

ក្នុងជំនួបជាមួយឯកឧត្តម Justin Whyatt ឯកអគ្គរាជទូត វិសាមញ្ញ និងពេញសមត្ថភាពថ្មី នៃ​ប្រទេសអូស្រ្តាលី ប្រចាំព្រះរាជាណាចក្រកម្ពុជា ឯកឧត្ដម បណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដី​ក្រសួង​អភិវឌ្ឍន៍ជនបទ ក៏បានបញ្ជាក់អំពីទស្សនវិស័យរបស់ក្រសួងអភិវឌ្ឍន៍ជនបទ គឺធ្វើ​យ៉ាងណា​លើកកម្ពស់ការអភិវឌ្ឍផ្នែកសេដ្ឋកិច្ច-សង្គម ​និងសេដ្ឋកិច្ចរបស់ប្រជាពលរដ្ឋនៅជនបទ តាមរយៈយុទ្ធ​សាស្រ្ត២ សំខាន់ៗ គឺ៖ យុទ្ធសាស្រ្តទី១ ការលើកកម្ពស់លក្ខខណ្ឌនៃការរស់​នៅ​តាមរយៈការផ្ដល់សេវាទឹកស្អាត ​និងអនាម័យ​ និងការផ្សាព្វផ្សាយអំពីវិធីបង្ការរោគជាដើម។ យុទ្ធសាស្រ្តទី២ ​លើកកម្ពស់សេដ្ឋកិច្ចជនបទតាមរយៈការផ្ដល់ហេដ្ឋារចនា​សម្ព័ន្ធជនបទ​ជា​ច្រើនរួមមាន៖ ផ្លូវថ្នល់ ស្ពាន និងសំណង់សិល្បការផ្សេងៗ​ និងការបង្កើតនូវមុខរបរផ្សេងៗ ដើម្បី​ឱ្យប្រជាពលរដ្ឋមានមុខរបរថ្មីក្រៅពីធ្វើស្រែចំការ។

ជាការឆ្លើយតប ឯកឧត្តម ឯកអគ្គរាជទូត បានថ្លែងអំណរគុណចំពោះ​ ឯកឧត្តម បណ្ឌិតសភាចារ្យ និង​បានកត់សម្គាល់ខ្ពស់អំពីការរីកចម្រើន​របស់​ប្រទេសកម្ពុជា ព្រោះលោកធ្លាប់មក​បំពេញការងារ​ក្នុងប្រទេសកម្ពុជាកាលពីជាង២០ឆ្នាំមុន ​ដូច្នេះអ្វីដែលលោកបានឃើញនាពេលបច្ចុប្បន្ន គឺពិតជា​មានវឌ្ឍនភាពច្រើនណាស់ពាក់ព័ន្ធនឹងការអភិវឌ្ឍប្រទេស។

ឯកឧត្តម ឯកអគ្គរាជទូត ក៏បានកត់សម្គាល់ខ្ពស់ពីការគ្រប់គ្រងជំងឺកូវីដ១៩​ របស់រាជរដ្ឋាភិបាល​កម្ពុជា ​បាន​ជោគជ័យ ​និងបានបើកនូវ​សេដ្ឋកិច្ច​ឡើងវិញ​បាន​ឆាប់រហ័ស ​ឥឡូវនេះ​យើង​ឃើញថា​កម្ពុជា​កំពុងតែអភិវឌ្ឍន៍​ឡើងវិញ​បន្ទាប់ពី រងផលប៉ះពាល់នៃជំងឺកូវីដ១៩។

បន្ថែមពីនេះឯកឧត្តម ឯកអគ្គរាជទូត ក៏បានបញ្ជាក់អំពីការជួយគាំទ្ររបស់អូស្រ្តាលី លើក​កម្មវិធីភាពជាដៃគូ ​កម្ពុជា-អូស្រ្តាលី សម្រាប់ការអភិវឌ្ឍ​សេដ្ឋកិច្ចធន់ (CAP-RED) ដែលកម្មវិធីនេះ គឺផ្ដោត​ទៅលើវិស័យកសិកម្ម ​ទាក់ទងនឹងទឹក ​និងវិស័យពាណិជ្ជកម្មជាដើម។ មិនតែប៉ុណ្ណោះកន្លងទៅអូស្រ្តាលីក៏បានជួយ​គាំទ្រ​លើវិស័យទឹកស្អាត ​និងអនាម័យ ដែលមាន​អង្គការ​ដៃគូមួយចំនួនបាន​ និងកំពុងធ្វើការលើវិស័យនេះ។

នៅក្នុងកិច្ចពិភាក្សាគ្នានេះ ​ក៏បានលើកឡើងអំពីបញ្ហាការប្រែប្រួលអាកាសធាតុ ដែលធ្វើឱ្យប៉ះពាល់​ដល់​ហេដ្ឋារចនាសម្ព័ន្ធជនបទ ក៏ដូចជាធ្វើឱ្យប៉ះពាល់ដល់វិស័យទឹកស្អាត ​និងអនាម័យ ហើយ​ថ្នាក់ដឹកនាំទាំងពីរបានឯកភាពគ្នាជាគោលការណ៍ថា ​ត្រូវតែរិះរកវិធីសាស្រ្តធ្វើយ៉ាង​ណាដើម្បីឱ្យ ការអភិវឌ្ឍ​នាពេលអនាគតមានភាពធន់នឹងការប្រែប្រួលអាកាសធាតុ។

ជាការពិតណាស់រវាង កម្ពុជា និងអូស្រ្តាលី មានទំនាក់ទំនងល្អជាមួយគ្នាខាងការទូត ព្រមទាំង​ជាមួយ​ក្រសួងពាក់ព័ន្ធផ្សេងៗ ដែលបានធ្វើការជាមួយគ្នា ហើយទូតអូស្រ្តាលីប្រចាំនៅកម្ពុជាក៏បាន​ការជួយ​គាំទ្រផ្នែកហេដ្ឋារចនាសម្ព័ន្ធផ្លូវជនបទតាមរយៈគម្រោងរបស់ ADB ជាដើម។

លើសពីនេះ ​ទូតអូស្រ្តាលីប្រចាំនៅកម្ពុជាក៏បានជួយគាំទ្រលើការអភិវឌ្ឍ​ធនធានមនុស្ស តាម​រយៈការផ្ដល់​អាហារូបករណ៍ជាច្រើន ក្នុងនោះក្រសួងអភិវឌ្ឍន៍ជនបទ​ក៏ទទួលបាននូវ​អាហារូបករណ៍​មួយចំនួនផ្ដល់ជូនមន្រ្តីរបស់ក្រសួង​ចេញទៅសិក្សានៅ​ប្រទេសអូស្រ្តាលីផងដែរ។ ជាចុងក្រោយកិច្ចជំនួបពិភាក្សាការងារ ​ឯកឧត្ដមរដ្ឋមន្រ្ដី និងឯកឧត្តម ​ឯកអគ្គរាជទូត វិសាមញ្ញ និងពេញសមត្ថភាពថ្មី ​សន្យាថា នឹងខិតខំពង្រឹងកិច្ចសហប្រតិបត្តិការបន្ថែមទៀត ដើម្បី​ទំនាក់ទំនង​នៃប្រទេសទាំង២កាន់តែមានភាពរឹងមាំ​ កាន់តែប្រសើរឡើងក្នុងពេលអនាគត៕អត្ថបទ​៖ ចេន សុជាតា