អង់គ្លេស៖ អង្គការឃ្លាំមើលទិន្នន័យរបស់ចក្រភពអង់គ្លេស បានពិន័យកម្មវិធីចែករំលែកវីដេអូរបស់ចិន TikTok ប្រមាណ ១៦លានដុល្លារសម្រាប់ការបំពានច្បាប់ការពារទិន្នន័យ រួមទាំងការប្រើប្រាស់ទិន្នន័យផ្ទាល់ខ្លួនរបស់កុមារអាយុក្រោម ១៣ឆ្នាំដោយគ្មានការយល់ព្រមពីឪពុកម្តាយ។
ការិយាល័យស្នងការព័ត៌មានដែលបានប្រកាសការសម្រេចនេះកាលពីថ្ងៃអង្គារបាននិយាយថា ក្រុមហ៊ុន TikTok មិនទទួលបានការយល់ព្រមបែបនេះរយៈពេលប្រហែល ២ឆ្នាំមកហើយចាប់តាំងពីឆ្នាំ២០១៨។ ការិយាល័យស្នងការព័ត៌មានបានសន្និដ្ឋានថា ក្រុមហ៊ុន TikTok បានអនុញ្ញាតឱ្យកុមារអាយុក្រោម ១៣ឆ្នាំរហូតដល់ ១.៤លាននាក់ប្រើប្រាស់វេទិការបស់ខ្លួននៅឆ្នាំ២០២០ ទោះបីជាច្បាប់របស់ក្រុមហ៊ុនមិនអនុញ្ញាតឱ្យកុមារអាយុក្រោម ១៣ឆ្នាំបង្កើតគណនីក៏ដោយ។
អ្នកនាំពាក្យក្រុមហ៊ុន TikTok បាននិយាយថា ក្រុមហ៊ុនមិនយល់ស្របចំពោះការសម្រេចរបស់ការិយាល័យស្នងការព័ត៌មាននោះទេ ដោយបាននិយាយថា ក្រុមហ៊ុនវិនិយោគយ៉ាងច្រើនដើម្បីទប់ស្កាត់កុមារអាយុក្រោម ១៣ឆ្នាំមិនឲ្យប្រើប្រាស់វេទិកា ហើយក្រុមសុវត្ថិភាព ៤០,០០០នាក់ធ្វើការគ្រប់ពេលដើម្បីរក្សាសុវត្ថិភាពសម្រាប់សហគមន៍។ អ្នកនាំពាក្យបាននិយាយថា ក្រុមហ៊ុន TikTok នឹងបន្តពិនិត្យមើលការសម្រេចនេះ ហើយកំពុងពិចារណាជំហានបន្ទាប់របស់ខ្លួន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
