ភ្នំពេញ៖ របាយការណ៍ក្រសួងព័ត៌មានបង្ហាញថា ក្នុងរយៈពេល៥ឆ្នាំចុងក្រោយនេះ ចំនួនស្ថាប័ន​សារព័ត៌មានមានការកើតឡើងច្រើន ដែល​ឆ្លុះបញ្ចាំង​ពី​ការបើកទូលាយសិទ្ធសេរីការបញ្ចេញមតិ សេរីភាពសារព័ត៌មាននៅកម្ពុជា ។

ក្នុងពិធីបើកសន្និបាតបូកសរុបការងាររយៈពេល៥ឆ្នាំរបស់ក្រសួងព័ត៌មាន និងលើកទិសដៅ​អនុវត្តបន្ត ​នៅទីស្តីក្រសួងនៅថ្ងៃទី៥ ​ខែមេសានេះ ឯកឧត្តម ខៀវ កាញារីទ្ធ ​រដ្ឋមន្ត្រីក្រសួងព័ត៌មាន បានថ្លែងថា ក្នុងរយៈពេលចុងក្រោយ ពោលគិតពីឆ្នាំ២០១៨ ដល់ឆ្នាំ២០២២​ ក្រសួងព័ត៌មាន បាន​ចេញ​បណ្ណសារព័ត៌មាន និងបន្តសុពលភាពបណ្ណសារព័ត៌មាន ​ជូនអ្នកសារព័ត៌មាន​ និងបរទេស នៅកម្ពុជាចំនួន ១០ ០៣៣បណ្ណ និងអង្គភាពសារព័ត៌មានប្រមាណជាង២ ០០០ អង្គភាព។

ឯកឧត្តម រដ្ឋមន្ត្រី បញ្ជាក់ថា បច្ចុប្បន្ន នៅកម្ពុជា មានអង្គភាពសារព័ត៌មាន ​ព្រឹត្តិបត្រ ទស្សនាវដ្តី​បានចុះបញ្ជីប្រកបអាជីវកម្មជាមួយក្រសួងព័ត៌មាន​ ៦៦១អង្គភាព គេហទំព័រ ​និង​ទូរទស្សន៍​អនឡាញ មាន៨៧៨​ អង្គភាព កាសែត ៤៤៦អង្គភាព វិទ្យុFMកំពុងដំណើរការផ្សាយ ​២២១ស្ថានីយ ទូរទស្សន៍​ផ្សាយផ្ទាល់ មាន១៩ស្ថានីយ ទូរទស្សន៍ផ្សាយបន្តមាន ​១៦៥ ស្ថានីយ ទូរទស្សន៍​ផ្កាយរណបមានចំនួន២ ទូរទស្សន៍ឌីជីថល ៤ស្ថានីយ និងទូរទស្សន៍OTT 6ស្ថានីយ។

ទីភ្នាក់ងារសារព័ត៌មាន ​និងការិយាល័យកាសែត វិទ្យុ ទូរទស្សន៍បរទេសមាន​ ១៧អង្គភាព និង​សមាគមសារព័ត៌មានចំនួន​៥១អង្គភាព។

ឯកឧត្តម ខៀវ កាញារីទ្ធ ថ្លែងថា ក្រសួងព័ត៌មាន ​តែងតែផ្តល់ការយកចិត្តទុក ​និងទទួលស្គាល់ ផ្តល់​តម្លៃ អ្នកសារព័ត៌មាន អ្នកប្រកបវិជ្ជាជីវកៈសារព័ត៌មាន ​និងស្ថាប័នសារព័ត៌មានស្មើៗគ្នា គ្មាន​ការ​ប្រកាន់និន្នាការនយោបាយ ឬទស្សនៈផ្ទុយគ្នា​ ឬស្របគ្នានោះទេ ​ហើយការងារនេះ គឺមាន​ការ​គាំទ្រខ្លាំងពីប្រមុខថ្នាក់ដឹកនាំរាជរដ្ឋាភិបាល​ រហូតមានការផ្តល់​ជំនួយផ្នែកច្បាប់ និងការផ្តល់មេធាវី​ការពារក្តីអ្នកសារព័ត៌មាន​ អ្នកប្រកបវិជ្ជាជីវៈសារព័ត៌មានដោយឥតគិតថ្លៃ នៅពេល​មានវិវាទអនុវត្តវិជ្ជាជីវៈ។

នៅក្នុងអង្គសន្និបាតនេះ ឯកឧត្តម ខៀវ កាញារីទ្ធ ក៏បានថ្លែងថា ​នៅក្នុងដំណើរការរីកចំរើន នៃវិស័យ​សារព័ត៌មាន និងសោតទស្សន៍នេះ​ ក្រសួងក៏មានបញ្ហាប្រឈមខ្លះដែរ ពាក់ព័ន្ធនឹង​ព័ត៌មានក្លែងក្លាយ ​ដែលទាមទារឲ្យថ្នាក់ដឹកនាំស្ថាប័នរដ្ឋ ​ឯកជន ​និងភាគីពាក់ព័ន្ធនានាទៀត រួមគ្នា​ប្រយុទ្ធប្រឆាំង ទប់ស្កាត់ ដើម្បីធ្វើឲ្យ​សង្គមជាតិ សន្តិសុខ ​សណ្តាប់ធ្នាប់ ​ការអភិវឌ្ឍការរីកចំរើន៕ អត្ថបទ ស៊ុម សុខជា