អន្ដរជាតិ៖ នៅថ្ងៃពុធនេះ ប្រធានាធិបតីបារាំងលោក Emmanuel Macron បានចុះចតនៅទីក្រុងប៉េកាំង សម្រាប់ដំណើរទស្សនកិច្ចផ្លូវរដ្ឋលើកដំបូងរបស់លោក ទៅកាន់ប្រទេសចិនក្នុងរយៈពេលជាង ៣ឆ្នាំ ។

លោក Macronនិយាយថា អំឡុងដំណើរទស្សនកិច្ចរយៈពេល ៣ថ្ងៃរបស់លោក លោកចង់សង្កត់ដល់សមភាគីចិនលោកប្រធានាធិបតី Xi Jinping ដែលលោកនឹងជួបជាមួយប្រធានគណកម្មការអឺរ៉ុបលោកស្រី Ursula von der Leyen នៅថ្ងៃព្រហស្បតិ៍ថា អឺរ៉ុបនឹងមិនទទួលយកបានឡើយ បើចិនផ្តល់អាវុធដល់រុស្ស៊ី។ លោកសង្ឃឹមផងដែរថានឹងមានការជជែកគ្នាពីទំនាក់ទំនងពាណិជ្ជកម្ម និងសេដ្ឋកិច្ចជាមួយក្រុមមេដឹកនាំចិន។

លោក Macron បានអញ្ជើញលោកស្រី Von der Leyen រួមដំណើរជាមួយ ដើម្បីជាមធ្យោបាយរៀបចំគម្រោងបង្រួបបង្រួមអឺរ៉ុប ក្រោយក្រុមមន្រ្តីបារាំង រិះគន់អធិការបតីអាល្លឺម៉ង់លោក Olaf Scholz សម្រាប់ការធ្វើដំណើររបស់លោកទៅកាន់ចិនតែម្នាក់ឯងកាលពីចុងឆ្នាំ ២០២២។

ក្រុមទីប្រឹក្សាប្រធានាធិបតីបារាំងនិយាយថា លោក Macron បានជំរុញឲ្យសហភាពអឺរ៉ុប(EU) ត្រូវតែរឹងមាំជាងមុនក្នុងទំនាក់ទំនងពាណិជ្ជកម្មជាមួយចិន ប៉ុន្តែលោកចៀសវាងជាសាធារណៈពីការប្រើប្រាស់វោហារសាស្ត្រប្រឆាំងចិន។

ចាប់តាំងពីដំណើរទស្សនកិច្ចលើកចុងក្រោយរបស់លោក Macron ទៅកាន់ចិនកាលពីឆ្នាំ ២០១៩ វិធានការគ្រប់គ្រងការរីករាលដាលឆ្លងជំងឺ COVID-19ដ៏តឹងរឹងរបស់ចិន បានបង្ខំឲ្យកិច្ចប្រជុំការទូតទាំងអស់ធ្វើឡើងតាមអនឡាញ ស្របពេលដែលទំនាក់ទំនងរបស់ចិនជាមួយអឺរ៉ុប បានធ្លាក់ចុះ ទី ១ដោយសារកិច្ចព្រមព្រៀងវិនិយោគទុនជាប់គាំង និងទី២ ដោយសារតែទីក្រុងប៉េកាំង បដិសេធន៍មិនព្រមថ្កោលទោសការវាយលុករបស់រុស្ស៊ីទៅលើអ៊ុយក្រែន៕