ភ្នំពេញ ៖ នាទីព្រះពុទ្ធសាសនាផ្សារភ្ជាប់ នឹង សង្គមនៃក្រសួងធម្មការ និងសាសនា ក្រោមគំនិតផ្តួចផ្តើម​ដ៏ខ្ពង់ខ្ពស់​របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នារសៀលថ្ងៃទី៥ ខែមេសា ឆ្នាំ២០២៣នេះ ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានអញ្ជើញជាអធិបតី ក្នុងកម្មវិធីនាទីព្រះពុទ្ធសាសនា ផ្សារភ្ជាប់ នឹងសង្គម លើកទី២៧៤ ស្មើនឹង៩៤៧ចំណងជើងព្រះធម៌។

​នាឱកាសបើកនាទីព្រះពុទ្ធសាសនា ផ្សារភ្ជាប់ នឹងសង្គមលើកទី២៧៤ មានការសម្តែងព្រះធម៌អំពី សុខវគ្គ ដោយព្រះបវរសត្ថា ហួរ សារិទ្ធិ ព្រះរាជាគណៈថ្នាក់ចត្វា និងជាព្រឹទ្ធបុរសរង នៃពុទ្ធិកសាកលវិទ្យាល័យ​ព្រះសីហនុរាជ ជាប្រធានសម្របសម្រួល និគមវចនៈ សរុបខ្លឹមសារ។

- ព្រះវិរិយមង្គល ទូច ពិសិដ្ឋ ព្រះរាជាគណៈកិត្តិយស និងជាព្រះចៅអធិការវត្តសារិកាកែវ ខេត្តកណ្តាល, សម្ដែង អំពី៖ អទស្សនេន ពាលានំ និច្ចមេវ សុខី សិយា បុគ្គលគប្បីមានសេចក្តីសុខជានិច្ចនិរន្តរ៍ ក៏ព្រោះការ​មិនជួបនូវ​បុគ្គលពាលទាំងឡាយ។

- ព្រះធម្មមុនីរង្សី នុត វណ្ណៈ ព្រះរាជាគណៈកិត្តិយស និងជាព្រះចៅអធិការវត្តជ្រៃឧត្តម ខេត្តព្រៃវែង, សម្តែង អំពី៖ អនុបាយេន យោ អត្ថំ ឥច្ឆតិ សោ វិហញ្ញតិ បុគ្គលណា ប្រាថ្នាសេចក្តីចម្រើនដោយខុសឧបាយ បុគ្គលនោះ​រមែងលំបាក។

អញ្ជើញមានមតិនាឱកាសនោះ ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានថ្លែងថា ព្រះធម៌ទេសនា ជួយអប់រំ ទូន្មាន កូនខ្មែរគ្រប់រូប ឲ្យប្រកាន់ខ្ជាប់ នូវអំពើល្អ សីលធម៌ គុណធម៌ ចរិយាធម៌ សេចក្ដីថ្លៃថ្នូរ នៅក្នុងសង្គម។ បង្ការការរីករាលដាលមេរោគ អេដស៍ និងជំងឺអេដស៍។ ចៀសផុតពីគ្រឿងញៀន គ្រឿងស្រវឹង , ពីការជួញដូរ មនុស្ស ចៀសផុតពីអំពើហិង្សាក្នុងគ្រួសារ និងក្នុងសង្គម។ បង្ការគ្រោះថ្នាក់ចរាចរណ៍ , ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ។ រួមចំណែករក្សាភូមិ ឃុំ មានសុវត្ថិភាព។ អក្ខរកម្ម ឆ្ពោះទៅរកការសិក្សាពេញមួយជីវិត។ ការចិញ្ចឹមកូន បែបវិជ្ជមាន និងដើម្បីរួមគ្នាទប់ស្កាត់ការចម្លងវីរុសកូវីដ-១៩ (COVID-19) និងអនុវត្តវិធានការ "៣ការពារ និង៣កុំ" និងជួយផ្សព្វផ្សាយពីហានិភ័យ ដែលកើតឡើងពី ផ្សែងធូប ផ្សែងភ្លើងទៀន ក៏ដូចជាផ្សែងដុត ក្រដាសចិនសែ ធ្វើយ៉ាងណាឱ្យពួកគាត់កាត់ បន្ថយ ព្រោះបង្កគ្រោះ​ថ្នាក់​ដល់​សុខភាពខ្លាំងណាស់៕  អត្ថបទ៖ រដ្ឋា ​