​អាមេរិក៖ ប្រធានសភា​សហរដ្ឋអាមេរិក​លោក Kevin McCarthy បាន​ជួប​ជាមួយ​មេដឹកនាំ​កោះ​តៃវ៉ាន់លោកស្រី Tsai Ing-wen នៅ​រដ្ឋ​កាលីហ្វ័រ​នីញ៉ា​កាលពី​ថ្ងៃ​ពុធ ដោយ​បាន​ក្លាយ​ជា​ឥស្សរជន​ជាន់ខ្ពស់​បំផុត​របស់​ស​ហ​រដ្ឋ​អាមេរិក ដែល​បាន​ជួប​ជាមួយ​មេដឹកនាំ​កោះ​តៃវ៉ាន់​នៅ​លើ​ដី​សហរដ្ឋអាមេរិក​ចាប់​តាំងពី​ឆ្នាំ​១៩៧៩ ​មក ទោះបីជា​មានការ​គំរាម​ពី​ការ​សងសឹក​ពី​សំណាក់​ប្រទេស​ចិន ដែល​បាន​អះ​អាង​ថា ​កោះ​តៃវ៉ាន់​ស្វ័យ​គ្រប់គ្រង​មួយ​នេះ​ជា​របស់​ខ្លួន​ក៏ដោយ​។

លោក McCarthy ជា​អ្នក​សាធារណរដ្ឋ​បាន​ស្វាគមន៍​លោកស្រី Tsai នៅ​បណ្ណាល័យ​ប្រធានាធិបតី Ronald Reagan ក្នុង​ទីក្រុង Simi Valley រដ្ឋ​កាលីហ្វ័រ​នីញ៉ា​ ក្បែរ​ទីក្រុង Los Angeles ជា​កន្លែង​ដែល​សមាជិក​សភា​មកពី​គណបក្ស​សាធារណរដ្ឋ និង​ប្រជាធិបតេយ្យ​បាន​ជួប​ប្រជុំ​គ្នា​។ លោក McCarthy និយាយ​ថា ​មិត្តភាព​រវាង​ប្រជាជន​កោះ​តៃវ៉ាន់ និង​អាមេរិក​គឺជា​បញ្ហា​ដ៏​មាន​សារៈសំខាន់​ចំពោះ​ពិភព​លោក​សេរី ហើយ​វា​មាន​សារៈសំខាន់​ក្នុង​ការ​រក្សា​សេរីភាព​សេដ្ឋកិច្ច សន្តិភាព និង​ស្ថិរភាព​ក្នុង​តំបន់។​ លោកស្រី Tsai និយាយ​ថា ​យើង​ឃើញ​ខ្លួនឯង​ម្តង​ទៀត​នៅ​ក្នុង​ពិភព​លោក ដែល​លទ្ធិ​ប្រជាធិបតេយ្យ​ស្ថិត​ក្រោម​ការ​គំរាម​កំហែង​។

ហើយ​ភាព​បន្ទាន់​នៃ​ការ​ព្យាយាម​រក្សា​នៃ​ពន្លឺ​សេរីភាព​ឲ្យ​នៅ​ចែងចាំង ពុំ​មែន​ត្រឹមតែ​និយាយ​នោះ​ទេ​។ កាលពី​ខែ​សីហា​កន្លងទៅ ប្រទេស​ចិន​បាន​រៀប​ចំ​ហ្គេម​សង្គ្រាម​នៅ​ជុំវិញ​កោះ​តៃវ៉ាន់ បន្ទាប់ពី​ប្រធាន​សភា​មុន​លោកស្រី Nancy Pelosi បាន​ធ្វើ​ទស្សន​កិច្ច​នៅ​ទីក្រុង​តៃប៉ិ​។ មុន​ពេល​ជំនួប​កាលពី​ថ្ងៃ​ពុធ អាជ្ញាធរ​ការពារ​ជាតិ​កោះ​តៃវ៉ាន់​បាន​និយាយ​ថា កង​នាវា​ផ្ទុក​យន្តហោះ​ចិន​មួយ​កង​បាន​ស្ថិត​នៅ​ក្នុង​ដែនទឹក​ ជិត​ឆ្នេរសមុទ្រ​ភាគ​អាគ្នេយ៍​របស់​កោះ​នេះ​។ សេត​វិមាន​បាន​និយាយ​ថា ដំណើរ​ទស្សនកិច្ច​ក្រៅផ្លូវការ​ពុំ​មែន​ជា​រឿង​ថ្មី​ទេ ហើយ​ទីក្រុង​ប៉េកាំង​មិន​គួរ​ប្រើ​វា​ជា​លេស​ដើម្បី​បង្កើន​ភាព​តានតឹង​នោះ​ទេ៕

អត្ថបទ៖ ប៊ុនថន