ចិន៖ សារព័ត៌មានរដ្ឋ Xinhua បានរាយការណ៍ថា ក្រសួងការបរទេសចិននៅថ្ងៃព្រហស្បតិ៍ ទី៦មេសានេះបានថ្កោលទោសជំនួបរវាងប្រធានសភាអាមេរិកលោក Kevin McCarthy និងមេដឹកនាំកោះតៃវ៉ាន់លោកស្រី Tsai Ing-wen នៅក្នុងរដ្ឋ California។
លោកស្រី Tsai បានជួបគណៈប្រតិភូនៃក្រុមអ្នកនយោបាយអាមេរិកមកពីគណបក្សសាធារណរដ្ឋ និងប្រជាធិបតេយ្យ អំឡុងឈប់សំចតនៅក្នុងសហរដ្ឋអាមេរិកកាលពីថ្ងៃពុធ បន្ទាប់ពីដំណើរទស្សនកិច្ចទៅកាន់ប្រទេសហ្គាតេម៉ាឡា ប្រទេសប៊ើលីសនៅអាមេរិកកណ្ដាលដែលជាប្រទេសសម្ព័ន្ធមិត្តរបស់ទីក្រុងតៃប៉ិ។ ក្រសួងនេះបាននិយាយនៅក្នុងសេចក្ដីថ្លែងការណ៍មួយចេញផ្សាយដោយសារព័ត៌មាន Xinhua ថា ជាការឆ្លើយតបទៅនឹងសកម្មភាពខុសឆ្គងយ៉ាងខ្លាំង នៃការឃុបឃិតគ្នារវាងសហរដ្ឋអាមេរិក និងកោះតៃវ៉ាន់ ដែលប្រទេសចិននឹងត្រូវចាត់វិធានការតបវិញយ៉ាងពេញទំហឹង និងប្រកបដោយប្រសិទ្ធភាពដើម្បីការពារអធិបតេយ្យភាព និងបូរណភាពរបស់ជាតិ។
ទីក្រុងប៉េកាំងអះអាងថា កោះតៃវ៉ាន់គឺជាខេត្តមួយរបស់ចិន និងតែងតែប្រឆាំងចំពោះទំនាក់ទំនងផ្លូវការណាមួយ ដែលទីក្រុងតៃប៉ិមានជាមួយប្រទេសផ្សេងទៀត។ ក្រសួងនេះបាននិយាយដោយសំដៅទៅលើគោលនយោបាយ ទទួលស្គាល់ជាផ្លូវការដោយសហរដ្ឋអាមេរិករយៈពេលជាច្រើនទសវត្សរ៍មកហើយនោះថា ជំនួបកាលពីថ្ងៃពុធបានបំពានយ៉ាងធ្ងន់ធ្ងរលើគោលនយោបាយចិនតែមួយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
