​UN៖ សហរដ្ឋអាមេរិក អង់គ្លេស អាល់​បា​នី និង​ប្រទេស​ម៉ា​ល់តា​ បាន​ដើរចេញ​ពីមុខ​បេសកជន​រុស្ស៊ី​ទទួល​បន្ទុក​សិទ្ធិ​កុមារ ដែល​តុលាការ​ព្រហ្មទណ្ឌ​អន្តរជាតិ​ស្វែងរក​ចាប់ខ្លួន​ពី​បទ​ឧក្រិដ្ឋកម្ម​សង្គ្រាម ខណៈ​លោកស្រី​បាន​និយាយ​តាម​បណ្តាញ​វីដេអូ​ ទៅកាន់​សមាជិក​ក្រុមប្រឹក្សាសន្តិសុខ​អង្គការ​សហប្រជាជាតិ​កាលពី​ថ្ងៃ​ពុធ ទី​៥ ខែ​មេសា​។

ចក្រភព​អង់គ្លេស និង​សហរដ្ឋអាមេរិក​បាន​រារាំង​កិច្ច​ប្រជុំ​ក្រៅផ្លូវការ ​ស្តីពី​បញ្ហា​អ៊ុយ​ក្រែ​ន​ដែល​បាន​កោះប្រជុំ​ដោយ​ប្រទេស​រុស្ស៊ី ដើម្បី​ផ្តោត​លើ​ការ​ជម្លៀស​កុមារ​ចេញពី​តំបន់​ជម្លោះ ពី​ការផ្សាយ​តាម​បណ្តាញ​អ៊ីនធឺណិត​របស់​អង្គការសហប្រជាជាតិ​។ អ្នកការទូត​ច្រើន​នាក់​បាន​ដើរ​ចេញពី​បន្ទប់​សន្និសីទ​របស់​អង្គការសហប្រជាជាតិ ជា​កន្លែង​ដែល​ការពិភាក្សា​កំពុង​ត្រូវ​បាន​ធ្វើឡើង ខណៈ​ស្នង​ការ​រុស្ស៊ី​លោកស្រី Maria Lvova-Belova និយាយ​។ ឯកអគ្គរដ្ឋទូត​សហរដ្ឋអាមេរិក​ប្រចាំ​អង្គការ​សហប្រជាជាតិ​លោកស្រី Linda Thomas-Greenfield បាន​និយាយ​ទៅកាន់​អ្នកសារព័ត៌មាន​ថា សហរដ្ឋ​អាមេរិក​រួម​ជាមួយ​ចក្រភព​អង់គ្លេស​រារាំង​ការផ្សាយ​តាម​គេហទំព័រ ដូច្នេះ​លោកស្រី Lvova-Belova ពុំ​មាន​វេទិកា​អន្តរជាតិ​ដើម្បី​ផ្សព្វផ្សាយ​ព័ត៌មាន​មិន​ពិត និង​ព្យាយាម​ការពារ​ទង្វើ​ដ៏​អាក្រក់​របស់​លោក​ស្រី ដែល​កំពុង​កើតឡើង​នៅ​ក្នុង​ប្រទេស​អ៊ុយ​ក្រែ​ន​។

តុលាការ​ព្រហ្មទណ្ឌ​អន្តរជាតិ​កាល​ពី​ខែ​មុន​បាន​ចេញ​ដីកាចាប់ខ្លួន​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន និង​លោកស្រី Lvova-Belova ដោយ​ចោទប្រកាន់​អ្នក​ទាំង២ ពី​បទ​និរទេស​កុមារ​ដោយ​ខុសច្បាប់​ពី​អ៊ុយ​ក្រែ​ន និង​ការផ្ទេរ​មនុស្ស​ខុស​ច្បាប់​ទៅ​រុស្ស៊ី​ពី​ប្រទេស​អ៊ុយ​ក្រែ​ន ចាប់​តាំង​ពី​រុស្ស៊ី​បាន​វាយលុក​នៅ​ថ្ងៃ​ទី​២៤ ខែ​កុម្ភៈ ឆ្នាំ​២០២២​។ ទីក្រុង​មូ​ស្គូ​បាន​និយាយ​ថា ដីកា​ទាំងនោះ​ត្រូវ​បាន​ចាត់ទុកជា​មោឃៈ​តាម​ផ្លូវ​ច្បាប់ ដោយសារ​រុស្ស៊ី​ពុំ​មែន​ជា​ប្រទេស​ហត្ថលេខី​នៃ​សន្ធិសញ្ញា​ ដែល​បាន​បង្កើត​តុលាការ​ព្រហ្មទណ្ឌ​អន្តរជាតិ ​(ICC)​។ ទីក្រុង​មូ​ស្គូ​មិន​បាន​លាក់បាំង​កម្មវិធី ​ដែល​ខ្លួន​បាន​នាំ​កុមារ​អ៊ុយ​ក្រែ​ន​រាប់​ពាន់​នាក់​ទៅកាន់​ប្រទេស​រុស្ស៊ី​នោះ​ទេ ប៉ុន្តែ​បាន​បង្ហាញ​ថា​ជា​យុទ្ធនាការ​មនុស្សធម៌​ដើម្បី​ការ​ពារ​កុមារ​កំព្រា និង​កុមារ​ដែល​ត្រូវ​បាន​បោះបង់ចោល​នៅ​ក្នុង​តំបន់​សង្គ្រាម​។​ អ្នកការទូត​បាន​និយាយ​ថា វា​កម្រ​ណាស់​ដែល​ការផ្សាយ​តាម​គេហទំព័រ​របស់​អង្គការ​សហប្រជាជាតិ​ត្រូវ​បាន​រារាំង៕

អត្ថបទ៖ ប៊ុនថន