​ចិន៖ នាវា​ផ្ទុក​យន្តហោះ​របស់​ចិន​ដែល​មាន​ឈ្មោះថា សាន​ទុង (Shandong) ​ត្រូវ​បាន​ចូលរួម​នៅ​ក្នុង​សម​យុទ្ធ​មួយ​នៅ​មហាសមុទ្រ​ប៉ាស៊ីហ្វិក​ភាគ​ខាងលិច ស្រប​ពេល​មាន​ភាព​តានតឹង​ឡើង​កំដៅ​ខ្លាំង​នៅ​ទូទាំង​ច្រក​សមុទ្រ​តៃវ៉ាន់​ ជុំវិញ​ជំនួប​ជាន់ខ្ពស់​រវាង​មេដឹកនាំ​កោះ​នេះ​លោកស្រី​ Tsai Ing-wen និង​ប្រធាន​សភា​សហរដ្ឋអាមេរិក​លោក Kevin McCarthy​។

​រដ្ឋមន្ត្រី​ការពារ​ជាតិ​កោះ​តៃវ៉ាន់​លោក Chiu Kuo-cheng បាន​ប្រាប់​ក្រុម​អ្នកសារព័ត៌មាន​នៅ​ថ្ងៃ​ព្រហស្បតិ៍​នេះ​ថា នាវា​ផ្ទុក​យន្តហោះ​នេះ​ស្ថិតនៅ​ចម្ងាយ ៣៧០​គីឡូម៉ែត្រ​ក្បែរ​ឆ្នេរសមុទ្រ​ភាគ​ខាង​កើត​របស់​កោះ​តៃវ៉ាន់​។ Shandong ដែល​ជា​នាវា​ផ្ទុក​យន្តហោះ​ផលិត​ក្នុងស្រុក​ដំបូង​របស់​ចិន បាន​បើក​ឆ្លងកាត់​ច្រក​សមុទ្រ Bashi ភាគ​ខាង​ត្បូង​កោះ​តៃវ៉ាន់​ និង​ចូល​ទៅ​ក្នុង​មហាសមុទ្រ​ប៉ាស៊ីហ្វិក​កាល​ពី​ថ្ងៃ​ពុធ ​អម​ដោយ​នាវា​មួយ​ចំនួន​ទៀត​មកពី​អង្គភាព​ទាហានជើងទឹក​របស់​ចិន​។

​សារព័ត៌មាន​រដ្ឋ Global Times របស់​ចិន​បាន​និយាយ​ថា ការ​ដាក់​ពង្រាយ​នេះ​បាន​បង្ហាញ​ពី​នាវា​​ Shandong បាន​ត្រៀមខ្លួន​រួចជាស្រេច​សម្រាប់​កិច្ច​សហប្រតិបត្តិការ​ក្នុង​សមុទ្រ ​និង​ការពារ​អធិបតេយ្យភាព​ និង​បូរណភាព​ជាតិ​របស់​ចិន៕

អត្ថបទ៖ សុខមាន