ភ្នំពេញ៖ មន្រ្តីជាន់ខ្ពស់នៃរាជរដ្ឋាភិបាលកម្ពុជា បានលើកឡើង សាលាថៃង្វៀន នៅក្នុង​ប្រទេសវៀតណាម នឹងបង្កើន​ផ្តល់អាហាររូបករណ៍ និងពង្រីកកិច្ចសហប្រតិបត្តិការ​លើ​ការ​អភិវឌ្ឍធនធានមនុស្សផ្នែកជំនាញវិជ្ជាជីវ: ជាមួយ​ក្រសួងការងារ និងបណ្តុះបណ្តាលវិជ្ជាជីវៈកម្ពុជា ដើម្បីផលប្រយោជន៍ទៅវិញទៅមករបស់ប្រជាជនប្រទេសទាំងពីរ។

ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅក្នុងជំនួប​ការងារ​ជាមួយ ឯកឧត្តម Nguyen Ba Hoan អនុរដ្ឋមន្រ្តីក្រសួងការងារ ជនពិការ និងសង្គម​កិច្ច​វៀតណាម និងឯកឧត្តម Le Quang Tien សមាជិកគណៈកម្មការប្រតិបត្តិ នៃគណៈកម្មការគណ​បក្សខេត្ត និងជាអភិបាលរងខេត្ត នៃគណៈកម្មការ​ប្រជាជនខេត្តថៃង្វៀន រួមជាមួយថ្នាក់ដឹកនាំ មន្រ្តីរាជការ លោកគ្រូ អ្នកគ្រូ នៃសាលាថៃង្វៀន កាលពីព្រឹកថ្ងៃទី៦ មេសា ឆ្នាំ២០២៣នេះ បានសម្តែងនូវមនោសញ្ចេតនារំភើបរីករាយ ដែលបានមក​ទស្សនកិច្ចនៅដល់​ទឹកដីខេត្តថៃ​ង្វៀន ជាពិសេសសាលា ថៃ ង្វៀន ដែលកន្លងមកបានផ្តល់អាហារូបករណ៍​ជូននិស្សិតកម្ពុជា​មកបន្តការ​សិក្សា​នៅទីនេះ ចំនួន ១៨១នាក់ និងបច្ចុប្បន្ននេះ កំពុងសិក្សាចំនួន ១០៨នាក់ កម្រិតសញ្ញាបត្រ​ជាន់ខ្ពស់/បរិញ្ញាបត្ររង។

ក្នុងឱកាសនោះ ឯកឧត្តមរដ្ឋមន្រ្តី បានរំលឹកអំពីទំនាក់ទំនងកម្ពុជា និងវៀតណាម ដែលមានតាំងពី​យូរ​ណាស់មក​ហើយ ហើយប្រៀបបីដូចជាបងប្អូន ដែលតែងតែជួយគ្នាគ្រប់កាលៈទេសៈ។ ឯកឧត្តមបានបន្តថា ការអប់រំ​បណ្តុះបណ្តាលបច្ចេកទេស និងវិជ្ជាជីវៈ គឺជាអាទិភាពមួយនៃកម្មវិធី​នយោបាយរបស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស។ កម្ពុជាកំពុងបង្កើនការបណ្តុះបណ្តាលធនធានមនុស្សស្របតាមគោលនយោបាយជាតិ ស្តីពីការអប់រំ​បណ្តុះបណ្តាល​បច្ចេកទេស និងវិជ្ជាជីវៈឆ្នាំ២០១៧-២០២៥ និងអាទិភាពដែលបានដាក់ចេញក្នុង​ផែនការយុទ្ធសាស្រ្ត​នៃការធ្វើទំនើប​កម្មនៃប្រព័ន្ធអប់រំបណ្តុះបណ្តាល បច្ចេកទេស និងវិជ្ជាជីវៈ។ បច្ចុប្បន្នមានគ្រឹះស្ថានសិក្សាសរុបចំនួន ៣២៥ ក្នុងនោះ​គ្រឹះស្ថានរដ្ឋក្រោមឱវាទក្រសួងមានចំនួន ៣៧ ដែលគ្រឹះស្ថានសិក្សាចំនួន ៣១ បានទទួលវិញ្ញាបនបត្រប្រព័ន្ធ​គ្រប់គ្រងគុណ​ភាព​ស្តង់ដារ​អន្តរជាតិ ISO 9001:2015។

ឯកឧត្តម បន្ថែមថា ការផ្តល់អាហារូបករណ៍ដល់សិស្សកម្ពុជាកន្លងមក វាពិតជាបានជួយ និងបាន​ផ្តល់ឱកាសដល់​ពួកគេ ឱ្យទទួលបានជំនាញច្បាស់លាស់ និងជំនាញបច្ចេកទេស ដើម្បីយក​ទៅបម្រើ​ការងារនៅកម្ពុជា ជាពិសេស​បម្រើការងារនៅតាមរោងចក្រ សហគ្រាស របស់អ្នក​វិនិយោគិនវៀតណាម នៅកម្ពុជា។

ឆ្លើយតបនឹងសំណូមពរ របស់ឯកឧត្តមបណ្ឌិត អ៊ិត សំហេង ក្រសួងការងារ ជនពិការ និងសង្គម​កិច្ចវៀតណាម, ថ្នាក់ដឹកនាំខេត្តថៃ ង្វៀន និងសាលាថៃ ង្វៀន នឹងបន្តផ្តល់អាហារូបករណ៍ជូននិស្សិតកម្ពុជាចំនួន ៤៥កន្លែងថែមទៀត លើកម្រិត​បរិញ្ញាបត្រ/កម្រិតវិស្វករ ​សម្រាប់ឆ្នាំ២០២៣នេះ។

ជាកិច្ចថ្លែងអំណរគុណ ឯកឧត្តមរដ្ឋមន្រ្តី បានស្នើសុំរាជរដ្ឋាភិបាលកម្ពុជា ផ្តល់គ្រឿងឥស្សរយស ជូនសាលាថៃង្វៀន ដើម្បីជាការលើកទឹកចិត្ត និងផ្តល់កិត្តិយសដល់ការខិតខំ​ជួយបណ្តុះបណ្តាល​ធនធានមនុស្សកម្ពុជា៕ ដោយ ៖ បូរ៉ាវី