ភ្នំពេញ៖ និយ័តកម្ម និងការត្រួតពិនិត្យប្រព័ន្ធសន្តិសុខសង្គម មានភាពចាំបាច់ និងមានសារៈសំខាន់យ៉ាងខ្លាំង សម្រាប់ការគ្រប់គ្រងម៉ាក្រូសេដ្ឋកិច្ច និងការធានាស្ថិរភាពនៃប្រព័ន្ធហិរញ្ញវត្ថុរបស់ជាតិ ជាពិសេសនៅពេលដែលទំហំមូលនិធិសន្តិសុខសង្គមកាន់តែធំឡើងៗនៅថ្ងៃអនាគត។

​ឯកឧត្តម រស់ សីលវ៉ា (សីឡាក់វ៉ា) រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសវាហិរញ្ញវត្ថុមិនមនធនាគារ លើកឡើងក្នុងសិក្ខាសាលាផ្សព្វផ្សាយស្តីពី “ការធ្វើនិយ័តកម្ម និងការត្រួតពិនិត្យប្រព័ន្ធសន្តិសុខសង្គមនៅកម្ពុជា” នៅថ្ងៃទី០៦ ខែមេសា ឆ្នាំ២០២៣ នេះថា ដើម្បីធានាឱ្យបាននូវប្រព័ន្ធសន្តិសុខសង្គមមួយ ដែលទទួលបានការជឿទុកចិត្តខ្ពស់ រឹងមាំ និងចីរភាពហិរញ្ញវត្ថុ ចាំបាច់ណាស់ តម្រូវឱ្យមានស្ថាប័នធ្វើនិយ័តកម្មនិងត្រួតពិនិត្យមួយ ដែលរឹងមាំ និងមានជំនាញវិជ្ជាជីវៈច្បាស់លាស់ ក្នុងការរៀបចំលិខិតបទដ្ឋានគតិយុត្ត និងបទប្បញ្ញត្តិប្រុងប្រយ័ត្ននានា រួមទាំងមានគុណវុឌ្ឍិឱ្យគ្រប់គ្រាន់ និងសមស្របក្នុងការតាមដាន និងវាយតម្លៃប្រតិបត្តិការសន្តិសុខសង្គម ដើម្បីធានាថា ប្រតិបត្តិករសន្តិសុខសង្គម អនុវត្តតួនាទីរបស់ខ្លួន ដោយគោរពតាមគោលការណ៍ណែនាំ អនុលោមភាព បទប្បញ្ញត្តិប្រុងប្រយ័ត្ន គណនេយ្យភាព និងតម្លាភាព។

ឯកឧត្តម បន្តថា ក្រោមចក្ខុវិស័យវែងឆ្ងាយ និងប្រកបដោយភាពប្រាកដនិយម, រាជរដ្ឋាភិបាលបានបង្កើតស្ថាប័ននិយ័តករសន្តិសុខសង្គម ដែលជាសេនាធិការរបស់អាជ្ញាធរសេវាហិរញ្ញវត្ថុមិនមែនធនាគារ ទទួលបន្ទុកធ្វើនិយ័តកម្ម និងត្រួតពិនិត្យប្រព័ន្ធសន្តិសុខសង្គម ដែលបច្ចុប្បន្នគឺជាមុខងារបន្ថែម របស់អគ្គលេខាធិការដ្ឋានក្រុមប្រឹក្សាជាតិគាំពារសង្គម។

វត្តមានរបស់និយ័តករសន្តិសុខសង្គម មានសារៈសំខាន់ណាស់ ក្នុងការធានាថា ដំណើរការគ្រប់គ្រង និងការចាត់ចែងរបបសន្តិសុខសង្គមនានា ត្រូវបានអនុវត្តប្រកបដោយភាពត្រឹមត្រូវ តម្លាភាព និងគណនេយ្យភាព ចំពោះសាធារណជន, ពិសេសចំពោះនិយោជក និងកម្មករនិយោជិត ដែលមានកាតព្វកិច្ចបង់ភាគទានចូលទៅក្នុងមូលនិធិរួមគ្នា។ ដូច្នេះនិយ័តកម្ម និងការត្រួតពិនិត្យប្រព័ន្ធសន្តិសុខសង្គម មានភាពចាំបាច់ និងមានសារៈសំខាន់ណាស់ សម្រាប់ការគ្រប់គ្រងម៉ាក្រូសេដ្ឋកិច្ច និងការធានាស្ថិរភាពនៃប្រព័ន្ធហិរញ្ញវត្ថុរបស់ជាតិ ជាពិសេសនៅពេលដែលទំហំមូលនិធិនេះតែធំឡើងៗ នៅថ្ងៃអនាគត។

ដើម្បីពង្រឹងសមត្ថភាពស្ថាប័ន និយ័តករឱ្យបានរឹងមាំ ដែលអាចអនុវត្តមុខងារ និងភារកិច្ចរបស់ខ្លួន ប្រកបដោយប្រសិទ្ធភាពខ្ពស់ឆ្លើយតបនឹងការវិវឌ្ឍជាក់ស្ដែង នៃប្រព័ន្ធសន្តិសុខសង្គម, រាជរដ្ឋាភិបាល ដែលមានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ ជាសេនាធិការ បានកំណត់ និងដាក់ចេញផែនការកំណែទម្រង់ រចនាសម្ព័ន្ធនៃស្ថាប័ននិយ័តករសន្តិសុខសង្គម តាមរយៈការដាក់ឱ្យអនុវត្ត “ផែនការអភិវឌ្ឍន៍ស្ថាប័ននៃនិយ័តករសន្តិសុខសង្គម ២០២២-២០២៦។

ជុំវិញប្រព័ន្ធសន្តិសុខសង្គមនេះ, ឯកឧត្តម ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គនាយកនិយ័តករសន្តិសុខសង្គម បញ្ជាក់ឲ្យដឹងថា ដោយសារកិច្ចការនិយ័តកម្ម និងត្រួតពិនិត្យក្នុងប្រព័ន្ធសន្តិសុខសង្គម គឺជាកិច្ចការមួយថ្មីសម្រាប់កម្ពុជា, ការរៀបចំសិក្សាសាលានាថ្ងៃនេះ មានសារៈសំខាន់យ៉ាងខ្លាំង ក្នុងការរួមចំណែកផ្សព្វផ្សាយ និងលើកកម្ពស់ការយល់ដឹងរបស់សាធារណជន និងតួអង្គពាក់ព័ន្ធនានា ឱ្យកាន់តែទូលំទូលាយបន្ថែមទៀត ជាពិសេសលើមុខងារ និងភារកិច្ច និងសមត្ថកិច្ចរបស់និយ័តករសន្តិសុខសង្គម ដែលជាស្ថាប័នទើបបង្កើតថ្មីដោយរាជរដ្ឋាភិបាល និងកាតព្វកិច្ចរបស់ប្រតិបត្តិករសន្តិសុខសង្គម និងតួអង្គពាក់ព័ន្ធក្នុងកិច្ចដំណើការនៃការធ្វើនិយ័តកម្មនិងការត្រួតពិនិត្យប្រតិបត្តិការរបបសន្តិសុខសង្គមនៅកម្ពុជា៕អត្ថបទ៖ ស៊ុន រ៉ាឌី