​អន្ដរជាតិ៖ សិស្ស និសិត្ស មកពីសាលារៀននានានៅទូទាំងសហរដ្ឋអាមេរិក បានដើរចេញពីថ្នាក់រៀន និងចេញក្រៅបរិវេណសាលារៀន ដើម្បីតវ៉ាចំពោះអំពើហិង្សាដោយកាំភ្លើង។

អង្គការ « Students Demand Action » បានរៀបចំកូដកម្ម និងបាននិយាយនៅលើគេហទំព័ររបស់ខ្លួនជារៀងរាល់ថ្ងៃថា ជនជាតិអាមេរិកជាង ១១០នាក់ បានស្លាប់ដោយកាំភ្លើង ហើយជាង ២០០នាក់ត្រូវបានបាញ់ឲ្យរងរបួស។

ដោយមានកូដកម្មនេះ សិស្សនិស្សិត្សកំពុងស្នើសុំយុទ្ធសាស្ត្រសំខាន់ៗ ដើម្បីរក្សាសុវត្ថិភាពនៅសាលារៀន។កាលពីថ្ងៃទី២៧ ខែមីនា សិស្សបីនាក់ និងបុគ្គលិកបីនាក់ បានស្លាប់នៅសាលារៀន Covenant ទីក្រុង Nashville អំឡុងពេលមានឧបទ្ទវហេតុហិង្សាដោយកាំភ្លើងចុងក្រោយ។

នគរបាលបានឆ្លើយតប និងសម្លាប់អ្នកវាយប្រហារដែលមានអាយុ ២៨ឆ្នាំ ជាអតីតសិស្សនៅសាលារៀននោះ។ មូលហេតុ នៃការជំរុញឲ្យមានការបាញ់ប្រហារនៅមិនទាន់ដឹងច្បាស់នៅឡើយ។

យោងតាមគេហទំព័រ K-12 School Shooting Database ដែលត្រូវបានបង្កើតឡើងដោយអ្នកស្រាវជ្រាវលោក David Riedman បានឱ្យដឹងថា ការបាញ់ប្រហារនៅសាលារៀនសហរដ្ឋអាមេរិក ត្រូវបានកំណត់ថា ឧបទ្ទវហេតុណាមួយដែលកាំភ្លើង ត្រូវបានបាញ់នៅលើទ្រព្យសម្បត្តិសាលារៀន មានចំនួន ៩០លើក រហូតមកដល់ពេលនេះ។ ឧបទ្ទវហេតុចំនួន ៣០៣លើក កាលពីឆ្នាំមុន គឺច្រើនបំផុតនៃឆ្នាំនីមួយៗ នៅក្នុងមូលដ្ឋានទិន្នន័យ ដែលបានចាប់ផ្តើមនៅឆ្នាំ ១៩៧០។