​ភ្នំពេញ៖ នៅក្នុងអំឡុងពេលដែលកម្ពុជាធ្វើម្ចាស់ផ្ទះរៀបចំប្រកួតកីឡា SEA GAMES2023នេះ ដែលនឹងមានវិញ្ញាសារប្រកួតប្រមាណជាង ៥០០វិញ្ញាសារ លើប្រភេទកីឡាចំនួន៣៦នេះ ក្រសួងព័ត៌មាន ជំរុញប្រព័ន្ធផ្សព្វផ្សាយរដ្ឋ និងឯកជន សហការថតផ្សព្វផ្សាយទំាងស្រុងលើគ្រប់វិញ្ញាសារប្រកួតទាំងអស់ ដើម្បីជំរុញការផ្សព្វផ្សាយកម្ពុជា និងឲ្យថ្នាក់ដឹកនាំ ក្រុមកីឡាទស្សនាដកពិសោធន៍ប្រកួតនៅឆ្នាំបន្តបន្ទាប់ទៀត។

នៅក្នុងពិធិបិទសន្និបាតបូកសរុបសមិទ្ធិផលការងារ រយៈពេល ៥ឆ្នំា និងលើកទិសដៅបន្តរបស់ក្រសួងព័ត៌មាន ថ្ងៃទី៦ ខែមេសានេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានស្នើឲ្យបណ្តាស្ថានីយទូរទស្សន៍នានា សូមចូលរួមជួយសហការជាមួយក្រសួងព័ត៌មាន ចូលរួមថតផ្សាយឡាយផ្ទាល់ ឬថតទុកជាឯកសារ លើគ្រប់វិញ្ញាសារប្រកួតកីឡា SEA GAMES មានជាង ៥៨០វិញ្ញាសារ ជាពិសេសលើគ្រប់វិញ្ញាសារការប្រកួតរវាងកីឡាករ កីឡាការនីខ្មែរជាមួយបណ្តាប្រទេសនានា និងវិញ្ញាសារកីឡានានាទៀត ដែលមានប្រកួតនៅតាមបណ្តាខេត្ត។

ឯកឧត្តម រដ្ឋមន្ត្រី បញ្ជាក់ថា សម្រាប់គ្រប់ការប្រកួតលើគ្រប់វិញ្ញាសារនៅរាជធានីភ្នំពេញ គឺគណៈកម្មាធិការជាតិអូឡាំពិក បានទទួលថតឡាយ និងថតទុកឯកសារទាំងស្រុងអស់ហើយ ដោយឡែកសម្រាប់ការប្រកួតនៅតាមបណ្តាខេត្ត គឺក្រសួងព័ត៌មានកំពុងរៀបចំចាត់ចែង និងជំរុញឲ្យបណ្តាស្ថានីយ៍ទូរទស្សន៍រកថវិកាឧបត្ថម្ភពីដៃគូក្រុមហ៊ុនដៃគូ ដើម្បីចូលរួមសហការថតផ្សាយផ្ទាល់ និងថតទុកជាងឯកសារ ដើម្បីផ្សព្វផ្សាយកម្ពុជាទៅលើពិភពលោកផង និងទុកឲ្យកីឡាករ កីឡាការនីខ្មែរទស្សនាដកបទពិសោធន៍បង្កើនសមត្ថភាពការប្រកួតឆ្នាំក្រោយផងដែរ។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ CAMSOCថ្លែងថា បណ្តាស្ថានីយ៍ទូរទស្សន៍នានាក្នុងតំបន់អាស៊ីអាគ្នេយ៍បានបង្ហាញសប្បាយចិត្តដែលកម្ពុជាប្រកាសមិនលក់សិទ្ធផ្សាយឡាយបន្តផ្ទាល់ប្រកួតកីឡាSEA GAMESទៅក្រៅប្រទេស។

ឯកឧត្តម បញ្ជាក់ថា រហូតមកដល់ពេលនេះដែរ មានបណ្តាស្ថានីយទូរទស្សន៍ធំៗចំនួន៦ប្រទេស បានព្រមព្រៀងផ្សាយឡាយបន្តផ្ទាល់ការប្រកួតកីឡាSEA GAMES រួមមានបណ្តាទូរទស្សន៍នៅប្រទេស ថៃ សឹង្ហបូរី វៀតណាម ម៉ាឡេស៊ី ឥណ្ឌូនេស៊ី និងប្រទេសហ្វីលីពីន ហើយទូរទស្សន៍ប្រទេសផ្សេងៗ រួមមាន ឡាវ ភូមា ទីម័រខាងកើតជាដើម កំពុងពិចារណាផ្សាយឡាយបន្តផ្ទាល់ដើម្បីឲ្យពលរដ្ឋគេបានទស្សនាផងដែរ៕ អត្ថបទ៖ ស៊ុម សុខជា