ឥណ្ឌា៖ ចំនួនមនុស្សស្លាប់ថ្មីដោយសារជំងឺ COVID-19 នៅក្នុងប្រទេសឥណ្ឌាបានហក់ឡើងខ្ពស់បំផុត ៣.៦៨៩នាក់កាលពីថ្ងៃអាទិត្យ ដែលជាករណីស្លាប់ប្រចាំថ្ងៃខ្ពស់បំផុត ចាប់តាំងពីការចាប់ផ្តើមការរីករាលដាលឆ្លងសកល ធ្វើឲ្យចំនួនស្លាប់សរុបនៅក្នុងប្រទេសមួយនេះ កើនឡើងដល់ជាង ២១៥.០០០នាក់។
ក្រុមអាជ្ញាធរបានរាយការណ៍ករណីឆ្លងថ្មីចំនួន ៣៩២.៤៨៨នាក់ក្នុងរយៈពេល ២៤ម៉ោងចុងក្រោយ ធ្វើឲ្យចំនួនឆ្លងសរុបនៅឥណ្ឌាកើនឡើងជាង ១៩.៥៦លាននាក់។ មកទល់នឹងពេលនេះជំងឺ COVID-19 បានសម្លាប់មនុស្ស ២១៥.៥៤២នាក់នៅក្នុងប្រទេសឥណ្ឌា។ មន្ទីរពេទ្យ ព្រះវិហារ និងឈាបនដ្ឋាននៅក្នុងឥណ្ឌាបានផ្ទុកអ្នកជំងឺ និងសាកសពលើសចំណុះ ស្របពេលដែលប្រទេសមួយនេះរាយការណ៍ករណីឆ្លងថ្មីជាង ៣០ម៉ឺននាក់រយៈពេល ១០ថ្ងៃជាប់ៗគ្នា។ ក្រុមគ្រួសារជាច្រើនបានប្រឹងប្រែងដោយខ្លួនឯងដើម្បីរកឱសថ និងអុកស៊ីហ្សែនដើម្បីសង្គ្រោះអាយុជីវិតមនុស្សជាទីស្រលាញ់របស់ពួកគេ។
រដ្ឋ និងដែនដីសហភាពជិត ១០កន្លែងនៅក្នុងប្រទេសឥណ្ឌា បានដាក់ចេញវិធានការបិទតំបន់របស់ខ្លួន ថ្វីត្បិតតែរដ្ឋាភិបាលសហព័ន្ធស្ទាក់ស្ទើរក្នុងការបិទប្រទេសក៏ដោយ។ រដ្ឋភាគខាងកើតអូឌីសាបានក្លាយជារដ្ឋចុងក្រោយគេ ប្រកាសបិទតំបន់របស់ខ្លួនរយៈពេល ២សប្តាហ៍ ជាមួយនឹងរដ្ឋដែល្លី, មហារ៉ាស្ត្រា, កាណាតាកា និងរដ្ឋបឹងហ្គាល់ខាងលិច។ រដ្ឋផ្សេងទៀត ដូចជារដ្ឋឧត្តប្រទេស, តេឡានហ្គាណា, អាសាម, ឥន្ទ្រប្រទេស និងរដ្ឋរ៉ាចាស្ថានបានដាក់ចេញបម្រាមគោចរពេលយប់ និងបិទតំបន់របស់ខ្លួននៅចុងសប្តាហ៍៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
