ភ្នំពេញ៖ បច្ចុប្បន្ននេះនិស្សិតកម្ពុជាចំនួន ១០៨នាក់ បានកំពុងសិក្សានៅសាលាថៃង្វៀន ដោយ​ទទួល​បាន​អាហារូបករណ៍ពីរដ្ឋាភិបាល នៃសាធារណរដ្ឋសង្គមនិយមវៀតណាម។ នេះ​តាម​ការ​ឲ្យ​ដឹង​របស់​ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។

នៅក្នុងបណ្តាញសង្គមកាលពីរាត្រីថ្ងៃទី៦ ខែមេសា ឆ្នាំ២០២៣នេះ ឯកឧត្តមបណ្ឌិត អ៊ិត សំហេង បានសសេរថា បន្ទាប់ពីបានជួបសំណេះសំណាលជាមួយតំណាងក្រសួងការងារ ជន​ពិការ និងសង្គមកិច្ចវៀតណាម តំណាងខេត្តថៃង្វៀន និងថ្នាក់ដឹកនាំសាស្រ្តាចារ្យ លោកគ្រូ អ្នកគ្រូ បុគ្គលិក​សិក្សា​សាលាថៃង្វៀនរួចមក ឯកឧត្តម បានដឹកនាំគណៈប្រតិភូ ជួបសំណេះ​សំណាល​សួរ​សុខ​ទុក្ខ​ដោយផ្ទាល់ជាមួយនិស្សិតកម្ពុជាទាំងនោះ នៅខេត្តថៃង្វៀន-វៀតណាម។

នាឱកាសនោះ ឯកឧត្តមបណ្ឌិត បានសំដែងនូវការនឹករលឹក និងការ​យក​ចិត្ត​ទុក​ដាក់​ខ្ពស់​របស់​រាជរដ្ឋាភិបាលកម្ពុជា ចំពោះការគិតគូដល់អនាគតក្មួយៗដែលជានិស្សិតកម្ពុជា ក្នុង​ការ​បណ្តុះ​បណ្តាល កសាង​សមត្ថភាព​របស់​ពួក​គេ​សម្រាប់​ចូល​រួម​អភិវឌ្ឍន៍​ប្រទេសជាតិ​ឱ្យ​កាន់​តែ​រី​ក​ចម្រើន​ថែម​ទៀត។ រាជរដ្ឋាភិបាលកម្ពុជាបាននឹងកំពុងខិតខំផ្តល់ឱកាសដល់យុវជន ឱ្យទទួល​បាន​នូវ​ឱកាស​សិក្សា​ សម្រាប់អនាគតរបស់ពួកគេ ទាំងក្នុងនិងក្រៅប្រទេស។ ជាក់ស្តែង ឱកាសដែល​និស្សិត​កម្ពុជា បានមកសិក្សានៅសាលាថៃង្វៀននេះ បើគ្មានកិច្ច​សហប្រតិបត្តិការ​ល្អ​រវាង​រដ្ឋាភិបាល នៃ​ប្រទេសទាំងពីរទេ គឺមិនមានឱកាសបែបនេះទេ។ ឯកឧត្តមបន្ថែមថា ការ​អភិវឌ្ឍ​ធន​ធាន​មនុស្សបានក្លាយជាអាទិភាពទី១ សម្រាប់គោលនយោបាយរបស់រាជរដ្ឋាភិបាលកម្ពុជា ក្រោម​ការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា។ គោល​នយោបាយជាច្រើនបាននឹងកំពុងអនុវត្តដើម្បីជំរុញកសាងធនធានមនុស្សគ្រប់ប្រភេទ ជា​ពិសេស​ធនធានមនុស្សផ្នែកវិជ្ជាជីវៈ ដើម្បី​ឆ្លើយ​តប​ទៅ​នឹង​កំណើន​រីក​ចម្រើន​យ៉ាង​ឆាប់​រហ័ស​ នៃ​សេដ្ឋកិច្ច សង្គម កម្ពុជានាពេលបច្ចុប្បន្ន។

ក្នុងឱកាសនោះ ឯកឧត្តមរដ្ឋមន្រ្តី បានថ្លែងនូវការអគុណចំពោះក្រសួងការងារ ជនពិការ និង​សង្គម​កិច្ច​វៀតណាម រដ្ឋបាលខេត្តថៃង្វៀន និងសាលាថៃង្វៀន ដែលបានផ្តល់​នូវ​ឱកាស​ដល់​និស្សិត​កម្ពុជា ក៏ដូចជាផ្តល់​នូវ​ការ​គំាពារ​យក​ចិត្ត​ទុក​ដាក់​ដល់​ពួក​គេក្នុង​អំឡុង​ពេល​ស្នាក់​នៅ​សិក្សា​រៀន​សូត្រនៅទីនេះ។ ទន្ទឹមគ្នានេះដែរ ឯកឧត្តម ក៏បានផ្តាំផ្ញើ​ដល់​និស្សិត​ទាំង​អស់​ឱ្យ​ចេះ​ស្រឡាញ់​គ្នា​ជួយថែរក្សាគ្នា គោរពឱ្យបានតាមបទបញ្ជផ្ទៃក្នុង វិន័យ ក៏ដូចជាច្បាប់​ទម្លាប់​នៅ​ប្រទេស​វៀតណាម ហើយខិតខំប្រឹងប្រែងសិក្សារៀនសូត្រ ឱ្យក្លាយជា​ធន​ធាន​មនុស្ស​ដ៏​ពូ​កែរ​បស់​កម្ពុជា ក្នុងការចូលរួមអភិវឌ្ឍសេដ្ឋកិច្ច សង្គមជាតិរបស់ខ្លួន។ 

គួរបញ្ជាក់ថា និស្សិតទាំង១០៨នាក់នេះ បានទទួលអាហារូបករណ៍ពីរដ្ឋាភិបាលវៀតណាម តាម​រយៈ​ក្រសួង​ការងារ និងបណ្តុះបណ្តាលវិជ្ជាជីវៈកម្ពុជា បច្ចុប្បន្នកំពុង​សិក្សា​កម្រិត​សញ្ញា​បត្រ​ជាន់​ខ្ពស់​បច្ចេក​ទេស ឬបរិញ្ញាបត្ររង រយៈពេល៤ឆ្នាំ (សិក្សាភាសារយៈពេល ១ឆ្នាំ និងជំនាញ​រយៈ​ពេល​ ៣ឆ្នាំ) លើមុខជំនាញ៖ បច្ចេកទេស និងវិជ្ជាជីវៈ ដូចជា៖ ទំនាក់ទំនង និងបច្ចេក​ទេសអេឡិច​ត្រូនិក, ប្រៃសណីយ៍ និងទូរគមនាគមន៍, វិស្វកម្មអេឡិចត្រូនិក និងទំនាក់ទំនង, អគ្គិសនី​ឧស្សាហកម្ម, គ្រប់គ្រងពាណិជ្ជកម្ម, សេវាកម្មច្បាប់, គណនេយ្យអាជីវកម្ម, សវនកម្ម​គណនេយ្យ, ធនាគារ និងហិរញ្ញវត្ថុ និងព័ត៌មានវិទ្យា៕