​អ៊ីស្រាអែល៖ ​អ៊ីស្រាអែល​បាន​បើក​ការវាយប្រហារ​តាម​អាកាស ​សងសឹក​ជា​បន្តបន្ទាប់​នៅ​តំបន់​ហ្គា​ហ្សា​នៅ​ព្រឹក​ថ្ងៃ​សុក្រ​នេះ ប៉ុន្មាន​ម៉ោង​បន្ទាប់ពី​គ្រាប់​រ៉ុក្កែត​រាប់​សិប​គ្រាប់ ​ត្រូវ​បាន​បាញ់​ចេញពី​ប្រទេសជិតខាង​លី​បង់​ចូល​ទៅ​ក្នុង​ទឹកដី​របស់​អ៊ីស្រាអែល ដោយមាន​ការ​បាញ់​ប្រហា​រ​ពី​យោធា​អ៊ីស្រាអែល ​ដែល​បាន​ដាក់​កំហុស​ទៅលើ​ក្រុម​សកម្មប្រយុទ្ធ​ប៉ា​ឡេ​ស្ទី​ន​។

អ្នកសារព័ត៌មាន CNN នៅ​ទីក្រុង​ហ្គា​ហ្សាបាន​ឮ​សំឡេង​យន្តហោះ និង​ការ​ផ្ទុះ ប៉ុន្មាន​នាទី​បន្ទាប់ពី​កងកម្លាំង​ការពារ​ជាតិ​អ៊ីស្រាអែល​បាន​ប្រកាស​ប្រតិបត្តិការ​។ ការវាយប្រហារ​របស់​អ៊ីស្រាអែល​បាន​ដាក់​គោលដៅ​ទៅលើ​តំបន់​ជាច្រើន​នៅ​តំបន់ឆ្នេរ​ ដែល​គ្រប់គ្រង​ដោយ​ក្រុម​សកម្ម​ប្រយុទ្ធ​ប៉ា​ឡេ​ស្ទី​នហា​ម៉ាស់ (Hamas)​។ គ្រាប់​រ៉ុក្កែត​ជាច្រើន​គ្រាប់​ត្រូវ​បាន​បាញ់​ចេញពី​តំបន់​ហ្គា​ហ្សា ឆ្ពោះ​ទៅ​កាន់​ប្រទេស​អ៊ី​ស្រាអែល​ជា​ការ​ឆ្លើយតប​។ កងកម្លាំង​ការពារ​ជាតិ​អ៊ីស្រាអែល​និយាយ​ថា យន្តហោះ​ចម្បាំង​របស់​ខ្លួន​បាន​វាយប្រហារ​ផ្លូវ​រូង​ក្រោម​ដី ភេរវកម្ម​ចំនួន​ពីរ​កន្លែង​នៅ​តំបន់ Beit Hanoun និង​តំបន់ Khan Yunis រួម​ជាមួយ​ទីតាំង​ផលិត​អាវុធ​ពីរ​កន្លែង​របស់​ក្រុម Hamas ជា​ការ​ឆ្លើយតប​ទៅ​នឹង​ការ​រំលោភ​បំពាន​សន្តិសុខ​របស់​នេះក្នុង​រយៈពេល​ពីរ​បី​ថ្ងៃ​ចុង​ក្រោយនេះ​។

កម្លាំង​ការពារ​ជាតិ​អ៊ីស្រាអែល​បាន​និយាយ​នៅក្នុង​សេចក្តី​ថ្លែងការណ៍​ថា យាន​ដ្រូ​ន​របស់​កងកម្លាំង​ការពារ​ជាតិ​អ៊ីស្រាអែល បាន​វាយប្រហារ​កាំភ្លើងយន្ត​ធុន​ធ្ងន់​មួយ​ដើម​នៅ​ភាគ​ខាងជើង​តំបន់​ហ្គា​ហ្សា ដែល​ត្រូវ​បាន​ប្រើ​ដើម្បី​បាញ់​តម្រង់​ទៅ​រក​យន្តហោះ​ចម្បាំង ​កងកម្លាំង​ការពារ​ជាតិ​អ៊ី​ស្រាអែល និង​ទឹកដី​របស់​អ៊ីស្រាអែល​។ ជាច្រើន​ម៉ោង មុន​ពេល​កងកម្លាំង​ការពារ​ជាតិ​អ៊ីស្រាអែល​វាយប្រហារ​នៅ​តំបន់​ហ្គា​ហ្សា នាយករដ្ឋមន្ត្រី​លោក Benjamin Netanyahu បាន​ព្រមាន​ថា អ៊ីស្រាអែល​នឹង​វាយប្រហារ​សត្រូវ ហើយ​ពួកគេ​នឹង​រង​សំណង​សម្រាប់​រាល់​សកម្មភាព​ឈ្លានពាន​។ ការ​បាញ់​តបត​នេះ​កើត​មាន​ឡើង ខណៈ​កំហឹង​ពុះកញ្ជ្រោល​នៅ​ទូទាំង​តំបន់ ជុំវិញ​ការ​វាយឆ្មក់​របស់​នគរបាល​អ៊ីស្រាអែល​នៅ​វិហារ​អ៊ីស្លាម al-Aqsa ក្នុង​ទីក្រុង​ហ្សេ​រុយ​សា​ឡឹម​កាលពី​ថ្ងៃ​ពុធ ដែល​ធ្វើ​ឲ្យ​មានការ​ថ្កោលទោស​យ៉ាង​ទូលំ​ទូលាយ​ពី​ពិភព​អារ៉ាប់ ​និង​មូស្លីម និង​បាន​បង្ក​ឱ្យ​មាន​ការ​បាញ់​រ៉ុក្កែត​សងសឹក​ពី​តំបន់​ហ្គា​ហ្សា ចូល​ទៅ​ក្នុង​ទឹកដី​អ៊ីស្រាអែល៕

អត្ថបទ៖ ប៊ុនថន