ពោធិ៍សាត់៖ យុទ្ធនាការអន្ទា្កក់សូន្យ ដំណាក់កាលទី២ ដឹកនាំដោយក្រសួងបរិស្ថាន ក្រោម​កិច្ច​សហការ​ជាមួយ​អង្គការដៃគូអភិរក្សជាច្រើន បានចាប់ផ្តើមធ្វើឡើង​នៅ​ខេត្តពោធិ៍សាត់​ជា​លើក​ដំបូង នៅថ្ងៃទី៦ និងទី៧ ខែមេសា ឆ្នាំ២០២៣នេះ ខណៈ​ខេត្ត​គោលដៅ​សម្រាប់​យុទ្ធនាការ​អន្ទាក់​សូន្យ​ ក្នុង​ដំណាក់កាលទី២នេះ រួមមាន ខេត្តពោធិ៍សាត់ ខេត្តកំពង់ស្ពឺ ខេត្តកោះកុង ខេត្ត​សៀមរាប ខេត្តបាត់ដំបង និងខេត្តប៉ៃលិន ដែលរៀបចំឡើងដោយមានការសហការពីរដ្ឋបាលខេត្ត និង​មន្ទីរបរិស្ថានខេត្ត។

យុទ្ធនាការនេះត្រូវបានផ្តួចផ្តើមឡើងដោយក្រសួងបរិស្ថានក្រោមការដឹកនាំរបស់ ឯកឧត្ដម នេត្រ ភក្ត្រា រដ្ឋលេខាធិការក្រសួងបរិស្ថាន និង ជាប្រធានយុទ្ធនាការអន្ទាក់សូន្យ ដែល​បាន​បញ្ចប់​ដោយ​ជោគ​ជ័យ​នៅ​ដំណាក់កាលទី១ ប្រព្រឹត្តឡើងក្នុងឆ្នាំ២០២២ ។ យុទ្ធនាការនេះ​បាន​បន្ត​ដំណើរ​ដល់​ដំណាក់កាលទី២ ដែលបានចាប់ផ្តើមធ្វើមុនគេក្នុងខេត្តពោធិ៍សាត់នៅថ្ងៃទី០៧ ខែមេសា ឆ្នាំ២០២៣ ។

គោលបំណងដ៍សំខាន់នៃយុទ្ធនាការនេះគឺ “អន្ទាក់សូន្យក្នុងតំបន់ការពារធម្មជាតិទាំងអស់” ជាមួយ​លទ្ធផលដែលបានរំពឹងទុកដូចជា៖ ការពិនិត្យ និង​អនុម័ត​មាត្រា​ច្បាប់​ដែល​ទាក់​ទង​ការ​គ្រប់​គ្រង ការដាក់អន្ទាក់ និងការបណ្តើរឆ្កែក្នុងតំបន់ការពារធម្មជាតិ ។ ការ​បង្កើត​អង្គ​ភាព​ចល័ត​អនុវត្ត​ច្បាប់​ចម្រុះ​នៅ​តាម​ខេត្ត​ដើម្បី​ត្រួត​ពិនិត្យ និង​បង្រ្កាប​ការ​ជួញ​ដូរ​សត្វ​ព្រៃ​ខុស​ច្បាប់​នៅ​តាម​ទីផ្សារ និងកន្លែងសំខាន់ៗក្នុងខេត្ត។ ការ​អនុម័ត​វិធាន​ការ​បង្ការ​ណែនាំ​អំពី​ហានិភ័យ​សុខភាព​សាធារណៈ​ដែល​ទាក់​ទង​នឹង​ការ​ជួញ​ដូរ​សត្វ​ព្រៃ​ដែល​មាន​ចែង​ដោយ​អង្គការ​សុខភាព​ពិភព​លោក​ក្នុង​ខែ​មេសា ឆ្នាំ ២០២១។ ការចូលរួមពីសាធារណៈក្នុងការបញ្ឈប់ការបរិភោគសាច់សត្វព្រៃ តាម​រយៈការផ្លាស់ប្តូរឥរិយាបទនិងទំលាបនៃការរស់នៅ។

ឯកឧត្ដម នេត្រ ភក្ត្រា រដ្ឋលេខាធិការក្រសួងបរិស្ថាន បានមានប្រសាសន៍ថា៖ «យុទ្ធនាការ​អន្ទាក់​សូន្យ​ដំណាក់កាលទី២ ដែលកំពុងប្រព្រឹត្តនៅខេត្តពោធិ៍សាត់ហើយនឹងគ្រោងធ្វើនៅតាម បណ្តាល​ខេត្ត​ផ្សេងទៀតដែលស្ថិតនៅភាគនិរតីនៃប្រទេសកម្ពុជា។ យុទ្ធនាការនេះ​បាន​ឆ្លុះ​បញ្ចាំង​អំពី​ការ​តាំង​ចិត្តដ៏មោះមុតដែលមានការចូលរួមពីយើងទាំងអស់គ្នា ក្នុងការលុប​បំបាត់​អន្ទាក់​គ្រប់​ប្រភេទ​នៅ​ក្នុង​តំបន់​ការពារធម្មជាតិកម្ពុជា បញ្ឈប់ការជួញដូរសត្វព្រៃខុសច្បាប់ រួមជាមួយការ​បង្កើត​នូវ​មុខ​របរ​ផ្សេងៗ សម្រាប់ចិញ្ចឹមជីវិតជំនួសវិញ ដើម្បីទ្រទ្រង់ដល់ការ​អភិវឌ្ឍន៍​សេដ្ឋកិច្ច​នៃ​សហគមន៍​មូលដ្ឋានរបស់យើង»។

ឯកឧត្ដមបញ្ជាក់ថា ក្រសួងបរិស្ថានបាន​ជំរុញឱ្យ​មាន​ការ​ចូល​រួម​យ៉ាង​សកម្មពី​គ្រប់​ស្ថាប័ន​ពាក់ព័ន្ធ​រួម​មាន ថ្នាក់ក្រោមជាតិ និងអាជ្ញាធរខេត្ត ក្នុងការ​ពង្រឹង​ការ​អនុវត្ត​ច្បាប់​ដែល​គាំទ្រ​ដល់​ការ​ការពារ​សត្វ​ព្រៃ និងលើកទឹកចិត្ត​ដល់​សហគមន៍​មូលដ្ឋាន​ក្នុង​ការ​អភិរក្ស​សត្វព្រៃ​ ដើម្បី​អភិវឌ្ឍន៍​អេកូទេសចរណ៍​។

ក្រសួងបរិស្ថានបានអំពាវនាវឱ្យប្រជាពលរដ្ឋទាំងអស់បញ្ឈប់ការលក់ ទិញ និង​បរិភោគ​សាច់សត្វ​ព្រៃ ព្រោះសកម្មភាពទាំងនេះសុទ្ធតែប៉ះពាល់ដល់សត្វព្រៃ និងជីវចម្រុះរបស់កម្ពុជា ដែល​មាន​សារៈសំខាន់​ជាសាកល។ នៅពេលដែលអន្ទាក់ត្រូវបានលុបបំបាត់ នោះការសម្លាប់​សត្វ​ព្រៃ​ក៏​ត្រូវ​បាន​បញ្ឈប់​ដូចគ្នា។ ការលុបបំបាត់ការដាក់អន្ទាក់ ទាមទារឱ្យការប្តេជ្ញា​ចិត្ត​ និង​ការ​ចូល​រួមរបស់​យើង​ទាំង​អស់គ្នា។ យើងត្រូវរួមគ្នាការពារសត្វព្រៃនៅកម្ពុជា និងការពារប្រព័ន្ធជីវចម្រុះធម្មជាតិ ដើម្បី​ការ​អភិវឌ្ឍន៍ប្រកបដោយចីរភាព និងអត្ថប្រយោជន៍រយៈពេលវែងពីជំនាន់បច្ចុប្បន្ន ត​ទៅ​នា​ពេល​អនាគត៕