ពោធិ៍សាត់៖ តាមរយៈយុទ្ធនាការអន្ទាក់សូន្យដំណាក់កាលទី២ ចាប់ផ្ដើមពីខេត្តពោធិ៍សាត់ថ្ងៃទី ៦-៧ ខែមេសា ឆ្នាំ២០២៣នេះ មានភោជនីយដ្ឋានចំនួន ៩ បានប្រកាស ប្ដេជ្ញាមិនលក់​មុខម្ហូប​ធ្វើពីសាច់​សត្វព្រៃឡើយ។ នេះបើតាមការបញ្ជាក់របស់ ឯកឧត្ដម នេត្រ ភក្ត្រា រដ្ឋលេខាធិការ​ក្រសួង​បរិស្ថាន និង ជាប្រធានយុទ្ធនាការអន្ទាក់សូន្យ។

ឯកឧត្ដម នេត្រ ភក្ត្រា បានថ្លែងថា៖«ចំនួនភោជនីយដ្ឋានដែលបានចូលរួមក្នុងការប្ដេជ្ញាចិត្ត មិន​លក់​មុខ​ម្ហូប​ធ្វើ​ពី​សាច់សត្វព្រៃ នៅទីរួមខេត្តពោធិ៍សាត់នេះ គឺមានចំនួន ៩ ភោជណីយដ្ឋាន»។

តាមរយៈយុទ្ធនាការអន្ទាក់សូន្យនេះ ក្រសួងបរិស្ថាន​បាន​អំពាវ​នាវ​ឱ្យ​ប្រជាពលរដ្ឋ​ទាំង​អស់​បញ្ឈប់​ការ​លក់ ទិញ និងបរិភោគសាច់សត្វព្រៃ ព្រោះសកម្មភាពទាំងនេះសុទ្ធតែប៉ះពាល់ដល់សត្វព្រៃ និង​ជីវ​ចម្រុះរបស់កម្ពុជា ដែលមានសារៈសំខាន់ជាសាកល។ នៅពេលដែលអន្ទាក់ត្រូវបានលុបបំបាត់ នោះការសម្លាប់សត្វព្រៃក៏ត្រូវបានបញ្ឈប់ដូចគ្នា។ ការលុប​បំបាត់ការដាក់អន្ទាក់ ទាមទារឱ្យការប្តេជ្ញាចិត្តនិងការចូលរួមរបស់យើងទាំងអស់គ្នា។ យើង​ត្រូវរួមគ្នាការពារសត្វព្រៃនៅកម្ពុជា និងការពារប្រព័ន្ធជីវចម្រុះធម្មជាតិ ដើម្បី​ការ​អភិវឌ្ឍន៍​ប្រកប​ដោយ​ចីរភាព និងអត្ថប្រយោជន៍រយៈពេលវែងពីជំនាន់បច្ចុប្បន្ន តទៅនាពេលអនាគត៕