​ចិន៖ មនុស្ស​ចំនួន ​៤​នាក់​ដែល​ជាប់​ពាក់ព័ន្ធ​នឹង​កិច្ចព្រមព្រៀង​នេះបាន​ប្រាប់​សារព័ត៌មាន Reuters ថា ក្រុមហ៊ុន​ទូរគមនាគមន៍​រដ្ឋ​របស់​ប្រទេស​ចិនកំពុង​សាងសង់​បណ្ដាញ​ខ្សែ​កាបិ៍​អ៊ីនធឺណិត fiber-optic បាត​សមុទ្រ ​ក្នុង​ការ​ចំណាយ​ប្រមាណ​ ៥០០​លាន​ដុល្លារ​អាមេរិក​ដែល​នឹង​ត​ភ្ជាប់​តំបន់​អាស៊ី មជ្ឈិមបូព៌ា និង​អឺរ៉ុប ដើម្បី​ប្រជែង​គម្រោង​ស្រដៀង​គ្នា​មួយ​គាំទ្រ​ដោយ​សហរដ្ឋអាមេរិក។

គម្រោង​នេះ​គឺជា​សញ្ញា​បញ្ជាក់​ថា សង្គ្រាម​បច្ចេកវិទ្យា​កំពុង​ដ៏​ក្ដៅ​គគុក​រវាង​ទីក្រុង​ប៉េកាំង និង​ទីក្រុង​វ៉ាស៊ីនតោន រាល​ដាល​កាន់​តែ​ខ្លាំង​លើ​បណ្ដាញ​ផ្ដល់​សេវា​អ៊ីនធឺណិត​។ ​យោង​តាម​មនុស្ស ​៤​នាក់​ដែល​បាន​ដឹង​ច្បាស់​ពី​ផែនការ​នេះ​ ក្រុមហ៊ុន​ដឹកជញ្ជូន​ធំៗ​ចំនួន​៣ ​របស់​ចិន​មាន​ដូចជា​ China Telecommunications Corporation (China Telecom), China Mobile Limited និង​ក្រុមហ៊ុន China United Network Communications Group Co Ltd(China Unicom) កំពុង​គូស​ផែន​ទី​មួយ​ក្នុងចំណោម​បណ្ដាញ​ខ្សែ​កាបិ៍​បាតសមុទ្រ​តាម​បច្ចេកវិទ្យា​ទំនើប និង​ជឿនលឿន​បំផុត​របស់​ពិភព​លោក​។

​មនុស្ស ​៤​នាក់​ដែល​សុំ​មិន​បញ្ចេញ​ឈ្មោះ​បាន​និយាយ​ថា ដោយ​ត្រូវ​បាន​គេ​ស្គាល់​ថា​ជា Europe-Middle East-Asia ការសាងសង់​បណ្ដាញ​ខ្សែ​កាបិ៍​ដែល​បាន​ស្នើ​ឡើង​នេះនឹង​ត​ភ្ជាប់​ពី​ទីក្រុង ​Hong Kong ទៅកាន់​ខេត្ត​កោះ​ហៃ​ណា​របស់​ចិនដីគោក មុន​ពេល​ត​ភ្ជាប់​ទៅកាន់​សិង្ហ​បុរី​ ប៉ា​គី​ស្ថាន អារ៉ាប៊ីសាអ៊ូឌីត អេ​ហ្ស៊ី​ប និង​ប្រទេស​បារាំង។ ​ប្រភព​ខាងលើ​បន្ថែម​ថា​ ខ្សែ​កាបិ៍​ដែល​នឹង​ចំណាយ​ប្រាក់​ប្រហែល ​៥០០​លាន​ដុល្លារ​អាមេរិក​ ដើម្បី​បញ្ចប់​ជា​ស្ថាពរនឹង​ត្រូវ​បាន​សាង​សង់​ឡើង​ដោយក្រុមហ៊ុន HMN Technologies Co Ltd របស់​ប្រទេស​ចិន​ ជា​ក្រុមហ៊ុន​ខ្សែ​កាបិ៍​លូតលាស់​ខ្លាំង​បំផុត ដែល​ក្រុមហ៊ុន​កាន់ការ​ងារ​នេះ​មុន​ភាគ​ច្រើន​ ត្រូវ​បាន​គ្រប់គ្រង​ដោយ​ក្រុមហ៊ុន​ទូរគមនាគមន៍​ខ្នាត​យក្ស​របស់​ចិន Huawei Technologies Co Ltd៕​

អត្ថបទ៖ សុខមាន