នៅថ្ងៃសុក្រនេះ ប្រេសិតពិសេសនុយក្លេអ៊ែរសហរដ្ឋអាមេរិក កូរ៉េខាងត្បូង និងជប៉ុន បានថ្កោលទោសការបាញ់មីសីលកាលពីពេលថ្មីៗនេះរបស់កូរ៉េខាងជើង និងបានបង្ហាញក្តីកង្វល់ខ្លាំងចំពោះសកម្មភាពវាយប្រហារតាមប្រព័ន្ធអ៊ីនធឺណិតជាការព្យាបាទ ដើម្បីគាំទ្រកម្មវិធីអាវុធនុយក្លេអ៊ែររបស់ពួកគេ ស្របពេលដែលមានការគំរាមកំហែងនុយក្លេអ៊ែរ និងមីស៊ីលកើនឡើងរបស់ទីក្រុងព្យុងយ៉ាង ។

លោក Kim Gunn គឺជាប្រធានក្រុមចរចានុយក្លេអ៊ែរកូរ៉េខាងត្បូង មាននូវជំនួបត្រីភាគីជាមួយសមភាគីសហរដ្ឋអាមេរិកលោក Sung Kim និងសមភាគីជប៉ុនលោក Takehiro Funakoshi នៅក្នុងទីក្រុងសេអ៊ូល ហើយលោកនិយាយថា មហិច្ឆិតានុយក្លេអ៊ែរកូរ៉េខាងជើង គឺគ្មានអ្វីក្រៅពីបំផ្លាញសេដ្ឋកិច្ចខ្លួនឯងនោះទេ ។

លោក Kim និយាយថា ពួកយើងនឹងប្រឆាំងដាច់ខាតចំពោះការបង្ករឿងនាពេលអនាគតរបស់កូរ៉េខាងជើង និងកាត់ផ្តាច់លំហូរប្រាក់ចំណូលរបស់ពួកគេដែលផ្តល់មូលនិធិដល់សកម្មភាពខុសច្បាប់ទាំងអស់នេះ ។

ក្រុមមន្រ្តី និងក្រុមអ្នកជំនាញនៅសហរដ្ឋអាមេរិក និងនៅតាមបណ្តាប្រទេសសម្ព័ន្ធមិត្តរបស់ពួកគេ បាននិយាយថា មូលនិធិរូបិយប័ណ្ណគ្រីបតូលួចដោយក្រុមវាយប្រហារតាមប្រព័ន្ធអ៊ីនធឺណេតរបស់កូរ៉េខាងជើង បានក្លាយជាប្រភពចំណូលដ៏សំខាន់សម្រាប់ផ្តល់ហិរញ្ញបទានដល់កម្មវិធីអាវុធនុយក្លេអ៊ែររបស់ប្រទេសជាប់ទណ្ឌកម្មមួយនេះ ៕